Օֆշորային ընկերությունը հանցագործություն չէ, օֆշորը դա բիզնես գործիք է, որն աշխարհում օգտագործում են գործարարները.Արթուր Վանեցյանն իր հարազատների բիզնես գործունեության մասին

Զեմֆիրա Վանեցյանն իմ հորեղբոր կինն է և 1989 թվականից չի բնակվում Հայաստանում, նա հորեղբորս հետ բնակվում է Ժնևում։

Այս մասին Ծաղկաձորում լրագրողների հետ զրույցում ասաց Ազգային անվտանգության տնօրեն Արթուր Վանեցյանը` պատասխանելով հարցին, թե արդյոք ԱԱԾ-ն նույն ջանասիրությամբ զբաղվո՞ւմ  է նաև Արթուր Վանեցյանի հարազատների բիզնեսներով, նաև Զիմֆիրա Վանեցյանի՝ օֆշորում գրանցված բիզնեսով։

«Իմ հորեղբոր կինը, ով 70 տարեկան է, ՀՀ-ում չի բնակվում 1989 թվականից։ Ես բիզնես չունեմ, խոշոր գործարար է եղբայրս՝ Կարեն Վանեցյանը, ով նույնպես ՀՀ քաղաքացի չէր,  ՀՀ քաղաքացիություն ստացել է այս տարի ՀՀ-ում տեղի ունեցած հեղափոխությունից հետո։

Նա ևս բիզնես գործունեություն չի ծավալում ՀՀ-ում, ՀՀ-ում չէ 1989 թվականից»,-ասաց Վանեցյանը։

Նա ասաց,որ Կարեն և Արմեն Վանեցյանները խոշոր գործարարներ են, բիզնես գործունեություն են ծավալում Ուկրաինայում, Իրաքում, Իրանում, Սերբիայում և հետաքննող լրագրողները կարող են հետաքննել նրանց գործունեությունը։

Ինչ վերաբերում է օֆշորային գոտում գրանցված բիզնեսներին,Արթուր Վանեցյանն ասաց.«Օֆշորային ընկերությունը հանցագործություն չէ։ Դա բիզնես գործիք է, որն օգտագործվում է աշխարհի շատ գործարարների կողմից։ Ես բիզնես գործունեություն չեմ ծավալում»։