Մասիսի քաղաքապետ Դավիթ Համբարձումյանին կալանքի տակ պահելն ապօրինի է: Իրավապահ մարմինները կալանքի տակ պահելով Դավիթ Համբարձումյանին՝ փորձում են սիրաշահել նոր իշխանություններին: Կա պատվեր, թե ում կողմից դեռ հայտնի չէ:

Այս մասին այսօր լրագրողների հետ հանդիպման ժամանակ ասաց Դավիթ Համբարձումյանի պաշտպաններից Տիգրան Աթանեսյանը:

«Բոլորդ կհիշեք, որ մայիս ամսին վարչապետ Նիկոլ Փաշինյանը ոստիկանության պետին հանձնարարեց արագ բացահայտել բոլոր գործերը, որոնք տեղի են ունեցել ապրիլյան օրերին: Ոստիկանությունը, ցավոք, հանցագործությունը բացահայտելու փոխարեն անանուն ահազանգ է կատարում, որով հայտնում են, որ այս անձինք են արել հարձակումը քաղաքացիների նկատմամբ: Անհայտ զանգն էլ կատարվել է Երևանի ոստիկանության Կենտրոնի բաժնի դիմացի մայթից: Դրա համար այդ գործը անվանում եմ համացանցային ֆեյք: Առանց որևէ ապացույցի վեց անձ ձերբակալվում է, այդ թվում՝ Դավիթ Համբարձումյանը, բոլորն ազատ են արձակվում, բացի Գոռ Խաչատրյանը: Հետո տեղի է ունենում հաջորդ դրվագը՝ Հայանիստի խաչմերուկում տեղի ունեցածը, որով ևս մեկ մեղադրանք են առաջադրում Դավիթ Համբարձումյանին, հարմարեցնում են, որ գործը քննի Մնացական Մարտիրոսյանը»,-ասաց Աթանեսյանը:

Փաստաբանի խոսքով՝ նման ծիծաղելի գործ չի տեսել, չկա մեկ վկա, ով մատնացույց անի, որ Դավիթ Համբարձումյանը եղել է նշված դեպքերի վայրերում: Նա նշեց, որ տեղեկություններ ունեն, որ քննչական բաժնում բռնության ենթարկված վկաներ կան, ինչի մասին նրանք հաղորդում են ներկայացրել Հատուկ քննչական ծառայություն. «Վկա կա նաև, որը տարածքի ոստիկանապետերից մեկի մորաքրոջ տղան է, բոլորը տալիս են տարբեր ցուցմունքներ»:

Հիշեցնենք, որ 2018 թվականի ապրիլի 22-ին Հայանիստ-Հովտաշատ գյուղերի խաչմերուկում տեղի ունեցած միջադեպի փաստով մեղադրանք է առաջադրվել Դավիթ Համբարձումյանին, մեղադրանք է առաջադրվել նաև ապրիլի 22-ին Էրեբունի վարչական շրջանում տեղի ունեցած զանգվածային անկարգությունների փաստով, գործերը մեկ վարույթում են:

Նշենք, որ Հովտաշենում տեղի ունեցածի փաստով Դավիթ Համբարձումյանին մեղադրանք է առաջադրվել ՀՀ ՔՕ-ի 258-րդ հոդվածի 4-րդ մասի հատկանիշներով՝ խուլիգանություն, որը զուգորդվել է անձի առողջությանը միջին ծանրության վնաս պատճառելով,իսկ Էրեբունիի դեպքերով նրան մեղադրանք է առաջադրվել ՀՀ ՔՕ-ի 225-րդ հոդվածի հատկանիշներով։

Գործերը քննվում են մեկ վարույթում: Այդ գործերով ինը պաշտպանյալ ունեն, որից կալանավորված են Գոռ Խաչատրյանն ու Դավիթ Համբարձումյանը: