Ռուսաստանը պետք է վերադառնա G7-ի կազմ. Թրամփ
Միացյալ Նահանգների նախագահ Դոնալդ Թրամփը հունիսի 8-ին հայտարարել է, որ Ռուսաստանի Դաշնությունը պետք է վերադառնա «Մեծ յոթնյակ»-ի (G7) կազմ: Այս մասին գրում է The Hill-ը՝ մանրամասնելով, որ նախագահը նման հայտարարությամբ է հանդես եկել այսօր կանադական Քվեբեկում մեկնարկող գագաթնաժողովին ուղևորվելուց առաջ Սպիտակ տան բակում լրագրողների հետ հանդիպման ժամանակ:
Մինչդեռ Reuters-ը նշում է, որ Միացյալ Նահանգների ղեկավարը նաև ասել է, որ Ռուսաստանը պետք է մասնակցի G7-ի մեկնարկող գագաթնաժողովին:
Հայտնի է, որ Թրամփը ժամանակից շուտ է լքելու գագաթնաժողովը, որպեսզի նախապատրաստվի հունիսի 12-ին Սինգապուրում Հյուսիսային Կորեայի առաջնորդ Կիմ Չեն Ընի հետ հանդիպմանը:
Հավելենք, որ «Մեծ ութնյակ»-ը, որն իրենից ներկայացնում է տնտեսապես զարգացած պետությունների միություն, հիմնվել է 1998թ.: Սակայն 2014թ. Ղրիմի՝ Ռուսաստանի կազմում ներառվելու հետևանքով, ՌԴ-ն հեռացվել է միությունից, ինչի հետևանքով G8-ը դարձել է G7: Այժմ դրան անդամակցում են ԱՄՆ-ն, Կանադան, Մեծ Բրիտանիան, Ֆրանսիան, Գերմանիան, Իտալիան ու Ճապոնիան:










