Ամուլսարի հարցով ՔԿ-ի ներկայացրած փորձաքննությունը չի կարող կառավարության որոշման համար հիմք դառնալ․ բողոքի ակցիայի մասնակից իրավաբան

12։40

Իրավաբան Նազելի Վարդանյանը Կառավարության դիմաց ասաց, որ Քննչական կոմիտեի ներկայացրած փորձաքննությունը չի կարող հիմք դառնալ կառավարության որոշման համար, որովհետև այդ փորձաքննությունն արված է քրեական հետապնդման հարցը պարզելու համար:

Իրավաբանի խոսքով՝ այդ փորձաքննության մեջ հաշվի չեն առնվել նոր հանգամանքները: նա տեղեկացրեց, որ Ջերմուկի եւ Գնդեվազ գյուղի 19 բնակիչներ դիմել են Վարչական դատարան՝ պահանջելով նոր հանգամանքները նկատի ունենալով ուժը կորցրած ճանաչել մշակման թույլտվության տրամադրման մասին փաստաթուղթը:

12։00

Բնապահպան Բաբկեն Հարությունյանի պնդմամբ՝  Ամուլսարի հանքի հարցով եզրակացություն ներկայացրած «Էլարտ» ընկերությունը կապված է ՀՀ փոխվարչապետ Տիգրան Ավինյանի գրասենյակի ղեկավար Վարագ Սիսեռյանի հոր հետ, ով Լիբանանի վարչապետի խորհրդականն է եղել։ Հիշեցնենք, որ «Էլարտ» ընկերությունը լիբանանյան է։

11:53

Կառավարության դիմաց Ամուլսարի հանքի շահագործման դեմ ակցիա իրականացնողներից մեկը նշեց, որ «Լիդիան Արմենիա» ընկերությունն իր փաստաթղթերում գրել է, որ պատրաստ է մոտավորապես 34 մլն դոլար հատկացնել 5 տարվա կտրվածքով հանքերում անհրաժեշտ հետագա գործողություններ իրականացնելու համար: Սակայն երեկ ներկայացված ուսումնասիրություններում նրանք գրում են, որ սա ընդունելի տարբեր չէ և ամենաքիչը պետք է հաշվարկվի 30 տարվա համար:

«Մոտավոր հաշվարկներով՝ այն կազմելու է 80-90 մլն դոլար: Այսինքն՝ 3 անգամ նվազեցված է իրական ծախսերը 30 տարվա համար: Բայց իրականում այդ գործընթացի համար 30 տարի պետք չէ, այլ առնվազն՝ 200-300 տարի: Հիմա, եթե բազմապատկենք այդ ծախսը, կստանանք ոչ թե 80-90 մլն դոլար, այլ 400-500 մլն դոլար: Այս թվերի մասին ոչ մի տեղ գրած չէ, այսինքն՝ որևէ փաստաթղթում գրված չէ, որ ինչ-որ մեկը 50 տարի հետո պարտավոր է ջրերի աղտոտումը կանխարգելի, որոնք կարող են հայտնվել Կեչուտի ջրամբարում, Որոտան գետում և այլն: Եթե այս ամենը թույլատրվի, ապա 50 տարի հետո մենք պետք է ծախսենք այդ գումարները, որ կատարենք այդ գործողությունները, սակայն հարց է՝ կկարողանա՞նք, թե՞ ոչ»,-նշեց նա:

Բողոքի ակցիայի մասնակիցը շեշտեց, որ ներկայացված փաստաթուղթը փորձաքննության արդյունքներ չեն, այլ «Լիդիան Արմենիա» ընկերության փաստաթղթերի ուսումնասիրությունն է:

«Այս ուսումնասիրություններով ևս մեկ անգամ ապացուցվում է, որ կազմված է եղել թերի ՇՄԱԳ (շրջակա միջավայրի վրա ազդեցության գնահատում): Եթե այս ձևով հանքավայրը շահագործվեր, ապա ՀՀ կառավարությունն ու ժողովուրդն ունենալու էին լուրջ խնդիրներ»:

