Ադրբեջանի տնտեսության մեջ ներդրումներ կատարելը ռիսկային է, այդ երկրում վերջերս օտարերկրյա ներդրումները կտրուկ նվազել են. տնտեսագետ (տեսանյութ)

Եթե մենք դիտարկենք Ադրբեջանի տնտեսությունը, ապա տնտեսագիտական որևէ կանոնի չի ենթարկվում, մենք գործ ունենք թերզարգացած տնտեսական կառուցվածքի հետ: Այս մասին Tert.am-ի հետ զրույցում ասաց տնտեսագետ Թադևոս Ավետիսյանը:

Նրա խոսքով` Ադրբեջանի տնտեսությունն իրենից ներկայացնում է միայն նավթի և գազի արդյունահանում և վաճառք: Նրա խոսքով՝ 48 միլիարդ դոլարի ՀՆԱ-ի 40 տոկոսը միայն նավթի ու գազի արտահանումից է, իսկ տնտեսության մյուս ճյուղերը պարզապես առնչվում են այս ոլորտի հետ: Տնտեսագետի գնահատմամբ՝ այնպես չէր, որ մինչև այժմ Ադրբեջանի տնտեսությունը զարգացման ճանապարհին էր, իսկ պատերազմը պարզապես խոչընդոտ է:

«Այսինքն՝ մեծ հաշվով նույնիսկ մինչև այս պատերազմը չկային այնպիսի ռեսուրսներ, որոնք տնտեսության զարգացմանը պետք է ուղղվեին, որովհետև իրականում այն ֆոնդերը, որոնք ձևավորվել են նավթի վաճառքից, մեր հետազոտությունները և ուսումնասիրությունները ցույց են տալիս, որ ծախսվել են զենք-զինամթերք ձեռք բերելու համար և նախապատրաստվել են պատերազմին, մի մասն էլ ռազմաքաղաքական ղեկավարության կողմից գողացվում է»,- ասաց  տնտեսագետը:

Թադևոս Ավետիսյանի կարծիքով՝ Ադրբեջանի թերզարգացած տնտեսության մեջ այս պատերազմը իր հետքը թողնելու է և արդեն զգացնել է տալիս: Հայաստանն ունի մոտավոր թվեր, թե որքան արժեցավ պատերազմը Ադրբեջանի համար, սակայն այդ թիվը դեռ շարունակում է աճել, քանի որ Հայաստանի զինված ուժերը շարունակում է ոչնչացնել կամ առգրավել Ադրբեջանի ռազմամթերքը:

«Այն երկրները, որոնք հիմնական զենքի մատակարարն են մեր թշնամի պետությանը՝ Թուրքիան, Իսրայելը, Պակիստանը, մեր հետազոտությունները ցույց են տվել, որ նավթի արդյունահանումն այդ երկրներ վերջին 2 պատերազմի նախօրեին պատիկներ անգամ ավելանում է, այսինքն՝ պատիկներ անգամ ավելի շատ զենք են ձեռք բերել և դրա հիմնական մասը ոչնչացվել է կամ ոչնչացվում է»,- ասաց Թադևոսյանը:

Ադրբեջանի տնտեսության մեջ ներդրումներ կատարելն արդեն ռիսկային է, և վերջերս օտարերկրյա ներդրումները կտրուկ նվազել են՝ նկատում է տնտեսագետը: Պատճառը պարզ է, քանի որ 2 հիմնական ուղղության՝ նավթի ու գազի արդյունահանման ոլորտներում ներդրումներն արդեն կատարված են:

«Մյուս ոլորտները չեն զարգանում, քանի որ չկա արդյունավետ ներդրումային միջավայր և աշխարհաքաղաքական բարձր ռիսկերի պարագայում ուղղակի չեն գոյանում օտարերկրյա ներդրումները: Իսկ նավթի ու գազի ոլորտում շատ կարևոր է արձանագրել, որ պատերազմ հրահրելով և սադրելով, այդ երկիրը իր ողնաշարը համարվող հիմնական տնտեսական ուղղության կայուն գործարկումը դնում է հարվածի տակ»,- ասաց Թադևոս Ավետիսյանը։

Մանրամասները՝ տեսանյութում։