Սահմանից գալով եմ ասում՝ սեպտեմբերի 13-14-ին ռուսական զորքն այդ հատվածից դուրս է եկել․ ո՞նց են իրենք մեր անվտանգությունը պահում․ Դավիթ Սանասարյան․ «Առավոտ»

«Առավոտ» թերթը գրում է․ ««Հայաստանի անվտանգությունը ՀԱՊԿ կոչվող, ԵԱՏՄ կոչվող տարածքի հետ ուղղակի վտանգված է: Մենք նրանց հետ չունենք անվտանգություն: Մենք չենք կարող մեր  սպառազինության խնդիրը լուծել նրանց հետ, ինչը ենթադրում է, որ մենք պետք է մտածենք մեր հարցերը ոնց ենք լուծում: Իսկ քանի շարունակում եք մնալ ՀԱՊԿ-ում ու խուսանավել, ասել՝ դե գիտեք ինչ կա, բոլորի հետ մենք լավ հարաբերություն ունենք, այդպես չի լինում: Աշխարհը այս պահին հստակ բաժանված է 2 մասի. կան Ռուսաստանին դաշնակից ուժեր եւ կա աշխարհ»,- «Առավոտի» հետ զրույցում ասաց «Ինքնիշխան Հայաստան» կուսակցության նախագահ Դավիթ Սանասարյանը:

Ըստ նրա, ՌԴ-ին դաշնակից մի քանի երկիր է մնացել ու անգամ ՀԱՊԿ անդամ երկրները ՌԴ-ին դաշնակից չեն ու եթե հնարավորություն ունենան, օր առաջ դուրս կգան ՀԱՊԿ-ից. «Եթե Փաշինյանը կարծում է՝ այսպես կշարունակի մնալ, իր իշխանության վերջը կգա: Բայց մենք պիտի ամեն ինչ անենք, որ Հայաստանի վերջը չգա ու չի գա: Մենք պիտի այնպես անենք, որ ունենանք ուժեղ դաշնակիցներ ու դաշնակիցների հետ մեկտեղ կարողանանք մեր ավտանգության խնդիրը լուծենք, սպառազինության հարցը լուծենք, մեր զորքի կրթվելու խնդիրը լուծենք ու այդպես մի շարք հարցեր»:

Հարցին՝ ՀԱՊԿ-ից դուրս գալու հետ կապված նույնիսկ այն ուժերը, որոնք այս օրերին  որոշակի դժգոհություն ունեն կառույցի անգործությունից, ասում են՝ հա, ճիշտ եք, ՀԱՊԿ-ը չարդարացրեց իրեն, խնդիրներ կան, բայց այնպես չի, որ Արեւմուտքը մեզ զենք է տալիս կամ ռազմական աջակցություն է տրամադրում, այլընտրանք ունե՞նք՝ Սանասարյանը պատասխանեց. «Խաբում են ուղղակի մեր քաղաքացիներին: Եթե դու ՀԱՊԿ անդամ ես ու ասում ես՝ Ռուսաստանի հակառակորդները, թշնամիները խի՞ մեզ զենք չեն տալիս, դա, մեղմ ասած, մանիպուլյացիա է: Պարզ տրամաբանություն է: Արեւմուտքից ի՞նչ երաշխիքներ եք սպասում: Ե՞րբ եք խոսել Արեւմուտքի հետ: Ես էլ տարբեր միջազգային մեր գործընկերների հետ տարբեր շփումներ ունենում եմ, իրենք ասում են՝ գիտեք, դուք հա՛մ ուզում եք այնտեղ լինեք, հա՛մ այնտեղ, այդպես չի լինում»:

Հարցին՝ իսկ որ դուրս գանք ՀԱՊԿ-ից, իրենք կոկրետ ինչ-որ խոստում տալի՞ս են՝  Դավիթ Սանասարյանը պատասխանեց. «Հրապարակային տարբեր երկրների գործողություններ մենք տեսնում ենք: Ե՛վ ԱՄՆ-ի, ե՛ւ Ֆրանսիայի հստակ մեսիջներ ենք մենք տեսնում: Եթե դու, լինելով ՀԱՊԿ անդամ, մեր միջազգային գործընկերները կարողանում են որոշակի անվտանգային մթնոլորտ այստեղ ստեղծել, պատկերացրեք, որ դու ՀԱՊԿ անդամ չլինես, դա լրիվ ուրիշ իրավիճակ կլինի: Որովհետեւ ՀԱՊԿ-ը զուտ նախասիրությունների տարածք չի, դա անվտանգային կառույց է, որը ստեղծվել է Արեւմուտքի դեմ, կոպիտ ասած: Դուք ո՞նց եք պատկերացնում՝ լինելով մի կառույցում, որն իր գործունեությամբ տրամադրված է Արեւմուտքի դեմ, դու իրենցից աջակցություն ստանա՞ս: Կամ, լավ, դու ՀԱՊԿ անդամ չես, իրենք էլ քեզ երաշխիք չեն տալիս, դու երաշխիք ունե՞ս: ՀԱՊԿ-ն է պահո՞ւմ քո անվտանգությունը»: Դիտարկմանը, որ ՀԱՊԿ-ն գոնե հեղհեղուկ անվտանգություն է տալիս, նա պատախանեց. «Այդպես չի, ամեն պահի կարող է գլխիդ փորձանք թափվել: Ես հիշեցնեմ Ալիեւի այն հայտարարությունը, որ ՀԱՊԿ-ում ավելի շատ իր բարեկամներն են: Ու դա նորություն չի ասում, իրականություն է: Հիշեք Լուկաշենկոյի վերջին ելույթը: Իրենք հստակ ասում են՝ ՀԱՊԿ-ն Ադրբեջանի դեմ չի: Հայաստանն այսօր խնդիր ունի Ադրբեջանի հետ, Սաուդյան Արաբիայի հետ չի հակամարտում: Ադրբեջանն ամեն օր մեր անվտանգությանը կոնկրետ հարված է հասցնում»: 

Փոխանցեցինք, որ այդ թեզին մեզ հակադարձում են հետեւյալ կերպ՝ հիմա Ադրբեջանը սահմանին ուժեր է կենտրոնացրել, Արցախի սահմանը փաստացի պահում են ռուս խաղաղապահները ու որ պահին իրենք դուրս եկան՝ հարձակում է լինելու: Սանասարյանն արձագանքեց. «Ես ձեզ կոնկրետ սահմանից գալով եմ ասում, ոչ թե ուղղակի ինչ-որ մի տեղ կարդացել եմ, սեպտեմբերի 13-14-ին, երբ որ սկսեց պատերազմը, ամսի 13-ին ռուս խաղաղապահները դուրս եկան այդ տարածքից, որ հանկարծ բան չլինի: Ռուսական զորքն այդ հատվածից դուրս է եկել»: Ճշտեցիք՝ Ջերմուկի՞ց նկատի ունի՝ Սանասարյանը պատասխանեց. «Ջերմուկից, հարավից առհասարակ, դուրս է եկել այն տեղերից, որտեղից հնարավոր էր, որ իրենք պրոբլեմ ունենային, ասենք, ո՞նց են իրենք մեր անվտանգությունը պահում: Շատ կարեւոր մի հանգամանք էլ կա՝ իրենք քեզ չեն զինելու: Այսօր իրենք խնդիր ունեն սպառազինության, քեզ չեն զինելու ու այդ պարագայում ո՞նց ես խնդիրդ լուծում: Այսօր ամենակարեւոր հարցը դա է: Գիտեք, Հնդկաստանի զենքով մի քանի զինատեսակ ունենալ, չի նշանակում լինել սպառազինված: Լինել սպառազինված, նշանակում է ամբողջ համակարգդ սպառազինել ու հետո այդ ծավալներն արդյոք ապահովելո՞ւ ես Հնդկաստանի զենքով, թե՞ չէ: Ես ողջունում եմ, որտեղից ուզում են, թող բերեն: Թող գնան Թուրքիայից բերեն, բայց բերեն, մեզ զենք է պետք: Ո՞նց ենք այդ խնդիրը լուծելու»:

Հիշեցրինք, որ Արցախի նախագահ Արայիկ Հարությունյանն, օրինակ, լրիվ ապավինում է ՌԴ-ի աջակցությանը եւ ասում է, որ միայն ՌԴ-ի հետ են պատկերացնում Արցախի ապագան՝ Սանասարյանը պատասխանեց. «Ես դրան ի՞նչ պետք է արձագանքեմ: Իրենք էլ են տեսնում, որ այդպես չի, հասկանում են, որ իրենք պատանդի կարգավիճակում են: Իրենք ՌԴ-ի ու Ադրբեջանի կողմից պատանդառված են: Հիմա Հայաստանը պետք է այնպես անի, որ այդ պատանդառությունից դուրս գա: Միտումներ չեմ տեսնում առայժմ շոշափելի»: 

Ճշտեցինք՝ դուք հանդիպումներ եք ունենում վարչապետ Փաշինյանի հետ, այս ուղերձները չե՞ք փոխանցում, ի՞նչ է ասում ձեզ՝ նա պատասխանեց. «Եթե մի բան հրապարակային ասում եմ, 10 անգամ ավել ես այնտեղ եմ ասում իմ դիրքորոշումները: Ինքը թող ասի ինչ է ուզում, ես հո իր խոսափո՞ղը չեմ: Ես այդպես հստակ պատասխան չեմ ստացել, որ ՀԱՊԿ-ից դուրս չենք գալու: Նման բան չի պատասխանել»»:

Մանրամասները՝ թերթի այսօրվա համարում։