Հայրենիքի պաշտպանության համար մղվող մարտերում իրենց կյանքը զոհաբերել են ՊԲ 54 մարտիկներ, վիրավորների քանակը ճշտվում է, ունենք բավականին շատ վիրավորներ. Արթուր Սարգսյան (տեսանյութ)

Երեկ ինտենսիվ մարտեր են ընթացել ամբողջ ռազմաճակատով, հակառակորդը շարունակել է գրոհել պաշտպանության բանակի մարտակարգերը՝ կիրառելով ինքնաթիռներ, ուղղաթիռներ, հրթիռահրետանային ողջ զինանոցը՝ օգտագործելով զրահատանկային և հատուկ նշանակության ստորաբաժանումներ. այսօր ասուլիսի ժամանակ նշեց Արցախի ՊԲ հրամանատարի տեղակալ, գնդապետ Արթուր Սարգսյանը:

Նա նշեց, որ մարտական գործողությունների դինամիկան, կիրառված սպառազինությունը և անձնակազմի քանակը աննախադեպ էր հատկապես հյուսիսային և հարավային ուղղություններում: Նրա խոսքով` գիշերվա ընթացքում լարվածությունը մի փոքր թուլացել է, սակայն հրետակոծությունները շարունակվել են անընդմեջ:

«Հակառակորդի խոցված սպայի մոտ հայտնաբերվել է իսրայելական արտադրության «Թադիրա» մակնիշի ռադիոկայան, որի վերծանման արդյունքում պարզվել է, որ նշված ուղղությամբ խմբավորումները ղեկավարվում են արաբերեն:

Երեկ հակառակորդը կորցրել է՝ 39-ը զրահատեխնիկա, 4 ՍՈւ -25  ինքնաթիռ, 3 ՄԻ-24 ուղղաթիռ, 17 ԱԹՍ, անձնակազմի կորուստը շուրջ 830 կարգի է: Ոչնչացվել է նաև հրետանային դիվիզիոն:

Ցավոք սրտի հայրենիքի պաշտպանության համար մղվող մարտերում իրենց կյանքը զոհաբերել են պաշտպանության բանակի 54 մարտիկներ, վիրավորների քանակը ճշտվում է, ունենք բավականին շատ վիրավորներ»,- նշեց Արթուր Սարգսյանը:

Հիշեցնենք, որ սեպտեմբերի 27-ին Ադրբեջանի զինուժը լայնածավալ հարձակում է սկսել Արցախում՝ թիրախավորելով նաև խաղաղ բնակչությանը։ Արցախի զինուժը մինչ այս խոցել էր հակառակորդի 11 ուղղաթիռ, 5 ինքնաթիռ (3-ը Սու–25), 96 անօդաչու թռչող սարք, 184 միավոր զրահատեխնիկա, հիմնականում տանկեր, մեկ ինքնաթիռ, 82 ավտոտրանսպորտ, 10 զրահափոխադրիչ, մեկ «ՏՕՍ-1Ա» ծանր հրանետային համակարգ, 2 «Սմերչ» և 1 «Ուրագան» տիպի համազարկային կրակի ռեակտիվ կայանքներ: Հակառակորդն ունի ավելի քան 1280 զոհ, որից 180–ը Քարվաճառի ուղղությամբ, ավելի քան 2700 վիրավոր։ Հայկական կողմից, նախնական տվյալներով, կա 103 զոհ և մոտ 200 վիրավոր, որոնցից մոտ 120–ն են շարունակում բուժում ստանալ, մյուսներն ապաքինվել և վերադարձել են շարք։ Ադրբեջանի զինված ուժերը թիրախավորել է նաև Արցախի և Հայաստանի Հանրապետության զինվորական և քաղաքացիական ենթակառուցվածքները, որի հետևանքով Վարդենիսի շրջանում սպանվել է 1 քաղաքացիական անձ, Արցախում՝ 7 մարդ։ Ադրբեջանական զինուժի հրետակոծության հետևանքով վիրավորվել են ինչպես արտասահմանյան, այնպես էլ տեղական լրատվամիջոցների լրագրողներ։ Հայաստանում և Արցախում սեպտեմբերի 27-ին հայտարարվել է ռազմական դրություն։