ԱՄՆ-ում ակտիվիստ կինը բարձրացել է Ազատության արձանի վրա՝ ի նշան բողոքի (տեսանյութ)
ԱՄՆ անկախության օրն առնվազն ութ մարդ բողոքի ակցիա է իրականացրել ներկայիս ամերիկյան վարչակազմի միգրացիոն քաղաքականության դեմ, հայտնում է CNN-ը: Նրանցից մեկն էլ` սևամորթ կին, բարձրացել է Ազատության արձանի վրա։
«Կինը բարձրացել է Ազատության արձանի պատվանդանի վրա, ևս յոթ մարդ ձերբակալվել է Ազատության կղզում (որտեղ գտնվում է հուշարձանը): Նրանք բոլորը բողոքի ակցիայի մասնակիցներ են»,- նշել են իրավապահ մարմիններում աղբյուրները:
Հայտնի է, որ արձանի վրա բարձրացած ակտիվիստ կինը կապ ունի «Rise and Resist» խմբի հետ: Այդ խմբի կազմակերպիչը հաստատել է հեռուստաալիքին, որ բողոքի ակցիան իսկապես նախատեսվում էր: Ակտիվիստները ձեռքում կարգախոսներ են պահել, որոնք կոչ են արել վերացնել ԱՄՆ-ի միգրացիոն և մաքսային ոստիկանությունը: Ակցիայի նախաձեռնողի խոսքով՝ կինը բարձրացել է արձանի պատվանդանի վրա առանց ցուցարարների իմացության: Նա, մասնավորապես, բողոքել է ԱՄՆ-ի սահմաններին իրավապահների կողմից ներգաղթյալների ընտանիքների բաժանման քաղաքականության դեմ:
Ինչպես CNN-ին հայտնել է Նյու Յորքի ոստիկանությունից աղբյուրը, կինը հայտարարել է, որ չի իջնի արձանից, մինչև «բոլոր երեխաներն ազատ չարձակվեն»:
Իրավապահները և փրկարարները մի քանի ժամ բանակցություններ են վարել կնոջ հետ:














