Կան նախկին պաշտոնյաներ, որոնց պատճառով երկար տարիներ հայաստանյան գրանցումով ինքնաթիռներն աֆրիկյան երկրներում ներգրավված են եղել ապօրինի գործունեության մեջ. Փաշինյանը՝ քաղավիացիայի խնդրի մասին

Քաղավիացիայի կոմիտեն չի կարող զրկվել լիցենզիայից, դա նույնն է, որ ասես կառավարությունը զրկվել է լիցենզիայից, քաղավիացիան օտարերկրյա կազմակերպության կողմից չի լիցենզավորվում: Այս մասին հայտարարեց ՀՀ վարչապետ Նիկոլ Փաշինյանը՝ ֆեյսբուքյան օգտատերերի հարցերին պատասխանելիս:

«Այո, քաղաքացիական ավիացիայի ոլորտում ունենք պրոբլեմներ, մեր ավիաընկերությունները զրկվել են Եվրոպա չվերթներ կատարելու իրավունքից, և շահարկողներն իզուր են շահարկում: Որ խոսում էի պետական մարմինների սաբոտաժի մասին, սա այդ սաբորտաժի դեպքերից մեկն է»,- ասաց նա:

Փաշինյանը հիշեցրեց՝ Կապանի իր ասուլիսին խոսել է քաղավիացիայի գործունեության մասին. «Կան նախկին պաշտոնյաներ, որոնց գործունեության հետ կապված հիմա քրեական գործ է հարուցվել: Նրանց հանցավոր անփութության պատճառով երկար տարիներ հայաստանյան գրանցումով ինքնաթիռներն աֆրիկյան երկրներում ներգրավված են եղել ապօրինի գործունեության մեջ, զենքերի վաճառքի մեջ: Դա կապ է ունեցել հայաստանյան, ենթադրաբար, կոռումպացված շրջանակների հետ: Այս փաստերի հետ կապված զանգեր են եղել, և քաղավիացիայի պաշտոնյաների կողմից ենթադրվող կոռուպցիոն պատճառներով դրանք թաքցվել են քաղաքացիական ավիացիայի կոմիտեի ղեկավար Տաթևիկ Ռևազյանից և կառավարությունից: Այս ամեն ինչի արդյունքում է տեղի ունեցել այս պատմությունը»,- ասաց նա:

Վարչապետը նշեց՝ ամենևին չի տխրում այս իրավիճակից, որովհետև սրանով գիծ կքաշեն և կհասկանան, որ ավիացիոն կառավարման պատկերացումները, որ երկար տարիներ եղել են Հայաստանում, դրանք ուղղակի անընդունելի են. ՀՀ ավիացիան պետք է համապատասխանի ամենաբարձր չափանիշներին:

Փաշինյանը նաև տեղեկացրեց, որ եվրոպական կառույցը մի փոքր կանոններից շեղվել է. «Մայիսին պետք է տեղի ունենար քննարկում, որի արդյունքում կայացվեր որոշումը, բայց անհասկանալի պատճառով այդ որոշումը կայացվել է հիմա, և մեր քաղավիացիայի կոմիտեն հիմա բողոքարկել է, որովհետև այդ պրոբլեմներով մենք սկսել ենք զբաղվել մի քանի ամիս առաջ, որովհետև էդ պետական համակարգի որոշ պաշտոնյաների սաբոտաժի արդյունքում եղել են պաշտոնանկություններ, քրեական գործ է հարուցված. այնպես որ շահարկողները իզուր են շահարկում, որովհետև դա իրենց գործունեությանն է վերաբերում»,- ընդգծեց նա: