«Հարսանեկան խառնաշփոթ» ֆիլմի դիզայները մեկնաբանել է Մեգան Մարքլի և ֆիլմում Ջենիֆեր Լոպեսի կրած հարսանեկան զգեստների նմանության մասին ասեկոսեները (լուսանկարներ)

Անցյալ տարի Մեծ Բրիտանիայի արքայազն Հարիի և Մեգան Մարքլի ամուսնությունից հետո երկրպագուները սկսեցին համեմատություններ տանել Մեգանի և 2001 թվականին նկարահանված «Հարսանեկան խառնաշփոթ» (The Wedding Planner) ռոմանտիկ կատակերգությունում Ջենիֆեր Լոպեսի կրած հարսանեկան զգեստների միջև և մատնանշել դրանց ակնհայտ նմանությունը, գրում է Insider-ը:

Ֆիլմի զգեստների դիզայներ Փեմ Չիլթոնը վերջերս տված հարցազրույցում, անդրադառնալով այդ խոսակցություններին, հայտնել է, որ իր կարծիքով՝ Մարքլը կարող էր ոգեշնչված լինել ֆիլմում Ջենիֆերի կրած զգեստից:

«Ինձ շատ նամակներ են ուղղում Մեգան Մարքլի հարսանեկան զգեստի վերաբերյալ: Միշտ պատասխանում եմ՝ «Վստահ եմ՝ զուգադիպություն է», թեև ֆիլմը թողարկվել է այն ժամանակ, երբ նա իր պատանեկան տարիքում էր, ուստի գուցե ընկերուհիների հետ դիտել է այն»,- Glamour ամսագրին տված հարցազրույցում հայտնել է դիզայները:

The Wedding Planner ֆիլմը թողարկվել է 2001 թվականին, երբ Մեգանը 19 տարեկան էր, գրում է աղբյուրը: Գլխավոր դերերում հանդես են գալիս հոլիվուդյան դերասանուհի, երգչուհի Ջենիֆեր Լոպեսը և Մեթյու ՄքՔոնախին:

Սասեքսի դքսուհու Givenchy նորաձևության տան հարսանեկան զգեստը քննադատությունների էր արժանացել նաև չափազանց «պարզ ու հասարակ» լինելու համար:

Չիլթոնի համոզմամբ՝ հարսանեկան զգեստը պարտադիր չէ փքուն, ժանյակավոր ու արքայադստեր զգեստների նման լինի: