Համերաշխության մթնոլորտ չկա, իշխանությունը հասարակությանը «լավ ու վատի» է բաժանում․ «Ադեկվադ դիսկուրս» կոնֆերանսին քննարկվեցին ՀՀ ներքաղաքական զարգացումները

Երևանում ընթանում է «Ադեկվադ» ՀԿ նախաձեռնած «Ադեկվադ դիսկուրս» կոնֆերանսը, որին մասնակցող փորձագետները քննարկում են Հայաստանում և տարածաշրջանում առկա քաղաքական իրադրությունը։ 

Օրակարգի առաջին պանելային քննարկումը նվիրված էր Հայաստանի ներքաղաքական զարգացումներին։

ԱԺ նախկին պատգամավոր, «Ակունք» քաղաքական վերլուծությունների կենտրոնի տնօրեն Ռուբեն Հակոբյանի համոզմամբ՝ անցյալ տարի Հայաստանում տեղի ունեցածը հեղափոխության հետ կապ չուներ, այն կա՛մ ներիշխանական դավադրություն էր, կա՛մ արտերկրում ծրագրված սցենար, կամ էլ օրվա իշխանությունն իսկապես չէր պատկերացնում, թե ինչ է կատարվում Հայաստանում։

«Այլընտրանքային նախագծեր» խմբի անդամ Էլինար Վարդանյանն էլ նշեց՝  երկրում փոփոխությունների կարիք իրոք կար, բայց տեղի ունեցած հեղափոխությունն ինքնին փոփոխություն չէր։

Նրա խոսքով՝ հասարակության մեջ պետք է ստեղծվեր համերաշխության մթնոլորտ, պետք է առկա լիներ ռեֆորմների հստակ ծրագիր և դրանք կյանքի կոչելու թիմ։

«Ունենք այս երեք կարևոր բաղադրիչների տապալում։ Ընդ որում, յուրաքանչյուր բաղադրիչի տապալումը բերում է մյուս բաղադրիչի ավելի ուժեղ տապալմանը, շղթայական տապալման պրոցեսով գնում ենք»,- ընգծեց նա։

«Պոլիտէկոնոմիա» հետազոտական ինստիտուտի տնօրեն, տնտեսագետ Անդրանիկ Թևանյանի կարծիքով իշխանությունը փորձելու է հասարակության մեջ թշնամիներ գտնելու ճանապարհով պահել իշխանությունը։

«Այդ թշնամիները գտնելու է ի դեմս սևերի, նախկին իշխանությունների, ղարաբաղցիները, ի դեմս ՌԴ-ի։ Մեր իշխանությունը գնում է այն ստանդարտ ճանապարհով, որով գնում են բոլոր ձախողված իշխանությունները»,-ասաց նա՝ նշելով, թե իշխանությունը զգում է, որ ձախողվել է ինչպես արտաքին, այնպես էլ ներքին դաշտում։

Ըստ բանախոսի՝ բալանսը կտրուկ ձևով խախտվում է արտաքին ռազմաքաղաքական միջավայրում և հենց այդ պատճառով էլ իշխանություններն ուզում են նախապես մեղավորներ նշանակել՝ հնարավոր պատերազմի հնարավոր կորուստների պարգայում։

Քաղաքական, հասարական գործիչ Միհրան Հակոբյանն էլ նշեց, որ իշխանությունն ամենաբարձր մակարդակով մարդկանց բաժանում է «սևերի ու սպիտակների», «լավի ու վատի»։

«Եթե դու «հպարտ» քաղաքացի ես, ունես իրավունքներ, եթե «հպարտ» քաղաքացի չես՝ դու չունես իրավունքներ, դատապարտված ես զտման, մեկուսացման և որևիցե տեսակի կարծիք արտահայտելու և գործընթացների մասնակցելու իրավունք չունես»,-նշեց նա։