Ոչ միայն չեն կարողանում վերահսկել ձկնագողությունը, այլև հասարակությանն են հորդորում, որպեսզի շուկաներում վերահսկեն սիգի վաճառքը․ Վ․Վարագյանը՝ Ռ․ Պետրոսյանի հայտարարության մասին
Զավեշտալի է, որ Ռոմանոս Պետրոսյանն ասում է, որ սիգի արդյունագործական նպատակով վաճառքի բնաօգտագործման վճարը սահմանվել է 65 դրամը և օրինակ է բերում, թե տարբեր մասնավոր ջրավազաններում իշխանի բուծումն ու վաճառքը 2000 դրամից ավելի է և դժգոհում է, որ սիգի գինը շատ էժան է: Ախր, իրենք են սահմանում վճարը ու չգիտես, թե ումից են դժգոհում: Բացի դա, ոչ միայն չեն կարողանում վերահսկել ձկնագողությունը՝ այդքան մեծ հնարավորություններ ունենալով, հասարակությանն են հորդորում, որպեսզի շուկաներում վերահսկեն սիգի վաճառքը: Այս մասին այսօր Tert.am-ի հետ զրույցում ասաց «Կանաչ ապագա» բնապահպանական հասարակական կազմակերպության անդամ Վահագն Վարագյանը` խոսելով Շրջակա միջավայրի նախարար Ռոմանոս Պետրոսյանի՝ Սևանա լճի խնդիրների վերաբերյալ ասուլիսի մասին:
«Սա քաղաքացիներին տանում է դեպի լարվածությանը, բախմանը, երկբեկվածությանը, քանի որ, եթե պատկերացնենք քաղաքացի, որը պարզապես սիգը վերավաճառում է և մոտենում է մեկ այլ քաղաքացի՝ դժգոհելու, թե ինչու է սիգ վաճառում, քանի որ այն հավանաբար ձկնագողությամբ է շուկայում հայտնվել, ականատես ենք լինելու հասարակության ճեղքման»,- ասաց նա:
Վարագյանի գնահատմամբ՝ Ռոմանոս Պետրոսյանը համակարգից անտեղյակ է։Դիտարկմանը, թե հնարավոր է՝ Ռոմանոս Պետրոսյանը նորընտիր նախարար է և չի հասցրել ծանոթանալ բոլոր խնդիներին, Վարագյանը արձագանքեց՝ նա եղել է քաղաքական ուժի վարչության անդամ և ամբողջ երկրի պետական կառավարման համար պատասխանատու է, որի համար իրավունք չունի անտեղյակ հայտարարություններ անել:
«Լավ, եթե նոր նախարար է, ապա պետք է հայտարարություններից առաջ վերանայի խնդիրները, եթե միացրել է լայվի կոճակն ու սկսել է դժգոհել ինչո՞ւ չի գտել դժգոհելու իրական աղբյուրը: Մենք ականատես ենք լինելու բոլոր այն խոստումների հակառակ պատկերներին: Իբրև Սևանում մաքրման աշխատանքներ են իրականանում, սա իրականում պարզապես նախագիծ է, և առաջիկայում բնապահպանական խնդիրների ավելի սրացումն ենք տեսնելու»,- շեշտեց Վարագյանը և հավելեց, որ Հայաստանի բնապահպանական խնդիրները կլուծվեն այն ժամանակ, երբ 20-30 տարվա ռազմավարություններ մշակվեն և հստակ, արդյունավետ այն ռազմավարությունն իրականացնեն:
Հարցին, թե ինչպե՞ս է ստացվում, որ Պետրոսյանը նախարար ընտրվելու առաջին օրվանից առաջ է բերում միայն Սևանա լճի խնդիրները և բաց են մնում մյուս բնապահպանական խնդիրները, ինչպես օրինակ, Ամուլսարի հարցը, վերջինս պատասխանեց՝ այո, Սևանը մեզ համար ազգային արժեք է, բայց փաստացի, նախարարի այս դիրքորոշումը նման է «Սևանի նախարար» լինելուն, այն էլ այն դեպքում, որ արդյունավետ աշխատանք դեռ չի արձանագրվել և ըստ նրա՝ երբ խոսվում է, թե ափամերձ տարածքները մաքրվում են և քանդվում են տները, պետք է նկատի ունենալ, որ ընդամենը մեկ տնակ է քանդվել:
«Մենք պետք է պահանջենք, որ նախարարը Ամուլսարի և մնացած բոլոր հանքարդյունաբերական, բնապահպանական խնդիրների վերաբերյալ տեսակետ ունենա: Հավանաբար, կարծում են՝ Սևանի հարցը հեշտությամբ կլուծվի և փորձում են Սևանի մասով պոպուլիստական քայլեր անել, սակայն չեն գիտակցում, որ Սևանին փրկելու համար մեծ գիտական մոտեցում է պետք և այն աշխատանքները, որոնք նա կատարում է, պարզապես անբավարար են:
Արդյունագործական ձկնորսությունը պետք է արգելել, սակայն այսօր փաստացի թույլ է տրված 200 տոննայի չափով սիգ որսալ, պետք է այսօր տեսնենք, որ Սևանում մաքրման աշխատանքներ իրականացնող տեխնիկա է կենտրոնացված, սակայն, ցավոք, մենք ոչ միայն դա չենք տեսնում, այլև տեսնում ենք, որ Սևանը հենց լճի վրայից մաքրող սարքը մեկ րոպե չի շահագործվել»,- ամփոփեց նա:










