Շուշիի մատույցներում մարտերը շարունակվում են. Շուշիի քաղաքապետ

Շուշիում մարտերը շարունակվում են, մաքրման աշխատանքներ են կատարվում։ Այս մասին «Ազատության» հետ զրույցում ասաց Շուշիի քաղաքապետ Արծվիկ Սարգսյանը։

«Գիշերը ռմբակոծվել են մատույցները, որտեղ գտնվում է թշնամին։ Շարժ է նկատվել թշնամու կողմից իրենց բազմաթիվ «պիկապներով», Իսայի աղբյուրի հատվածով, գազի խողովակների կողքով, անձամբ ես եմ այդքանը տեսել, որ շարժվում էին դեպի Իսայի աղբյուր, այդտեղ էլ նրանց ոչնչացրել են»,- ասաց Արծվիկ Սարգսյանը։

Նա ասաց,որ այժմ էլ մարտերը շարունակվում են Շուշիի մատույցներում։ Նրա խոսքով` Շուշիի համար ամբողջ հայությունն է պայքարում, Շուշին մնալու է հայկական ու վերակառուցվելու է կայծակնային արագությամբ։

Արծվիկ Սարգսյանը նաև նշեց,որ Շուշին պատմության մեջ մի քանի անգամ նման հարվածների ենթարկվել ու ոտքի է կանգնել։

Հիշեցնենք, որ սեպտեմբերի 27-ին Ադրբեջանի զինուժը լայնածավալ հարձակում է սկսել Արցախում՝ թիրախավորելով նաև խաղաղ բնակչությանը։ Ադրբեջանի զինված ուժերը թիրախավորել է նաև Արցախի և Հայաստանի Հանրապետության զինվորական և քաղաքացիական ենթակառուցվածքները, որի հետևանքով Գեղարքունիքում զոհվել է 2 քաղաքացիական անձ, Արցախում զոհվել է 50 քաղաքացիական անձ, վիրավորվել է 148 քաղաքացիական անձ։

Ադրբեջանական զինուժի հրետակոծության հետևանքով վիրավորվել են ինչպես արտասահմանյան, այնպես էլ տեղական լրատվամիջոցների լրագրողներ։

Հայաստանում և Արցախում սեպտեմբերի 27-ին հայտարարվել է ռազմական դրություն։ Արդեն երեք անգամ հայտարարվել է մարդասիրական հրադադարի մասին, սակայն ադրբեջանական զինուժը խախտել է այն։