Թուրքիան Ադրբեջանից իր մասնաբաժինն է ուզելու՝ պատերազմում հաղթանակի հարցում օգնելու համար. Էդգար Էլբակյան

11:58 • 23.04.21

Թուրքիան Ադրբեջանի երկրորդ առևտրային գործընկերն է՝ և՛ արտահանման, և՛ ներդրման առումով: Ներդրումների առումով երկրորդն է՝ զիջում է միայն Մեծ Բրիտանիային: Բրիտանիայի դեպքում գործ ունենք «Բրիտիշ Պետրոլիում» նավթային ընկերության հետ, որը նավթագազային սեկտորում ունի ներդրում, եթե դա հանենք, կստացվի, որ Թուրքիան առաջին ներդրողն է Ադրբեջանում. «Հայաստանը և Թուրքիան Հարավային Կովկասում. իրողություններ և ռիսկեր» խորհրդաժողովի ժամանակ կարծիք հայտնեց թուրքագետ Էդգար Էլբակյանը:

Նրա խոսքով՝ Թուրքիայի մասնաբաժինը Ադրբեջանի առևտրաշրջանառության մեջ 2012-2014 թվականներին 6 տոկոս է կազմել, իսկ 2019 թվականին դարձել է 14 տոկոս:

«Թուրքիայի կողմից ներդրումները գերազանցապես արվում են ոչ նավթային սեկտորով: Թուրքիան աջակցում է Ադրբեջանին՝ զարգացնելով սննդի, արդյունաբերության, տեքստիլի, բանկային, շինարարության, արդյունաբերության  և տրանսպորտի ոլորտը: Թուրքիան մուլտիպլիկատիվ էֆեկտ է ստեղծում երկարաժամկետ հեռանկարում Ադրբեջանի  տնտեսության և հասարակության զարգացման համար, իսկ ինչ վերաբերում է Թուրքիայի  ռազմական ներկայությանը Ադրբեջանում, ապա պատերազմից հետո անիմաստ է ապացուցել, որ Թուրքիան Ադրբեջանում ունի նաև ռազմական ներկայություն»,- ընդգծեց նա:

Էկբեկյան խոսքով՝ Թուրքիան շատ է ներխուժել հարավային Կովկաս, և սա չի կարող խնդիր չլիներ Ադրբեջանի համար, և նրանք պետք է փորձեն բալանսավորել դա՝ Ռուսաստանի հետ հարաբերությունների միջոցով.

«Թուրքական ներկայությունը նաև նշանակում է Ռուսաստանին դուրս մղող ներկայություն: Հասկանալի պատճառներով Ադրբեջանի գործող իշխանությունը ունենալու է խնդիրներ, մի կողմից նրանց լեգիտիմությունը կարող է ժամանակի ընթացքում կասկածի տակ դրվել, քանի որ դա կառուցված էր Ղարաբաղի հարցի վրա, իսկ իրենք ասացին, որ Ղարաբաղի հարցը լուծված է, մյուս կողմից ընթանալու է պայքար՝ Թուրքիան իր մասնաբաժինն է ուզելու՝ այդ հաղթանակի հարցում օգնելու համար։ Ռուսաստանը, ունենալով Ադրբեջանի տարածքում դե ֆակտո ռազմական բազա, անընդհատ դրա մասին է հիշեցնելու և փորձելու է դիվիդենտներ քաղել»: