ԵԱՀԿ Մինսկի խումբը 30 տարի բանակցություններ է վարել, այս ձևաչափի շրջանակում էլ պետք է շարունակել բանակցությունները․ ԱՀ ԱԺ-ի «Ազատ Հայրենիք-ՔՄԴ» խմբակցության ղեկավար․ «Իրավունք»

«Իրավունք» օրաթերթը գրում է․ «Արցախում ստեղծված իրավիճակը երեկ նախագահը խորհրդարանի քաղաքական ուժերի հետ է քննարկել Անվտանգության խորհրդի նիստում: Հրապարակված տեսանյութում Արայիկ Հարությունյանը Բաքու մեկնելու Ադրբեջանի առաջարկին չի անդրադառնում, միայն նշում է, թե պետք է «սթափ գնահատել ստեղծված իրավիճակը եւ կատարել անհրաժեշտ գործողություններ»: Ի՞նչ ողջամիտ քայլեր է պատրաստվում ձեռնարկել Ստեփանակերտը, փորձել ենք հետաքրքրվել իշխանական խմբակցության ղեկավար Արթուր Հարությունյանից, ով նախ նկատեց.

- Մենք պատրաստ ենք բանակցությունների գնալ, բայց ոչ պարտադրանքի կամ պահանջների ներկայացման պայմաններում: Մենք ասել ենք՝ կան միջազգային հստակ երաշխիքներ, միջազգային ձեւաչափ՝ ԵԱՀԿ Մինսիկի խմբի համանախագահությունը, որը վարում էր բանակցություններ եւ միջազգայնորեն ճանաչված միակ ձեւաչափն էր՝ երեք սկզբունքների հիման վրա գործող՝ ազգերի ինքնորշման իրավունք, տարածքային ամբողջականություն եւ ուժի չկիրառում: Եթե կան այդ միջազգային երաշխիքները, եւ Արցախը որպես առանձին լիիրավ բանակցային կողմ ճանաչվում է միջազգային ձեւաչափում, մենք պատրաստ ենք գնալ բանակցությունների այդ երեք սկզբունքների հիման վրա: Բայց մենք տեսնում ենք, որ Ադրբեջանը միջազգային բոլոր իրավունքների կոպտագույն խախտումներով փորձում է ճնշումների միջոցով ստեղծել այն ֆոնը, իբր մենք բանակցում ենք իրենց ասածով` հայ բնակչության հետ «ինտեգրացիայի» շուրջ: Կարծում եմ, որ նոր ձեւաչափեր՝ բրյուսելյան, ամերիկյան, կամ այլ ինչ-որ բան ստեղծելու կարիք չկա, ԵԱՀԿ Մինսկի խումբը 30 տարի բանակցություններ է վարել, այս նույն ձեւաչափի շրջանակում էլ պետք է շարունակել բանակցությունները՝ նույն սկզբունքների հիման վրա: Ես սա ռեալ եմ համարում, թեեւ պետք է համանախագահող երկրները կամք դրսեւորեն, որ այդ ձեւաչափը լիարժեք սկսի աշխատել: Իհարկե, որոշակի խնդիրներ, հակադրություններ կան այդ առումով համանախագահող երկրների միջեւ, նախկինում էլ են եղել, բայց այս ձեւաչափում արդյունավետ աշխատում էին:

— Ամեն դեպքում, ունենք այն, ինչ ունենք: Այս իրավիճակում ինչպե՞ս եք տեսնում Արցախի ապագան:

— Ամեն ինչ կախված է ընթացող բանակցություններից: Ռուսական խաղաղապահ զորակազմի հրամանատարությունն այժմ բանակցում է ադրբեջանական կողմի հետ՝ անցած շաբաթ օրը Ստեփանակերտ Լիսագորի ճանապարհահատվածի մոտակայքում գրաված բարձունքից ադրբեջանական զինված ուժերին ելման դիրքեր վերադարձնելու նպատակով: Այս պահի դրությամբ մեր քայլերը բանակցությունների շարունակությունն են: Ադրբեջանական կողմի հետ ընթացող բանակցություններին զուգահեռ, ռուս խաղաղապահները այս պահին նույնպես տեղակայված են այն նույն բարձունքում, որտեղ ադրբեջանցիները առաջխաղացում են ապահովել: 

Չնայած ռուսների ներկայությանը, միեւնույնն է, այդ ճանապարհի շահագործումը անվտանգ չէ, եւ Ստեփանակերտը Շուշիի շրջանի չորս համայնքներին կապող ճանապարհը փակ է:

— Հնարավոր չէ՞ այդ ճանապարհը շահագործել ռուսական կողմի անմիջական վերահսկողությամբ:

— Այս պահին անվտանգության նկատառումներից ելնելով չի շահագործվում, բայց բանակցությունների արդյունքում կտեսնենք, հնարավոր է որեւէ փոփոխություն լինի: Մենք սպասում ենք դրական արդյունքի»:

Մանրամասները՝ թերթի այսօրվա համարում։