«Եթե ես չլինեի, Հոնկոնգը 14 րոպեի ընթացքում գետնին կհավասարվեր». Թրամփը հայտարարել է, որ անձամբ է խնդրել Սի Ցզինփինին զորք չմտցնել Հոնկոնգ

ԱՄՆ նախագահ Դոնալդ Թրամփը հայտարարել է, որ Չինաստանի «մեկ միլիոն զինվորները» չեն մտնում Հոնկոնգ հատուկ վարչական շրջան միայն այն պատճառով, որ նա ՉԺՀ ղեկավար Սի Ցզինփինին անձամբ է խնդրել նման բան չանել, գրում է CBS News-ը։

«Եթե իմ գործոնը չլիներ, Հոնկոնգը 14 րոպեի ընթացքում գետնին կհավասարվեր։ Նա (ՉԺՀ ղեկավարը) մեկ միլիոն զինվոր էր տեղակայել Հոնկոնգի մոտակայքում։ Նրանք ոչ մի գործողություն չիրականացրին, քանզի ես զանգահարեցի նրան և ասացի․ «Խնդրում եմ՝ չանես նման բան։ Դու մեծ սխալ թույլ կտաս, որը մեծապես կազդի առևտրային գործարքի վրա»»,- ասել է ԱՄՆ նախագահը։

Չինաստանն ու ԱՄՆ-ն 16 ամիս շարունակ «առևտրային պատերազմի» մեջ են։ Երկրները բազմիցս սահմանել և բարձրացրել են միմյանց ապրանքների համար առևտրային մաքսատուրքերը։ Համաշխարհային խոշորագույն տնտեսությունների միջև «առևտրային պատերազմը» մեծապես ազդել է նաև ընդհանուր տնտեսական աճի վրա:

Բողոքի զանգվածային ցույցերը Հոնկոնգում սկսվել էին հունիսի սկզբին՝ արտահանձնման մասին օրենքում փոփոխություններ մտցնելու իշխանությունների որոշման պատճառով: Եթե փոփոխություններն ընդունվեն, ապա դա թույլ կտա Հոնկոնգին կասկածյալներին հանձնել Չինաստանի մայրցամաքային հատվածին, Թայվանին, Մակաոյին, որոնց հետ շրջանը չունի արտահանձնման մասին համաձայնագրեր:

Օրինագծի հակառակորդները մտահոգված են, որ օրենքում հնարավոր փոփոխությունները թույլ կտան Չինաստանի մայրցամաքային հատվածին հանձնել ոչ միայն կոռումպացված չինացի չինովնիկներին, այլև պաշտոնական Պեկինի վարած քաղաքականությանը դեմ ակտիվիստներին: Օրենքի ընդունումը ժամանակավորապես կասեցվել է Հոնկոնգի իշխանությունների կողմից:

Վերջին օրերին Հոնկոնգում կրկին սրվել են բախումները, ցուցարարները փոխել են մարտավարությունը և սկսել են օկուպացնել համալսարանների տարածքները: Անվտանգության նկատառումներով բոլոր ուսումնական հաստատությունները փակվել են. Հոնկոնգում արդեն մի քանի օր շարունակ երթևեկությունը կաթվածահար է, ցուցարարները բազմահազարանոց երթերից անցել են ճանապարհների, թունելների և կամուրջների արգելափակմանը: