Դատարանը վարույթ է ընդունել Սեդրակ Քոչարյանի հայցադիմումն ընդդեմ Արթուր Վանեցյանի

ՀՀ երկրորդ նախագահ Ռոբերտ Քոչարյանի որդու՝ Սեդրակ Քոչարյանի հայցադիմումն ընդդեմ Ազգային անվտանգության տնօրեն Արթուր Վանեցյանի դատարանի կողմից վարույթ չընդունվելու հետո կրկին մուտք էր արվել դատարան և ընդունվել է վարույթ: Այս մասին Tert.am-ը տեղեկացավ Դատական տեղեկատվական համակարգից:
 
Դատավոր Դավթյանի որոշման մեջ ասվում է.«Սեդրակ Ռոբերտի Քոչարյանի ներկայացուցիչ Անի Ալավերդյանի ընդդեմ Արթուր Գագիկի Վանեցյանի՝ զրպարտություն համարվող փաստացի տվյալները հրապարակայնորեն հերքելու պահանջի մասին հայցադիմումն ընդունել վարույթ և հայցադիմումը դատարանում ընդունված համարել սկզբնապես ներկայացնելու օրը՝ 20.09.2018 թվականը»: 

Նշենք, որ ավելի վաղ Քոչարյանի ներկայացուցիչ Անի Ալավերդյանը Tert.am-ի հետ զրույցում հայտնել էր, որ տեխնիկական թերությունների պատճառով հայցադիմումը վարույթ չէր ընդունվել, սակայն տեխնիկական թերությունը շտկելուց հետո հենց նույն օրը հայցադիմումը մուտք է արվել դատարան:  

Փաստաբանն ասել էր, որ հայցվոր Սեդրակ Քոչարյանը պահանջել էր զրպարտության դիմաց փոխհատուցում ստանալ և բացի այդ հրապարակայնորեն հերքում էր պահանջել: