Հայաստանը պետք է գիտակցի, որ միակողմանի քաղաքականությունը չափազանց վտանգավոր է, մենք համարժեք հարաբերություններ պետք է հաստատենք և՛ ԱՄՆ-ի, և՛ ՌԴ-ի, և՛ ԵՄ-ի հետ․ Երվանդ Թարվերդյան

Ադրբեջանի կողմից վերջին օրերին սանձազերծված պատերազմին հաջորդած հրադադարի հաստատման ուղղությամբ շահագրգռվածություն ունեին թե՛ ԱՄՆ-ն, և թե՛ Ռուսաստանի Դաշնությունը։ Այս մասին Tert.am-ի հետ զրույցում ասաց «Միացյալ Հայաստան» կուսակցության նախագահ Երվանդ Թարվերդյանը։

«Երկու պետությունները ձգտում են իրենց վերագրել հրադադարի հաստատման առաջնայնությունը, ինչը նշանակում է, որ երկուստեք շահագրգռվածություն ունեն հարցի խաղաղ կարգավորման շուրջ։ Նախորդ օրն էլ ԱՄՆ պետքարտուղար Էնթոնի Բլինկենը հեռախոսազրույց է ունեցել Նիկոլ Փաշինյանի ու Իլհամ Ալիևի հետ՝ հորդորելով զորքերը հետ քաշել ելման դիրքեր։ ԱՄՆ-ն իր երրորդ բարձրաստիճան պաշտոնյայի այցով ցույց է տալիս  հետաքրքրությունը տարածաշրջանի նկատմամբ։ Պետք է չմոռանալ նաև, որ աշնանը ԱՄՆ-ում սպասվում են ընտրություններ և դեմոկրատներին անհրաժեշտ են ԱՄՆ-ի հայերի ձայները»,- ասաց Թարվերդյանը՝ ընգծելով, որ ԱՄՆ Ներկայացուցիչների պալատի խոսնակ Նենսի Փելոսիի այցը ՀՀ՝ կարևոր նշանակություն ունեցավ Հայաստանի համար։

Թարվերդյանը նշեց, որ թեև այս փուլում ԱՄՆ-ն մեծ աշխատանք է տարել ՀՀ-ում ժողովրդավարության ամրապնդման, Հայոց Ցեղասպանության ճանաչման ուղղությամբ, այնուամենայնիվ զենք- զինամթերքով օժանդակելու մասին դեռևս վաղ է խոսել։

«Նենսի Փելոսիի այցը էլ ավելի ամրապնդեց հայ-ամերիկյան հարաբերությունները։ Մեր կուսակցությունը միշտ կողմ է եղել բազմակողմանի արտաքին քաղաքականության իրականացմանը, սակայն դա ոչ մի կերպ չպետք է անդրադառնա ՀՀ-ի և իր ստրատեգիական դաշնակից Ռուսաստանի հետ հարաբերությունների վրա։ Հայաստանը պետք է ընտրի ոչ թե «կա՛մ կա՛մ»-ի, այլ «և և»-ի քաղաքականությունը՝ նախապատվությունը չտալով միայն  մեկ երկրի հետ հարաբերություններ կառուցելուն։

Երվանդ Թարվեդրյանը ընդգծեց նաև Իրանի, Չինաստանի և Հնդկաստանի հետ հարաբերությունների բերալավման անհրաժեշտությունը։

«Հնդկաստանի հետ ՀՀ-ն պարտավոր է ավելի սերտ հարաբերություններ սկսել, ինչպես հիշում եք ՄԱԿ-ի ԱԽ-ում հենց Հնդկաստանն էր Ադրբեջանին որակել որպես ագրեսոր։ Նույնկերպ ավելի լայն հարաբերություններ պետք է սկսել Իրանի ու Չինաստանի հետ, քանի որ այդ երկրների հետ նույնպես ունենք շահերի համընկնում։ Իրանը ՀՀ-ի հետ իր սահմանին տեղի ունեցող իրադարձությունների վերաբերյալ ցույց է տալիս ակտիվություն ու դրսևորում է համարժեք պահվածք՝ ակնկալելով նաև ՀՀ-ի իշխանությունների կողմից համապատասխան քայլեր։ Իրանը հստակ սահմանել է, որ տարածաշրջանում ոչ մի սահման չպետք է փոփոխվի, ինչը բխում է մեր շահերից։ Այս համատեքստում պետք է կազմակերպվեն բարձր մակարդակի հանդիպումներ Իրանի հետ»,- ասաց Երվանդ Թարվերդյանը։

Խոսելով վերջին պատերազմի ժամանակ ՌԴ-ի դիրքորոշմանը և ՀԱՊԿ-ից առաջացած դժգոհության ալիքի մասին, Թարվերդյանը ընդգծեց․

«Ռուսաստանը որդեգրել  է զգուշավոր քաղաքականություն։ Ուկրաինայի հետ պատերազմի ֆոնին ՌԴ-ին ձեռնտու չէ, որ  Հարավայում Կովկասում նոր կոնֆլիկտ սկսի։ Չպետք է մոռանալ, որ ՌԴ-ն թեև մեր ռազմավարական դաշնակիցն է, սակայն ունի նաև հարաբերություններ Ադրբեջանի հետ։ Ուստի Ռուսաստանը կողմնակից  միայն հարցի խաղաղ կարգավորմանը, իր քայլերը բխում են դրանից, հետևաբար ՌԴ-ն ջանքեր չէր խնայում կրակը դադարեցնելու ուղղությամբ։ Ինչ վերբերում է ՀԱՊԿ-ին, ապա այն ոչ այնքան ռազմական, որքան ռազմաքաղաքական կառույց է, լավ հարթակ կարող է լինել արտոնյալ պայմաններով զենքի մատակարարման, տարբեր քննարկումների համար և այլն։ Պետք չէ ակնկալել, որ Ղազախստանից կամ Բելառուսից զորք է գալու ՀՀ և պաշտպանի մեր սահմանները։  Չպետք  է մոռանալ նաև, որ Հայաստանում է գտնվում ռուսական 102 ռազմաբազան, ինչը կարևոր անվտանգային երաշխիք է»։

«Միացյալ Հայաստան» կուսակցության նախագահը կարևորեց ՀՀ դաշնակից երկրների կողմից Ադրբեջանի նկատմամբ սանկցիաների կիրառումը, ինչը կարող է զգալիորեն զսպել Ադբեջանի ագրեսիվ գործողություները, Ադրբեջանը պետք է հասականա, որ իր գործողությունները անպատասխան չեն կարող մնալ։

«Հայաստանը իր արտաքին քաղաքական վեկտորը որոշելիս պետք է գիտակցի,  որ միակողմանի քաղաքականությունը չափազանց վտանգավոր է, մենք համարժեք հարաբերություններ պետք է հաստատենք և՛ ԱՄՆ-ի, և՛ ՌԴ-ի,  և՛ ԵՄ-ի հետ։ Այս համատեքստում չպետք է մոռանալ, որ մենք այդ երկրներում ունենք մեծ Սփյուռք։ Անհրաժեշտ է խելամտորեն վերլուծել, թե որ պետությունն ինչ շահեր ունի ՀՀ-ի հետ և դրան համադրել մեր շահերը և վարել բալանսավորված քաղաքականություն»,- ասաց «Միացյալ Հայաստան» կուսակցության նախագահ Երվանդ Թարվերդյանը։