Ես ասել եմ՝ ի՞նչ գործ ունեին այդ անչափահաս երեխաներն այնտեղ. Նունե Եսայանը՝ «Մարտի 1»-ի վերաբերյալ հայտարարության մասին

Երգչուհի Նունե Եսայանն այսօր ասուլիսին հայտարարեց, որ իր անվան շուրջ, արդեն տասը տարի է, մի ձնագնդի է մեծանում, և ինքն այժմ արդեն ուզում է, որ այն հալվի: Անդրադառնալով տասը տարի առաջ «մարտի մեկ»-ի վերաբերյալ տարածված այն հրապարակմանը, թե Նունե Եսայանը ասել է, որ չգնային, չզոհվեին՝ ներկայացրեց, թե ինչ է ասել իրականում:

Նա նշեց, որ դրանից մեկ օր առաջ տեսել է վայրագությունների տեսարան և գտնում է, որ անչափահաս երխաներին չի կարելի թույլ տալ գնալ այնտեղ, քանի որ վտանգ կա: «Ես ասել եմ՝ ի՞նչ գործ ունեին այդ անչափահաս երեխաներն այնտեղ: Զոհվելու մասին թեմա ընդհանրապես չի եղել»,-պարզաբանեց երգչուհին:

Նունե Եսայանը շեշտեց, որ  սխալ հրապարակումը տեսնելուց հետո խորհրդակցել է իր իրավաբանի հետ, ով խորհուրդ է տվել լռել: «Երանի՝ ձայնագրություն ունենայի, որ ապացուցեի»,-ասաց նա և նշեց, որ մինչ այսօր դա պիտակ է մնացել:

Ինչ վերաբերում է հարցին, թե ինչու հեղափոխական շարժման ընթացքում հարթակում չի հայտնվել, նա նշեց, որ այս տարիների ընթացքում իրեն  դարձրել են ազգի թշնամի, կառավարության կողմնակից:  «Ես պասիվ քաղաքացի եմ»,-ասաց  նա, ապա հավելեց՝  որևէ շարժման իրեն չենք էլ տեսնի:

Նունե Եսայանի խոսքով՝ ինչպես նախկին կառավարությունում, այնպես էլ ներկա կառավարությունում ինքը ընկերներ ունի, սակայն քաղաքականության հետ կապ չունի, ավելին՝ զզվում է քաղաքականությունից, պատերազմներից:

«Ես շատ գնահատում եմ այն, ինչ կատարվեց մեր երկրում, մեր երիտասարդներին ծափահարում եմ, որ կարողացան ինչ-որ բան փոխել այս երկրում, կապրենք, կտեսնենք, դա էլ չգիտենք՝ ինչպես կլինի: Մենք ուզում էինք լինել ազատ, անկախ, բայց ինչ է լինելու, որևէ մեկը չի կարող ասել: Փառք տանք, որ լավ լինի, մեր ուզածով լինի, ինչի համար այս ամենը արվել է, այդպես էլ լինի»,-ասաց նա: Վերջինս հայտարարեց, որ ինքը և իր ընտանիքը այս երկրից երբևէ չեն հեռանալու:

Tert.am-ի հարցին, թե ամեն դեպքում կողմնակից էր այս շարժմանը, իշխանափոխությանը և այսքան տարի անց, ի վերջո, ինչ գնահատական կտա «մարտի մեկ»-ի իրադարձություններին, Նունե Եսայանը պատասխանեց, որ կողմնակից է փոփոխությանը: «Իշխանափոխություն… այդ բառերը չեմ ուզում օգտագործել, ես ազատ մարդու ազատ կամքի դրսևորմամբ ապրում եմ: Ես միանշանակ չեմ վերաբերում այդ հեղափոխություններին, քանի որ որտեղ կա վտանգ, ես վախենում եմ բոլորիս համար»,-ասաց նա: Նա նշեց, որ դա հասուն մարդկանց անելիք է, կոչ արեց նման տեղեր երեխաներին չտանել: Նա նշեց, որ իր երեխաներին էլ մայիսի մեկին, հունիսի մեկին և նման այլ միջոցառումներին,  որտեղ շատ մարդ կա, չի տանում:

Իսկ «մարտի մեկի» վերաբերյալ Նունե Եսայանը նշեց. «Կառավարության կողմից, կարծում եմ, սխալ կար, բայց քանի որ ես գաղափար չունեմ քաղաքականութունից, և յուրաքանչյուր կառավարոթյուն, ինչից  դրդվելով է ինչ անում, չեմ կարող ասել: Բայց ես երկու ձեռքով դեմ եմ բռնությանը, պատերազմներին, սակայն այդ հրահրողներն են արել այդ ամենը, երբ խաղաղ ցուցարարը գնում է, հետո գալիս են ինչ-որ հրահրողներ, որ չգիտեն՝ ովքեր են,  կառավարությունն էլ խառնվում է, դառնում է շիլաշփոթ, և դաժան ինչ-որ վերջաբան է լինում»:

Նունե Եսայանը ներկայացրեց նաև իր ձեռքբերումները՝ նշելով, որ համերգներից շատ բարեգործություն է արել, սակայն չի բարձրաձայնել այդ մասին: Նա նշեց, որ միակ հայաստանաբնակ երգչուհին է, ում մասին գրել է «New York times»-ը, ում մասին CNN-ը մեծ ռեպորտաժ է պատրաստել:

Ինչ վերաբերում է մայիսի 28-ին  հրապարակի համերգին իր չլինելուն, նա նախ նշեց, որ իրեն չեն դիմել, սակայն եթե դիմեին, պետք է մերժեր, քանի որ նախապես համաձայնել էր մասնակցել մարզերում համերգներին  և, մասնավորապես, այդ օրը ելույթ է ունեցել Արտաշատում:

«Կարծում եմ, որ դա նախկին կառավարության կազմակերպած համերգն էր, որը, ըստ իս, կներեք՝ չհաջողված համերգ էր և հարիր չէր հարյուրամյակին»,-ասաց նա:

Նունե Եսայանը հայտարարեց, որ այսուհետև կպատժի բոլոր այն մարդկանց՝ կապ չունի՝ լրատվամիջոց է, թե Ֆեյսբուքում քոմենթ գրող, ովքեր  իրեն, իր ընտանիքին կկկպչեն, սուտ լուրեր կտարածեն: