Իրանը տարածաշրջանային էսկալացիա չի ցանկանում, բայց պետք է «պատժի» Իսրայելին. ԱԳՆ խոսնակ (թարմացվում է)

17:50

Իրանն Իսրայելի վրա հարձակման մտահոգությունների ֆոնին աերոնավիգացիոն ծանուցում (NOTAM) է ուղարկել: Ըստ Jerusalem Post-ի՝ Իրանը, մասնավորապես, նախազգուշացրել է օդաչուներին երկրի կենտրոնական, արևմտյան և հյուսիսարևմտյան հատվածներում վտանգների մասին՝ խորհուրդ տալով փոխել օդանավերի երթուղին:

17:38

Իրանը չի ձգտում սրել տարածաշրջանային լարվածությունը, բայց կարծում է, որ պետք է պատժի Իսրայելին, երկուշաբթի հայտարարել է արտգործնախարարության խոսնակը՝ մեկնաբանելով անցած շաբաթ Թեհրանում ՀԱՄԱՍ-ի առաջնորդ Իսմայիլ Հանիեի սպանությունը, գրում է Reuters-ը։

«Իրանը ձգտում է կայունություն հաստատել տարածաշրջանում, բայց դա տեղի կունենա միայն ագրեսորին պատժելու դեպքում և Սիոնիստական ռեժիմի (Իսրայելի) արկածախնդրության դեմ զսպող միջոցներ ստեղծելով», - ասել է Նասեր Քանանին՝ հավելելով, որ Թեհրանի գործողություններն անխուսափելի են։

Քանանին ԱՄՆ-ին կոչ է արել դադարեցնել Իսրայելի աջակցությունը՝ ասելով, որ միջազգային հանրությունը չի կատարել տարածաշրջանում կայունությունը պահպանելու իր պարտականությունը և պետք է աջակցի «ագրեսորի պատժին»:

17:00

Ռուսաստանի Անվտանգության խորհրդի քարտուղար Սերգեյ Շոյգուն երկուշաբթի ծրագրված աշխատանքային այցով ժամանել է Իրան։ Թեհրանում նա բանակցություններ կանցկացնի Իրանի ազգային անվտանգության բարձրագույն խորհրդի քարտուղար Ալի Աքբար Ահմադիանի և Իրանի զինված ուժերի գլխավոր շտաբի պետ Մոհամմադ Բաղերիի հետ։ Շոյգուին կընդունի Իրանի նախագահ Մասուդ Փեզեշքիանը:

Կողմերը կքննարկեն գլոբալ և տարածաշրջանային անվտանգությանն առնչվող տարբեր հարցեր, գրում է ՏԱՍՍ-ը:

14:07

Իրանի նախագահ Մասուդ Փեզեշքիանը հայտարարել է, որ «Իսրայելի ռեժիմի կողմից ՀԱՄԱՍ-ի քաղաքական ղեկավար Իսմայիլ Հանիեի սպանությունը մեծ սխալ էր, որն անպատասխան չի մնա», գրում է ԻՌՆԱ-ն:

Իրանի նախագահն ասել է, որ Հանիեի սպանությունը, որը եղել է Իսլամական Հանրապետության հյուրը, հակասում էր միջազգային իրավունքին։ Նա հավելել է, որ Թեհրանն աշխարհից ակնկալում է, որ այս հանցագործությունը խստորեն կդատապարտվի՝ ընդգծելով, որ «սիոնիստների ամբարտավանությունը անպատասխան չի մնա»։

Մինչդեռ Իսրայելի վարչապետ Բենիամին Նեթանյահուն հայտարարել է, որ երկիրը պատրաստ է ամեն զարգացման և ուժեղ կպատասխան կտա, եթե հարձակման ենթարկվի, գրում է timesofisrael.com-ը:

«Մենք պատրաստ ենք ցանկացած սցենարի՝ և՛ հարձակողական, և՛ պաշտպանական»,- ասել է Նեթանյահուն Երուսաղեմում վարչապետի գրասենյակում կառավարության ամենշաբաթյա նիստի սկզբում։

Նրա խոսքով՝ Իսրայել պետությունը բազմճակատ պատերազմի մեջ է «Իրանի չարի առանցքի դեմ»:

«Մենք մեծ ուժով հարվածում ենք նրա բոլոր թևերին: Ես կրկնում եմ և ասում եմ մեր թշնամիներին. մենք կպատասխանենք և ծանր գին կպահանջենք մեր դեմ ագրեսիայի ցանկացած գործողության համար՝ անկախ այն բանից, թե որ կողմից դա լինի», - հայտարարել է Նեթանյահուն։

Նրա մեկնաբանություններից ժամեր անց պաշտպանության նախարար Յոավ Գալանտն ասել է, որ Իսրայելը «շատ ուժեղ պատրաստված է» և պատրաստ է արագ արձագանքել ցանկացած հարձակման:

13:50

Համաշխարհային շուկայում ֆոնդային ինդեքսների անկում է. պատճառներից մեկն իրավիճակն է Մերձավոր Արևելքում: Իսրայելական արժեթղթերը կտրուկ անկում են գրանցել. հիմնական TA-35 ֆոնդային ինդեքսը նվազել է 2,7%-ով, գրում է Economic Times-ը:

Ասիական և եվրոպական բորսաներում գրանցվել են խոշոր և անգամ ռեկորդային անկումներ, Bitcoin-ի գինն իջել է մինչև 49,000 դոլար:

11:33

Հռոմի պապը Մերձավոր Արևելքում խաղաղության կոչ է արել: Նա խորապես մտահոգված է Մերձավոր Արևելքում տիրող իրավիճակով և հակամարտության՝ Գազայից և Իսրայելից դեպի այլ երկրներ տարածվելու վտանգով։ Տարածքում տեղի ունեցած ամենավերջին իրադարձությունների ֆոնին պոնտիֆիկոսը հույս ունի, որ դաժան ու արյունալի հակամարտությունն ավելի չի ընդլայնվի: Այս մասին գրում է vaticannews.va կայքը:

«Ռմբակոծությունները, սպանությունները և բռնությունները ոչ մի նպատակի չեն ծառայում: Հարձակումները, սպանությունները երբեք լուծում չեն կարող լինել: Դրանք ոչ թե օգնում են գնալ արդարության, խաղաղության ճանապարհով, այլ ավելի մեծ ատելություն և վրեժխնդրություն են առաջացնում։ Բավակա՛ն է, եղբայրնե՛ր և քույրե՛ր: Բավակա՛ն է, մի՛ խեղդեք Աստծո խաղաղության խոսքը, թող այն լինի Սուրբ Երկրի, Մերձավոր Արևելքի և ողջ աշխարհի ապագան: Պատերազմը պարտություն է», - հավելել է նա։

10:33

Իսրայելը կարող է Իրանին զսպելու համար կանխարգելիչ հարված հասցնել, եթե ունենա հստակ ապացույցներ, որ Թեհրանը պատրաստվում է հարձակման: Այս մասին, ինչպես գրում է timesofisrael.com-ը, հաղորդում են իսրայելական լրատվամիջոցները այն բանից հետո, երբ վարչապետ Բենիամին Նեթանյահուն կիրակի երեկոյան Իսրայելի անվտանգային կառույցների ղեկավարներին հրավիրել է հանդիպման:

Իսրայելը հստակ չգիտի, թե ինչ սպասել Իրանից և նրա դաշնակիցներից, ուստի քննարկում է տարբերակների լայն շրջանակ, թե ինչպես կարող է լավագույնս արձագանքել կամ կանխել ակնկալվող հարձակումը:

Նեթանյահուի հետ հանդիպման ժամանակ քննարկվել է Իրանին հարվածելու տարբերակը՝ որպես զսպման միջոց, հաղորդում է Ynet-ը, թեև անվտանգության պաշտոնյաներն ընդգծել են, որ նման քայլը կթույլատրվի միայն այն դեպքում, եթե Իսրայելը ստանա հստակ հետախուզական տվյալներ, որոնք կհաստատեն, որ Թեհրանը պատրաստվում է հարձակվել։

Անհրաժեշտ է նաև, որ իսրայելական հետախուզության տվյալներն այս հարցի վերաբերյալ համապատասխանեն ԱՄՆ հետախուզության տվյալներին, բայց նույնիսկ եթե դրանք համընկնեն, Իսրայելը, այնուամենայնիվ, կարող է կանխարգելիչ հարվածի չդիմել:

9:11

ԱՄՆ պետքարտուղար Էնթոնի Բլինկենը G7-ի երկրների արտգործնախարարներին հայտարարել է, որ Իրանի և լիբանանյան «Հեզբոլլահ» շարժման հարձակումն Իսրայելի վրա կարող է սկսվել առաջիկա օրվա ընթացքում։ Այս մասին հաղորդում է Axios պորտալը՝ իր աղբյուրներին հղումով։

«Բլինկենը G7-ի երկրների իր գործընկերներին ասել է, որ Իրանի և «Հեզբոլլահ»-ի հարձակումն Իսրայելի վրա կարող է սկսվել արդեն երկուշաբթի օրը», - ասված է հաղորդագրության մեջ:

Ինչպես հայտնել են պորտալի աղբյուրները, ԱՄՆ պետքարտուղարը հայտարարել է, որ Վաշինգտոնը կարծում է՝ Իրանն ու «Հեզբոլլահ»-ը պատասխան միջոցներ կձեռնարկեն, սակայն «դեռ պարզ չէ, թե պատասխան հարվածն ինչ ձևով կլինի»։ Միևնույն ժամանակ, ըստ աղբյուրների, Բլինկենը հայտնել է, որ ԱՄՆ-ն չգիտի հնարավոր հարձակման հստակ ժամկետը, սակայն ընդգծել է, որ այն կարող է սկսվել առաջիկա 24-48 ժամվա ընթացքում։

Բացի այդ, Բլինկենը G7-ի երկրների ԱԳ նախարարներին հայտնել է, որ տարածաշրջանում ամերիկյան զորքերի թվի ավելացումը «բացառապես պաշտպանական նպատակներ» է հետապնդում։

Հիշեցնենք, որ ավելի վաղ timesofisrael.com-ը հայտնել էր, որ Իսրայելը պատրաստվում է Իրանի և լիբանանյան «Հեզբոլլահ» շարժման կողմից առաջիկա օրերին հնարավոր հարձակումներին և ենթադրում է, որ հարձակումները կարող են լինել մի քանի ճակատներից: 

Իրանը, նրա լիբանանյան դաշնակից «Հեզբոլլահ»-ը և պաղեստինյան ՀԱՄԱՍ-ն Իսրայելին մեղադրում են չորեքշաբթի Թեհրանում ՀԱՄԱՍ-ի առաջնորդ Իսմայիլ Հանիեի սպանության համար: Նրա սպանությունը տեղի է ունեցել մի քանի ժամ անց այն բանից հետո, երբ Բեյրութում Իսրայելի հասցրած հարվածից սպանվել էր «Հեզբոլլահ»-ի ռազմական ղեկավար Ֆուադ Շուքրին: Իսրայելը ստանձնել է Շուքրի սպանության պատասխանատվությունը, սակայն պաշտոնապես չի մեկնաբանել Հանիեի սպանությունը: Թե՛ Իրանը, թե՛ «Հեզբոլլահ»-ը խոստացել են վրեժխնդիր լինել սպանությունների համար:

Այս համատեքստում Իսրայելի անվտանգության կառույցները գտնվում են «ամենաբարձր զգոնության» վիճակում, իսկ ԱՄՆ-ի գլխավորած միջազգային կոալիցիայի անդամները, ներառյալ Մեծ Բրիտանիան և արաբական դաշնակից երկրները, որոնք նպատակ ունեն խափանել Իրանի հնարավոր հարձակումները, փորձում են զսպել և կասեցնել դրանք, հաղորդում է իսրայելական Channel 12-ը: