ՔՊ-ի հայցադիմումը ոչ մի կերպ չի կասեցնում Ահարոն Խաչատրյանի լիազորությունների իրականցումը, ոստիկանությունը չպետք է խոչընդոտի նրա լիազորությունների իրականցումը, այլև օժանդակի. փաստաբան

Վարդենիսի ավագանու առաջին նիստը գումարվել է օրենքի ուժով, բոլոր անդամները գրանցվել են նիստին մասնակցելու համար։ Տեղի ունեցած միջադեպի բուն նպատակը ավագանու նիստի խափանումն էր։ Այս մասին Վարդենիսի ավագանու ընդդիմադիր խմբակցությունների մամուլի ասուլիսի ժամանակ, անդրադառնալով Վարդենիսում ՏԻՄ ընտրություններից հետո ստեղծված իրավիճակի իրավական կողմերին, ասաց «Ահարոն Խաչատրյան» դաշինքի շահերը պաշտպանող փաստաբան Վարազդատ Հարությունյանը։

«ՔՊ ներկայացուցիչները սխալ հաշվարկ էին արել, մտածել էին, որ եթե միջադեպ հրահրեն և դրա արդյունքում բերման ենթարկեն Ահարոն Խաչատրյանին, Կարեն Մկրտչյանին կամ որևէ այլ ավագանու անդամի, ապա ավագանու նիստը համարվելու է չկայացած և այն տեղափոխվելու է մեկ այլ օր, երևի ժամանակ շահելու նպատակ ունեին։ Բայց քանի որ ավագանու առաջին նիստը գումարվել է օրենքի ուժով և դրան մասնակցել են բոլոր անդամները, ուստի մինչև համայնքապետի ընտրություն, ավագանու նիստը չի կարող համարվել ավարտված և նշանակվել նոր ավագանու նիստ»,– ասաց նա՝ հավելելով, որ այդ մասին Դավիթ Շահնազարյանը բավականին մանրամասն հայտնել է ավագանու անդամներին, որ նիստը անընդհատ է և այն չի կարող չշարունակվել։

«Նիստի ընթացքում ՔՊ անդամները ներխուժել են նիստերի դահլիճ, հայտարարել, որ այն ինչ տեղի է ունենում ապօրինի է, հայտարարել են, որ իրենց առաջին համարը հիմա համայնքապետարանում չէ, իրենց առաջարկվել է կանչել առաջին համարի ներկայացուցչին, ինչի համար կարող են ժամանակ տրամադրել,  սակայն հրաժարվել են, քաղաքական հայտարարություններ  են արել և նշել, որ սպասում են իրենց փաստաբանին, որը այդպես էլ չեկավ։ Դրան հաջորդել է երդմնակալության համար հրավիրված նիստը, որին ապօրինաբար ոստիկանները խոչընդոտել են, մենք պատրաստել էինք իրավաբանական բնույթի գրություն, որտեղ պարզաբանել էինք ոստիկանության պարտականությունները նիստը ընթացքում և պահանջել ենք ոչ թե խոչընդոտել, այլև ինչպես օրենքն է նախատեսում, օժանդակել ՏԻՄ աշխատանքներին։ Ոստիկանության գործողությունների մասով պատրաստել ենք հայցադիմում և դատարանից պահանջելու ենք ոչ իրավաչափ համարել ոստիկանության գործողությունները և արգելել ոստիկանությանը միջամտել ավագանու աշխատանքներին»,– նշեց նա։ 

Հարությունյանն ասաց, որ ՔՊ կողմից հայցադիմում է ներկայացվել Վարչական դատարան։ «Պահանջում են անվավեր համարել ավագանու առաջին նիստում կայացած համայնքապետի ընտրության որոշումը։ Ելնելով փաստաբանական մարտավարական նպատակահարմարությունից՝ այդ հայցադիմումի բովանդակային մասին չենք անդրադառնա այս պահին։ Բայց պետք է մի փաստ արձանագրել։ Ամսի 3-ին ինչ-որ հայցադիմում է մուտքագրվել դատարան ՔՊ անունից, ոստիկանությունը մեզ ստել է՝ հայտնելով , որ այն վարույթ է ընդունվել, սակայն պարզվել է, որ այն ոչ միայն վարույթ չի ընդունվել, այլևս հետ է ուղարկվել։ Վերադարձման պատճառները մենք չգիտենք, որովհետև դիմում ենք գրել և այդ որոշումը դեռ չենք ստացել։ Բայց եկեք արձանագրենք, որ չի եղել համայնքապետի լիազորությունները կասեցնելու որոշում, ոստիկանությունը ստել է մեզ, բռնի կերպով պատ է կազմել ու չի թողել, որպեսզի ավագանու անդամները մտնեն աշխատավայր։ Այդ հայցադիմումը հետ ուղարկելուց հետո Վարչական դատարան է մուտքագրվել նոր հայցադիմում, դրանից մի քանի ժամ հետո Ահարոն Խաչատրյանը զանգ է ստանում Վարչական դատարանի ինչ-որ աշխատողի կողմից, ով հայտնում է, որ երկուշաբթի օրը որոշում ունի ստանալու։ Երկուշաբթի օրը` ամսի 10-ին, դատարանից ստանում ենք հայցադիմումը վարույթ ընդունելու մասին որոշում։ Այստեղ մի իրավաբանական նյուանս կա․ հայցադիմումը վարույթ ընդունելու որոշումը տրամադրվում է կողմերին, բայց եթե հայցադիմումը հետ ուղարկվեր, մենք չէինք ստանալու այդ որոշումը, ճիշտ այնպես, ինչպես նախորդը։ Տարօրինակ էր այն, որ նախապես զանգել և հայտնել են, որ որոշում ունենք ստանալու։ Ենթադրվում է, որ նախապես գիտեին որոշումը վարույթ ընդունելու մասին»։

Հարությունյանը նշեց, որ  ոստիկանության գործողությունների մասով գրություններ են ուղարկել Վարդենիսի բաժին և Գեղարքունիքի մարզային բաժանմունք։ «Ինչպես գիտեք, ապօրինաբար խոչընդոտվել է համայնքապետի և ավագանու անդամների մուտքը աշխատավայր և աշխատանքային պարտականությունների իրականացումը։ Մենք գրություն ենք ուղարկել Ոստիկանության Վարդենիսի բաժին և Գեղարքունիքի մարզային բաժին և հստակ իրազեկել ենք, որ այն հայցադիմումը, որը Վարչական դատարանում վարույթ է ընդունված, որևէ կերպ չի կասեցնում Ահարոն Խաչատրյանի լիազորությունների իրականցումը, չկա այդ լիազորությունները կասեցնելու վերաբերյալ դատարանի որոշում։ Այսինքն՝ վաղը ժամը 9.00-ից սկսած ոստիկանությունը ոչ միայն պետք է ձեռնպահ մնա Ահարոն Խաչատրյանին իր աշխատավայր մուտք գործել թույլ չտալու գործողություններից, այլև անհրաժեշտության դեպքում օժանդակի նրան իրականացնելու իր պարտականությունները»,- ասաց «Ահարոն Խաչատրյան» դաշինքի շահերի ներկայացուցիչ Վարազդատ Հարությունյանը։