Մայիս և հունիս ամիսներին մայրապետերին պարգևավճար չեն տվել, տրամադրված սնունդն էլ ուտելու ենթակա չէ.«Նորք» ինֆեկցիոնի մայրապետ

«Նորք» ինֆեկցիոն կլինիկական հիվանդանոցի մայրապետ Անահիտ Թոխյանը Tert.am –ի հետ զրույցում նշում է, որ համավարակով պայմանավորված աշխատանքի ծանրաբեռնվածության հետ մեկտեղ մայրապետերը մայիս և հունիս ամիսներին պարգևավճար չեն ստացել, մինչդեռ բուժանձնակազմի մյուս աշխատակիցները ստացել են:

«Ինչո՞ւ պետք է մայրապետերը մայիս և հունիս ամսվա հավելավճարներից զրկվեն, ես ավելի շատ եմ կովիդով հիվանդների հետ աշխատում, բայց մեզ մարդ չեն համարում  ու չեն վճարում: Միայն մարտ և ապրիլ ամիսներին ենք  պարգևավճար ստացել: Բացի այդ, աշխատավարձը տալիս են ուշացումով 20-22-ից հետո և չեմ կարողանում իմ վարկային պարտավորություները վճարել:

Ես ցանկանում եմ, որ իմ աշխատավարձը ժամանակին տան, առաջ վճարում էին մինչև ամսի 10-ը, վերջին 5-6 ամիսներին աշխատավարձերն ուշացնում են: Եթե հիվանդանոցը վերանորոգում է անում, դա պե՞տք է անդրադառնա մեզ վրա: Կովիդով հիվանդի աշխատողը պետք է ստանա չոր աշխատավարձ, իսկ հաշվապահը, մյուսները ստանան պարգևավճա՞ր»,-նշեց նա:

Անահիտ Թոխյանի խոսքով՝ խնդրի վերաբերյալ դիմել են «Նորք» ինֆեկցիոն կլինիկական հիվանդանոցի տնօրինությանը, սակայն իրենց պարզաբանել են, որ նախարարության որոշման համաձայն՝ մայիս և հունիս ամիսներին հավելյալ գումար չի տրամադրվելու.

«Մայիս ամսին բողոքել ենք տնօրինությանը և ասեցին, որ բարձրացրել են քույրերի աշխատավարձերը: Հիմա էլ ցանկանում են, որ մենք պայմանագիր կնքենք, որ ոչ մեկս ոչ մի հավելավճար չենք ստանալու, միայն կոնկրետ գումար ենք ստանալու: Տնօրինությունից ասում են, որ նախարարը նշել է, որ մայրապետերին գումար չի փոխանցվում: Սակայն մենք համոզված չենք, որ նման բան է ասվել»:

Մայրապետը նշեց, որ թեև աշխատողներին  տրամադրվում է անվճար սնունդ, սակայն այդ սննդից դժգոհ են և՛ աշխատողները, և՛ հիվանդները.

«Դա ուտելու ենթակա չէ: Նույն սնունդը տալիս են նաև հիվանդներին, նրանք մեզ բողոքում են՝ ասում են՝ թույլ տվեք մեզ տանից սնունդ բերենք, սոված ենք մնում, բոլորին ասել են այդ մասին, բայց ոչինչ չի արվում»:

Խնդրի պարզաբանման համար Tert.am-ը կապ հաստատեց «Նորք» ինֆեկցիոն կլինիկական հիվանդանոցի տնօրինության հետ, այնտեղից մեզ տեղեկացրեցին, որ խնդիրը տնօրինության հետ չի քննարկվել, և տնօրենը խնդրին տեղյակ չէ: