«Դա նաև մորս երազանքն է». Կրիշտիանու Ռոնալդուն խոսել է ընկերուհու՝ Ջորջինա Ռոդրիգեսի հետ ամուսնության մասին (տեսանյութ)

«Բարի լույս, Բրիտանիա» հաղորդմանը տված հարցազրույցում հանրահայտ ֆուտբոլիստ Կրիշտիանու Ռոնալդուն հայտնել է, որ պատրաստվում է ամուսնանալ ընկերուհու՝ Ջորջինա Ռոդրիգեսի հետ, ինչպես նաև խոստովանել է, որ դա իր մոր երազանքն է, գրում է Daily Mail-ը:

«Նա ինձ այնքան է օգնել: Անխոս, ես սիրահարված եմ նրան»,- Փիրս Մորգանի հետ զրույցում ասել է Ռոնալդուն՝ պատասխանելով ընկերուհու հետ ամուսնության վերաբերյալ հարցին և հավելել, որ մի օր անպայման կամուսնանա Ռոդրիգեսի հետ:

«Դա նաև մորս երազանքն է»,- հայտնել է ֆուտբոլիստը և հավելել. «Նա (Ռոդրիգեսը) իմ ընկերն է: Ես նրա առջև բացել եմ սիրտս, ու նա նույնն է արել»:

Միևնույն հարցազրույցի ընթացքում Կրիշտիանու Ռոնալդուին ցուցադրել են հանգուցյալ հոր մասնակցությամբ տեսանյութ, որը դիտելիս ֆուտբոլիստը չի կարողացել զսպել արցունքները։

Հարցազրույցի ընթացքում հաղորդավարը Ռոնալդուին 2004 թվականին՝ հոր մահից մեկ տարի առաջ արված և միայն վերջերս բացահայտված կադրեր է ցույց տվել, որտեղ ֆուտբոլիստի հայրը հպարտությամբ նորվեգական մամուլին պատմում է Ռոնալդուի ձեռքբերումների մասին:

«Երբեք չէի տեսել այս կադրերը»,- արտասվելով հայտնել է ֆուտբոլիստը։

Մորգանի այն հարցին, թե ինչն է նրան այսպիսի հուզականությամբ լցնում, ֆուտբոլիստը պատասխանել է․ «Այն, որ հայրս չի տեսնում իմ հաջողությունները»։

«Ընտանիքս, մայրս, եղբայրներս, նույնիսկ ավագ որդիս, բացի հորիցս․․․ Նա չհասցրեց տեսնել»,- հայտնել է «Յուվենտուս»-ի աստղը և խոստովանել․ «Ես իմ հորը մինչև վերջ չեմ ճանաչել։ Նա հարբեցող էր։ Նրա հետ երբեք իրական զրույց չեմ ունեցել»։