11:31

ՀՀ կառավարության դիմաց շարունակվում է բողոքի ակցիան ի պաշտպանություն Ամուլսարի: Բողոքի ակցիայի կազմակերպիչներից մեկն անդրադարձավ երեկ հրապարակված փորձագիտական հետազոտության արդյունքներին՝ այն անվանելով մանիպուլյացիա:

Բողոքի մասնակիցն ընթերցեց փորձագիտական եզրակացությունից մի հատված.

«Հաշվի առնելով Ամուլսարի գտնվելու վայրը, դրա աշխարհագրական դիրքը, հարակից բնակավայրերն ու առողջարանային հանգստավայրերը՝ կարո՞ղ է, արդյոք, բաց հանքով շահագործելը, տարլվացման կույտի և ապարների լցակույտի առկայությունը համարվել անվտանգ, եթե ոչ, ապա ինչպիսի՞ բնապահպանական վնաս կարող է այն առաջացնել:

Պատասխան՝ գնահատումները թերի են, համապատասխան հետևությունները՝ անվստահելի, հետևաբար հարցին՝ արդյոք հանքավայրում շահագործումը կարող է ընդհանուր համարվել անվտանգ, հնարավոր չէ պատասխանել:

Սա գրել է փորձագիտական խումբը: Հիմա ես ուզում եմ հարցնել՝ եթե հնարավոր չէ պատասխանել, ու այդ վերլուծությունները անվստահելի են, և գնահատումները թերի են, ապա ինչպե՞ս է քննչական խմբի ներկայացուցիչը մի ամբողջ ժողովրդի հայտարարում, որ այս ուսումնասիրությունից կարելի է եզրակացնել, որ ոչ մի խնդիր չկա»:

10:14

Ի պաշտպանություն Ամուլսարի բողոքի ակցիա է ընթանում ՀՀ կառավարության դիմաց: Երեկ Քննչական կոմիտեն հրապարակել էր Ամուլսարի ոսկեբեր քվարցիտների հանքավայրի շահագործման հետ կապված համալիր փորձաքննության արդյունքները: Դրա կատարումը հանձնարարվել էր Advanced Resources Development (ELARD) ընկերության փորձագետների խմբին:

Քննչական կոմիտեի կոռուպցիոն, սեփականության դեմ ուղղված հանցագործությունների և կիբեռհանցագործությունների քննության վարչության պետ Յուրա Իվանյանը հայտարարեց, որ հանքի շահագործման կամ դրա արգելքի վերաբերյալ որոշումը կայացնելու է կառավարությունը:

ՔԿ-ն պարզապես հայտնում է, որ ՀՀ ՔՕ-ի 282-րդ հոդվածի 1-ին մասով հարուցված քրեական գործով քրեական հետապնդման հիմքեր չկան:

Նշենք, որ ՀՀ ՔՕ-ի 282-րդ հոդվածը սահմանում է՝ պաշտոնատար անձի կողմից բնակչությունից մարդկանց կյանքի և առողջության համար վտանգավոր ռադիոակտիվ, քիմիական, մանրէաբանական կամ այլ կենսաբանական նյութերով շրջակա միջավայրի աղտոտման վերաբերյալ այլ վտանգավոր տեղեկություններ թաքցնելը կամ այդպիսի աղտոտման վերաբերյալ դիտավորությամբ ակնհայտ կեղծ տեղեկություններ հաղորդելը: 

Երեկ միաժամանակ բողոքի ակցիա ու երթ է տեղի ունեցել Ջերմուկում: Ակցիայի մասնակցիներն ասում էին, որ ցանկացած փորձաքննություն չի ազդելու իրենց որոշման վրա, և Ամուլսարը սար է մնալու: