Մշակվում են սխեմաներ, այդ թվում և մոսկովյան հարթակի տրամադրումը Ռուսաստանի, Ադրբեջանի և Հայաստանի ԱԳ նախարարների հանդիպման համար՝ ԵԱՀԿ Մինսկի խմբի համանախագահների մասնակցությամբ. Զախարովա (տեսանյութ)
ՌԴ ԱԳՆ պաշտոնական ներկայացուցիչ Մարիա Զախարովան ամենշաբաթյա ճեպազրույցի ժամանակ անդրադարձել է ԼՂ հակամարտության կարգավորմանը՝ նշելով, որ համապատասխան մեխանիզմներ են մշակվում այդ ուղղությամբ:
«Ռուսաստանն ինչպես ազգային մակարդակով, այնպես էլ ԵԱՀԿ Մինսկի խմբի շրջանակում շարունակում է ակտիվ միջնորդական ջանքեր գործադրել, որոնք ուղղված են Լեռնային Ղարաբաղում և դրա շուրջ ռազմական գործողությունների անհապաղ դադարեցմանը և խաղաղ բանակցային գործընթացի վերականգնմանը՝ առկա հիմնարար սկզբունքների և միջազգային փաստաթղթերի հիման վրա: Ռուսաստանի, ԱՄՆ-ի և Ֆրանսիայի մոտեցման միասնականության վկայությունն են դարձել վերջին շաբաթվա ընթացքում արված համատեղ հայտարարությունները՝ 3 համանախագահ երկրներիի նախագահների կողմից հոկտեմբերի 1-ին և երեք երկրի ԱԳ նախարարների կողմից՝ հոկտեմբերի 5-ին»,- նշել է Զախարովան:
Վերջինս հիշեցրել է, որ ՌԴ նախագահ Վլադիմիր Պուտինը ԼՂ հակամարտության հարցը քննարկել է ՀՀ վարաչապետ Նիկոլ Փաշինյանի, ինչպես նաև Ադրբեջանի նախագահ Իլհամ Ալիևի հետ:
«Իր գործընկերների՝ Ադրբեջանի և Հայաստանի ԱԳ նախարարների հետ մշտական կապի մեջ է Սերգեյ Լավրովը: Մշակվում են գործողությունների տարբեր սխեմաներ, այդ թվում և մեր կողմից առաջարկված մոսկովյան հարթակի տրամադրումը Ռուսաստանի, Ադրբեջանի և Հայաստանի ԱԳ նախարարների հանդիպման համար՝ ԵԱՀԿ Մինսկի խմբի համանախագահների մասնակցությամբ: Խորհրդակցություններ ենք վարում կողմերի հետ այդ ձևաչափում բանակցությունների վերսկսման ժամկետների մասին»,- հավելել է դիվանագետը:
Հիշեցնենք, որ սեպտեմբերի 27-ին Ադրբեջանի զինուժը լայնածավալ հարձակում է սկսել Արցախում՝ թիրախավորելով նաև խաղաղ բնակչությանը։
Հոկտեմբերի 8-ի դրությամբ Արցախի զինուժը խոցել է հակառակորդի՝ 16 ուղղաթիռ, 17 ինքնաթիռ, 145 անօդաչու թռչող սարք, 496 միավոր զրահատեխնիկա, հիմնականում տանկեր, 82 ավտոտրանսպորտ, 10 զրահափոխադրիչ, 4 «ՏՕՍ-1Ա» ծանր հրանետային համակարգ, 4 «Սմերչ» և 1 «Ուրագան» տիպի համազարկային կրակի ռեակտիվ կայանքներ:
Հակառակորդն ունի ավելի քան 4069 զոհ, ավելի քան 5270 վիրավոր։ Հայկական կողմից, նախնական տվյալներով, կա 361 զոհ։ Ադրբեջանի զինված ուժերը թիրախավորել է նաև Արցախի և Հայաստանի Հանրապետության զինվորական և քաղաքացիական ենթակառուցվածքները, որի հետևանքով Արցախում սպանվել է 20 քաղաքացիական անձ, վիրավորվել է 93 քաղաքացիական անձ, վնասվել՝ մոտ 5800 գույք ու ենթակառուցվածք։
Ադրբեջանական զինուժի հրետակոծության հետևանքով վիրավորվել են ինչպես արտասահմանյան, այնպես էլ տեղական լրատվամիջոցների լրագրողներ։ Հայաստանում և Արցախում սեպտեմբերի 27-ին հայտարարվել է ռազմական դրություն։










