ԲԴԽ նախագահ Ռուբեն Վարդազարյանն իր օգնականին ցանկանում է դատավոր դարձնել

Բարձրագույն դատական խորհրդի նախագահ Ռուբեն Վարդազարյանը զբաղված է իր երկարամյա օգնականին Երևանի ընդհանուր իրավասության դատարանի դատավոր դարձնելու գործով:

Tert.am-ի տեղեկություններով Ռուբեն Վարդազարյանը իշխանություններին խոստացել է ձևավորել «անկախ» դատական համակարգ և ցանկանում է իրեն ենթարկվող դատավորներ ունենալ բոլոր ատյաններում՝ նոր իշխանությունների մոտ իր դիրքերն ամրապնդելու համար: Այդ նպատակով արդեն դատավորների հայտացուցակում է Ռուբեն Վարդազարյանի երկար տարիների օգնական Հասմիկ Ջամալյանը:

Դատավորների թեկնածուների ցուցակի քաղաքացիական մասնագիտությամբ բաժինը համալրելու նպատակով անցկացված որակավորման գրավոր քննությանը մասնակցած հավակնորդներից հարցազրույցի փուլ են անցնում գրավոր քննության նվազագույն անցողիկ միավոր (60) հավաքած թվով 11 հավակնորդներ:

Հասմիկ Ջամալյանը ստացել է 62 միավոր: Նրանից ցածր ստացել է մեկ հավակնորդ՝ 60 միավոր: Ի դեպ, նա նաև ՀՀ հատուկ քննչական ծառայության խոշտանգումների և մարդու դեմ ուղղված հանցագործությունների քննության վարչության հատկապես կարևոր գործերի ավագ քննիչ Նիկոլայ Բարսեղյանի կինն է: