Մենք ոչ թե վախենում, այլ հակառակը՝ խնդրում ենք, որ մրցույթ հայտարարեն, իսկ մեզ շանտաժների մեջ մեղադրող ԿԳՄՍ նախարարը թող մտածի՝ ինքն աշխատելու է, թե ոչ. Կարեն Վարդանյան (տեսանյութ)

Մենք ոչ թե փախչում ենք մրցույթից կամ վախենում ենք, այլ հակառակը՝ խնդրում ենք՝ մրցույթ հայտարարեք: Երկրորդ՝ պահանջում ենք հետաքննել ստեղծված իրավիճակը և պարզել՝ ԵՄ-ԿԳՄՍ նախարարություն-«Թումո» եռյակի կողմից եղել է՞ կոռուպցիոն գործարք, ինչի պատճառով 2020թ. բյուջեով գումար չի նախատեսվում «Արմաթ» լաբորատորիաների ներդրմանը:

Այս մասին Tert.am-ի հետ զրույցում ասաց «Ինֆորմացիոն տեխնոլոգիաների ձեռնարկությունների միության» (ԻՏՁՄ) գործադիր տնօրեն Կարեն Վարդանյանը:

Նրա խոսքով՝ 2019թ. հուլիսի 4-ի՝ ՀՀ կառավարության նիստին ԿԳՄՍ նախարար Արայիկ Հարությունյանը հայտարարել է, որ 2020թ. հանրակրթական դպրոցներում տեղադրվելու է 650 «Արմաթ» լաբորատորիա:

«Դեկտեմբերի 30-ին նամակ եմ ստանում, որ լաբորատորիաների ներդրման հարցը կքննարկվի 2021թ. բյուջեի շրջանակում: Դրա համար մենք խնդիրը բարձրաձայնեցինք և ասացինք, որ նախարարության ներսում նկատում ենք սաբոտաժային երևույթներ»,- ասաց նա:

Կարեն Վարդանյանը նշում է, որ այս տարվա ընթացքում 650 լաբորատորիաների ներդրումն իրականացնելու համար պետք է առնվազն հունվար-փետրվար ամիսներին մրցույթը հայտարարվի:

«Մեզ մեղադրում են, որ ուզում ենք միանձնյա անել, բայց մենք ուզում ենք այս տարի ավարտել, որովհետև Հայաստանն առաջնային խնդիր ունի՝ հաղթելու համաշխարհային մրցավազքում: Երբ մենք մեկ տարի ուշացնում ենք, մեկ այլ երկիր դա անում է, մենք հետ ենք մնում: Հիմա մենք պահանջում ենք՝ հունվար, ամենաուշը փետրվարին մրցույթ հայտարարեն: Մենք մրցույթից չենք վախենում, այլ հակառակը՝ խնդրում ենք, մրցույթ հայտարարեք»,- նշեց նա:

2020թ. բյուջեում նոր լաբորատորիաների ստեղծման համար գումար չհատկացնելու հարցում Կարեն Վարդանյանը տեսնում է ԿԳՄՍ նախարար Արայիկ Հարությունյանի շահագրգռվածությունը: Նրա խոսքով նախարար Հարությունյանը ««Թումոյի» հետ գործարք մեջ է» և ցանկանում է շարունակել կենտրոնի հետ համագործակցությունը:

««Գործարքի մեջ են «Թումոյի» հետ, և քանի որ «Թումոն» պատրաստ չէ 2020թ. մրցույթին՝ ուզում են, որ նրանք հաղթեն մրցույթը, այս տարվա բյուջեից հանել են ծրագիրը, որպեսզի 2021թ. այդ «Թումոն» պատրաստ լինի և նոր հայտարարեն մրցույթ»,- ասաց ԻՏՁՄ գործադիր տնօրենը:

Կարեն Վարդանյանի տեղեկացմամբ՝ 2018-ին Եվրամիությունը 23 մլն եվրո է տրամադրել կառավարությանը՝ դպրոցներում ինժեներական կրթության զարգացման համար, որը նպատակային չի ծախսվել:

«Այդ 23 մլն եվրոյից 12.5 միլիոնը նախարարության համաձայնությամբ տրվել էր «Թումոյին»՝ նոր շենք կառուցելու համար: Գումարը տրամադրելու հիմնավորումները խախտումներով են, այսինքն՝ գործընթացը եղել է ապօրինի: Գումարը, որը գալիս է Հայաստան ինժեներական կրթություն զարգացնելու համար, գնում է շենք սարքելուն: Ըստ էության, տեղի է ունենում գործարք ԿԳՄՍ նախարարության, ԵՄ-ի և «Թումոյի» միջև, հիմա այստեղ կոռուպցիոն ռիսկ կա՞, թե՞ ոչ: Մնացած 10.5 մլն եվրոն էլ տվել են ինժեներական կրթության չափորոշիչները որոշելու համար, որի հետքերը չկան, պատկերացում չունենք, թե այդ գումարը որտե՞ղ է ծախսվում և ովքեր են իրականացնում»,- նշեց նա:

«Ինֆորմացիոն տեխնոլոգիաների ձեռնարկությունների միությունը» պատրաստվում է դիմել վարչապետին՝ խնդրելով դրամաշնորհի ծախսման հարցը հետաքննելու համար ներգրավել Վարչապետի վերահսկողական ծառայությանը, ինչպես նաև պատրաստվում են դիմել՝ Կոռուպցիայի կանխարգելման հանձնաժողով և Եվրոպական ոստիկանություն:

«2011թ. ՊՆ-ի հետ «քյալլա ենք տալիս», փոխնախարար Միրզաբեկյան Ալիկին հանեցին, գլխավոր շտաբի պետ Մովսես Հակոբյանին հանեցին, որովհետև մենք այդ հարցերը բարձրաձայնել ենք անցած իշխանության ժամանակ: Ասեմ, որ անցած իշխանությունն էլ միանգամից չէր ազատում, մենք բարձրաձայնում էինք, հետո գալիս էր պահը, հասկանում էին, որ չեն կարող այդ մարդկանց ծածկել, փոխում էին: Հիմա նույն իրավիճակը ԿԳՄՍ նախարարի հետ է: Արայիկ Հարությունյան ասում է՝ «շանտաժները չեն աշխատելու», ինքը պետք է մտածի՝ ինքն աշխատելու է, թե չի աշխատելու, ոչ թե շանտաժն աշխատելու է կամ թե ոչ»,- ասաց Կարեն Վարդանյանը:

Հունվարի 22-ին Կառավարություն – Ազգային ժողով հարցուպատասխանին ԿԳՄՍ նախարար Արայիկ Հարությունյանը բացի շանտաժի մասին հայտարարությունից, ասաց, որ 2020թ. նոր լաբորատորիաների ստեղծմանը գումար չտրամադրելու պատճառը նաև «Արմաթ»-ների արդյունավետության ստուգումն է:

Կարեն Վարդանյանը հակադարձում է՝ «Արմաթ» լաբորատորիաների ստուգում նախարարությունն իրականացրել է, բայց չի բարձրաձայնում: Նա ենթադրում է, որ նախարար Հարությունյանն այդ մասին Կառավարություն չի զեկուցում:

«2014 թ. գործում է, պետությունն արդեն միլիարդներ է ծախսել և հիմա նոր որոշում են արդյունավետությունը: Ընդ որում, ստուգել են, 7 հիմնարկների հարցում է արվել «Արմաթի» արդյունավետության վերաբերյալ, դրանցից 6-ը ասել են՝ հոյակապ ծրագիր է, 7-րդը՝ Մանկավարժական համալսարանը, ասել է, որ թարգմանված ծրագրեր եք օգտագործում, ճիշտ կլինի օրիգինալ անգլերենն օգտագործեք: Աշոցքի գյուղում երեխային ես ինչպե՞ս անգլերեն սովորեցնեմ, երբ նա նոր պետք է հայերեն միջավայրում ծրագրավորում սովորի, հետո ցանկություն ունենա անգլերեն սովորելու»,- նկատեց նա:

«Արմաթ» լաբորատորիաների արդյունավետության չափումն իրականացրել է հենց ԻՏՁՄ-ն՝ գործառույթը պատվիրակելով միջազգային հայտնի կազմակերպության:

«90 տոկոսից ավելին համալսարան է գնում, 88 տոկոսը գնում է բնագիտական ուղղությամբ, 44 տոկոսն աշխատում է՝ 18-19 տարեկան երեխաներ, նրանց միջին աշխատավարձը 130 հազար դրամ է՝ կես դրույքի համար: Եվ դրանցից 12 տոկոսը ընդգրկված են նորաստեղծ ընկերություններում: Նման ցուցանիշ որևէ Արևմտյան համալսարան չունի, որ 12 տոկոսը լինեն ստարտափների հիմնադիրներ»,- ասաց Կարեն Վարդանյանը: