Եթե խոսում ենք և իրար ճիշտ չենք հասկանում, ի՞նչ իմաստ ունի խոսակցությունը. Ն. Փաշինյանը՝ քաղաքական ուժերի հետ բանակցությունների մասին

Երեկ ես ասացի, որ եթե ճիշտ եմ հասկացել՝ խորհրդարանական ուժերը վարչապետի թեկնածու չեն առաջադրի, այսօր պարոն Աշոտյանն ակնարկում է՝ հնարավոր է, որ մենք ճիշտ չենք հասկացել իրար, այս դեպքում հարց է ծագում, եթե մենք խոսում ենք ու ճիշտ չենք հասկանում իրար, ի՞նչ իմաստ ունի խոսակցությունը:

Այս մասին ԱԺ-ում լրագրողների հետ զրույցում ասաց վարչապետ Նիկոլ Փաշինյանը՝ անդրադառնալով Тert.am-ի հարցին՝ արդյոք բանակցություններն այսօր խորհրդարանական ուժերի հետ շարունակվելու են:

«Այսօր այդ մասին խոսակցություն չի եղել, պլաններ չկան, քանի դեռ չկան հստակ ազդակներ, որ մենք իրար ճիշտ ենք հասկանում, և մեր գործընկերներն իրավիճակը ճիշտ են հասկանում. այդ խոսակցության ռացիոնալության վերաբերյալ հարցեր կան»,- շեշտեց վարչապետը:

Նիկոլ Փաշինյանն ասաց, որ իրենց ծրագրերով գնալու են առաջ, և ակնհայտ է, որ արտահերթ խորհրդարանական ընտրությունների պահանջը ժողովրդական պահանջ է, և դժվար է պատկերացնել այն մարդկանց, ովքեր պատրաստվում են դիմադրել այդ մարդկանց պահանջին:

Նիկոլ Փաշինյանն ասաց, որ եթե այլ քաղաքական ուժերի օրակարգում նման պահանջ չկա, իրենք կարող են չմասնակցել ընտրություններին: Վարչապետի խոսքով՝ ներքաղաքական ճգնաժամը չխորացնելու միակ լուծումն արտահերթ խորհրդարանական ընտրություններն են: Ինչ վերաբերում է իր նախկին հայտարարությանը, թե քաղաքական ուժերին պետք է ժամանակ տրվի, որպեսզի հավասար պայմաններ ստեղծվեն, հետհեղափոխական էյֆորիան անցնի, ապա վարչապետն ասաց, որ Հայաստանում գուցե տասնհինգ տարի էյֆորիան չանցնի, ինչը չի նշանակում, որ պետք է արտահերթ ընտրությունները այդքան ժամանակ չլինեն:

Անդրադառնալով Tert.am-ի դիտարկմանը, թե քաղաքական ուժերը չեն ընդունում, որ քաղաքական ճգնաժամ է, նշում են, որ ԱԺ-ն ու Կառավարությունը համագործակցում են, օրենքներն ընդունվում են, վարչապետն ասաց.

«Երեկ տեսանք՝ ինչպես են համագործակցում, ԱԺ-ն որոշում էր ընդունում կառավարությունից թաքուն, որի նպատակը գիտենք՝ որն է»,- շեշտեց նա:

Վարչապետն ասաց, որ ՔՊ պատգամավորները տեղյակ էին, պարզապես ամեն ինչ հրատապության ռեժիմով էր արվել և իրենք հորդորել էին այդ ճանապարհով չգնալ, քանի որ այդ ճանապարհի վերջում լինելու է այն, ինչ որ երեկ եղավ:

Անդրադառնալով հարցին, թե վտանգավոր չէ այն շրջանը, երբ ինքը հրաժարական կներկայացնի և կլինի վարչապետի պաշտոնակատար, Նիկոլ Փաշինյանը չբացառեց, որ կլինեն շուրջօրյա հանրահավաքներ:

Նիկոլ Փաշինյանն ասաց, որ քաղաքական ուժերը երեկ նորից սխալվեցին: