Ալեն Սիմոնյանի և Արթուր Դանիելյանի միջև գրանցված միջադեպով ՀՔԾ-ում հարուցվել է քրգործ` խուլիգանության ու առողջությանը թեթև վնասվածք պատճառելու հոդվածներով

17:32 • 08.05.20

Հատուկ քննչական ծառայությունում հարուցվել է քրեական գործ ՀՀ ԱԺ փոխնախագահ Ալեն Սիմոնյանի և «Ադեկվադ» միաբանության համահիմնադիր Արթուր Դանիելյանի հաղորդումների առթիվ:

Այս մասին Tert.am-ի հարցմանն ի պատասխան հայտնեց Հատուկ քննչական ծառայության մամուլի քրատուղար Մարինա Օհանջանյանը:

«Նշված անձնանց հաղորդումների առիթվ նախապատրաստված նյութերի հիման վրա ՀՀ հատուկ քննչական ծառայությունում ՀՀ քրեական օրենսգրքի 258-րդ հոդվածի 2-րդ մասի և 117-րդ հոդվածի հատկանիշներով հարուցվել է քրեական գործ: Կատարվում է նախաքննություն»,-ասաց Օհանջանյանը:

Նշենք, որ ՔՕ-ի 117-րդ հոդվածը սահմանում է՝ դիտավորությամբ առողջությանը թեթև վնաս պատճառելը, իսկ 258-րդ հոդվածի 2-րդ մասը սահմանում է՝ խուլիգանություն, որը կատարվել է անձի նկատմամբ բռնություն գործադրելով:

Հիշեցնենք, որ Ալեն Սիմոնյանի և Արթուր Դանիելյանի միջև ապրիլի 29-ին միջադեպ էր տեղի ունեցել: Ավելի ուշ Ալեն Սիմոնյանը հայտնել էր, որ ինքը բարևել է Արթուր Դանիելյանին, վերջինս ի պատասխան վիրավորել է իրեն, ինչից հետո ինքը գլխով հարվածել է նրան: