Ես հակված եմ մնալու ավագանիում. եթե անգամ չմնամ, շարունակելու եմ բացահայտել Երևանի քաղաքապետարանի կոռուպցիոն ռիսկերը. Դավիթ Խաժակյան (տեսանյութ)

Իմ ցանկացած դիրքորոշում ես նախապես քննարկում եմ կուսակցությունում, խորհրդակցում Էդմոն Մարուքյանի հետ, դա վերաբերում է նաև Երևանի ավագանիում իմ գործունեության նպատակահարմարության հարցին: «Արմնյուզ» ՀԸ «#ՕրաԽնդիր» հաղորդմանը նման կարծիք է հայտնել Երևանի ավագանու «Լույս» խմբակցության ղեկավար Դավիթ Խաժակյանը:

«Մանդատը վայր դնել-չդնելու հարցով որոշում դեռևս չկա, քննարկման առիթն ավագանու վերջին նիստն էր, երբ մեր փաստարկները ստվերվեցին: Մենք խմբակցությունում պայմանավորվել ենք, որ երբ թեմա ենք բացում, պիտի թիրախային լինենք, ոչ թե աջուձախ ընկնենք: Ես իմ կուսակցությունից ցուցում եմ ստացել, որ պետք չէ շարունակել, օրինակ, «քուանշի» ոճում, և այդ նկատառումն ընդունել եմ»:

Խաժակյանը բացառել է, որ Երևանի ավագանու կազմից իր հնարավոր հեռացումը Էդմոն Մարուքյանի նկատմամբ Նիկոլ Փաշինյանի ճնշման արդյունք է. «Գուցեև իմ բացթողումը կա, որ այդ խնդիրը խմբակցության ներսում չի կարգավորվել: Մենք բազմիցս քննարկումներ ենք ունեցել, որ մեր գնահատականներում պետք է զսպվածություն ցուցաբերենք, քանի որ մեր իմքայլական գործընկերները դիմում են սադրանքների»:

Դավիթ Խաժակյանի պնդմամբ՝ ԼՀԿ-ում տեսակետ կա, որ կուսակցության անվան նմանությունը «Լույսին» մարդկանց ստիպում է մտածել, թե Թեհմինա Վարդանյանն ու Անի Խաչատրյանն էլ են ԼՀԿ-ից, ու նրանց կոշտ արտահայտությունների հարցով շատերը դիմում են Էդմոն Մարուքյանին. «Կայացվելիք որոշումը պետք է բխի երևանցիների շահերից: Ավագանու մանդատը թանկ է տրվել, այն արժեքավոր է: Ես հակված եմ մնալու խմբակցության և ավագանու կազմում: Ամեն դեպքում, ես Էդմոն Մարուքյանի հետ համաձայն եմ, որ հանրային արձագանքը խոչընդոտում է իմ գործունեությանը»:

Ավագանու անդամը բացառում է ԼՀԿ-ից դուրս գալը, քանի որ Էդմոն Մարուքյանն ամբողջապես սատարում է իր գործունեությունը. «Ավագանիում մնամ, թե ոչ, շարունակելու եմ բացահայտումներ անել քաղաքապետարանի կոռուպցիոն գործարքների մասին: Ներքուստ զայրույթ եմ ապրում, երբ տեսնում եմ, որ այդ կոռուպցիան քաղաքային իշխանությունում շարունակվում է»:

Դավիթ Խաժակյանն ասել է, որ կենթարկվի կուսակցության խորհրդի կայացրած ցանկացած որոշման: «Որոշում կայացնելիս պետք է լինի այնպիսի հանգամանքների համակցություն, որ համոզված լինենք՝ իմ գործունեությունն ավելի արդյունավետ կլինի ավագանու կազմում կամ դրանից դուրս: Երբ ես ջանք եմ գործադրում, որ ինչ-որ թեմա լուսաբանենք, բայց ընթացքում բուն նյութը կորում է, և մարդիկ այլ բանի վրա են կենտրոնանում, գուցե պետք է վերանայո՞ւմ անել: Ես այսպես թե այնպես ապօրինությունների մասին բարձրաձայնելու եմ»,- ամփոփել է Երևանի ավագանու «Լույս» խմբակցության ղեկավարը:

Դավիթ Սարգսյան