«Պաշտպանության կողմը ոչ թե պետք է դժգոհի, այլ գոհ լինի, որ դատախազը թերի նյութեր է բերել». տուժող կողմն առարկեց Պետրոս Պետրոսյանի բացարկի միջնորդությունը

Ռոբերտ Քոչարյանի և մյուսների գործով դատական նիստում շարունակվում է դատախազ Պետրոս Պետրոսյանին բացարկ հայտնելու միջնորդության քննությունը:

Տուժող կողմի ներկայացուցիչներն առարկեցին պաշտպանական կողմի ներկայացրած միջնորդությունը:

Տիգրան Եգորյանը, տուժող կողմի ներկայացուցիչների միջնորդությանն անդրադառնալով, նշեց, որ ինչպես ինքն է հասկանում, հիմնական առանցքային հարցն այն էր, որ դատախազական ինստիտուտը պարտականությունները կատարելիս կատարյալ ձախողվել է: «Պաշտպանական կողմը պնդում է, թե պարոն Պետրոսյանը թույլ է տվել խախտումներ և ձախողվել է: Այդ ձախողումը, ինչպես իրենք ներկայացնում են, ըստ էության, վերաբերում է դատախազի կողմից իրենց պաշտպանյալին արդարացնող մեղսագրված մեղադրանքը հերքող ապացույցներ ձեռք չբերելուն, երկրորդ՝ թաքցնելուն»,- ասաց նա և հավելեց.

«Ի վերջո, դատախազը դատարանում դառնում է դատավարության կողմ, այն գործառույթների մի մասը, որոնք նա նախաքննության ընթացքում հսկողության շրջանակներում կրում էր, փոխակերպվում են որոշակիորեն: Սկսած մեղադրանքի եզրակացությունը հաստատելու պահից՝  Դատախազությունը հստակ դիրքավորվում է մեղադրանքը պաշտպանելու կողմում, և այս առումով օբյեկտիվության տեսանկյունից դատախազի վարքագիրծը կասկածի տակ դնելը ինձ համար հասկանալի չէ»:

Ըստ նրա՝ պաշտպանության կողմը ոչ թե պետք է դժգոհի, այլ գոհ լինի, որ դատախազը թերի նյութեր է բերել, քանի որ, ըստ էության, մեղադրանքը չի կարողանալու արդյունավետորեն պաշտպանել մեղադրանքը: «Ներկայացված հիմքերը իրականում որևէ արժանի փաստարկ չեն դատախազին բացարկ հայտնելու»,- նշեց նա:

Սեդա Սաֆարյանն էլ անդրադարձավ պաշտպանական կողմի փաստաբանների միջնորդություններին և համարեց, որ միջնորդությունները հիմնավոր չեն: Նրա կարծիքով՝ մեղադրանքի կողմը բավարար ապահովել է իր մեղադրանքի ծավալը և եթե պաշտպանության կողմը գտնում է, որ տարբեր անձինք չեն հարցաքննվել, և նրանց հարցաքննելու կարիք կա, դա բացարկի միջնորդության հետ կապ չունի:

Դիմելով դատարանին՝ նա ասաց. «Դուք նախորդ դատական նիստին թույլ տվեցիք, որ Ալումյանը դատարանները շրջափակելը համարի սարսափազդու մի դեպք։ Ես ուզում եմ ասել հետևյալը. այն, ինչը ժողովուրդն արել է դատարանների հետ կապված, շատ ավելի լավ է, քան «Չերյոմուխա» կրակելը, քաղաքի կենտրոնում փշալարեր դնելն ու զոհեր ունենալը»:

Նա առարկեց Պետրոս Պետրոսյանին ներկայացված բացարկի միջնորդությունը։