Լյուսի Հայրապետյանը խոսել է ԱՄՆ-ում սովորելու, սիրելիից բաժանվելու մասին և լուսանկարվել Tert.am Life-ի Neon Art ֆոտոշարքում

Մանեկենուհի Լյուսի Հայրապետյանը վաղուց է, ինչ մոդելային ոլորտում է աշխատում: Աշխատասեր մանեկենուհին նաև նկարահանվել է սերիալներում, «Կենտ Զույգը» կատակերգական ներկայացման մեջ և վարել է «Հրաշալի 7-յակը»:

 

Tert.am Life-ը Լյուսիի հետ ֆոտոշարք և հարցազրույց է արել:

 

Ֆոտոշարքն իրականացնելիս մեզ օգնել է make-up արտիստ Աշխեն Կոստանդյանը: 4 ժամերի ընթացքում մենք ստացանք այն, ինչ-որ նախատեսել էինք, իսկ առանձին օր զրույցի ժամանակ Լյուսիի հետ շատ անկեղծ և հետաքրքիր զրույց ունեցանք` խոսելով գործնական ու անձնական նորությունների և մանեկենուհու բնավորության, աշխարհայացքի, նպատակների ու երջանկության իր չափանիշների մասին:

 

 

-Լյուսի, տեղեկացանք, որ շուտով մեկնելու եք Միացյալ Նահանգներ սովորելու: Վաղու՞ց էիք ծրագրել մեկնել:

 

-Միշտ ցանկացել եմ նորաձևության ոլորտում որպես դիզայներ ստեղծագործել: Շուրջ երեք տարի է, ինչ ուզում էի մեկնել արտերկիր սովորելու, բայց ամեն անգամ չէր ստացվում աշխատանքի հետ կապված զբաղվածության պատճառով։ Մի ժամանակ վարում էի «Հրաշալի 7-յակը», սերիալներում էի նկարվում, ներկայացման մեջ էի հանդես գալիս՝ միաժամանակ աշխատելով նաև Օդանավակայանում։ Վերջապես ուժերս կենտրոնացրեցի միայն նպատակիս վրա և ստացվեց այն, ինչ ուզում էի: Այս ընթացքում Գևորգ Շադեյանի մոտ նկարչության դասընթացների եմ գնացել, ինչպես նաև անգլերեն եմ պարապել «Շաբունց Սիսթերզ» անգլերենի մասնագիտացված դպրոցում, որպեսզի կարողանամ հանձնեմ անգլերենի հատուկ ծրագրային քննությունս և ունենամ ներկայանալի պորտֆոլիո։ Իսկ հիմա ժամանակն է երազանքներս իրականացնեմ:

 

-Սովորելուց հետո վերադառնալու՞ եք Հայաստան, թե կմնաք և կստեղծագործեք արտերկրում:

 

-Կվերադառնամ, քանի որ ընտանիքս, ընկերներս այստեղ են: Դժվար կարողանամ երկար ժամանակ նրանցից հեռու մնալ: Ուսումս բավականին երկար է տևելու` 5 տարի, հուսով եմ արձակուրդներ կունենամ և կկարողանամ գալ կարոտս առնել։

 

 

- Նպատակասլաց մարդ եք...

 

-Այո, շատ: Իմ առաջ դրված ցանկացած նպատակ ձգտում եմ իրականացնել: Ընկերներս միշտ ասում են. «Լյուսիի համար դժվարը նպատակ դնելն է, եթե դրեց՝ կհասնի» (ծիծաղում է)։ Կարծում եմ ինձ այդ հարցում կօգնի քույրս, ով նույնպես նպատակասլաց է և աշխատասեր։

 

-Մոդելային կարիերայում այդքան էլ հեշտ չէ նորանոր բարձունքների հասնել: Ի՞նչ խոչընդոտների եք հանդիպել մինչ օրս:

 

-Ես սկսել եմ թռուցիկ բաժանելուց` վարձատրվելով 5000 դրամ: Դժվար էր սկիզբը, ներքին շուկայում կային փորձառու և ոչ փորձառու մոդելներ և եթե դու ունեիր շատ ծանոթներ, ապա քեզ ավելի հաճախ էին դիմում: Սկսել եմ ամենացածր աշխատավարձից և հիմա հասել եմ նրան, որ համարվում եմ լավագույն մոդելներից մեկը: Շատ լավ եմ հասկանում սկսնակներին և միշտ օգնում նրանց: Իսկապես շատ դժվար է այդ ոլորտում հասնել բարձունքների:

 

 

-Մոդելային կարիերան Ձեզ փոխե՞լ է:

 

-Թե՛ ներքուստ, և թե՛ արտաքուստ շատ է փոխել: Հիմա այլ աշխարհայացք ունեմ և սկսել եմ ավելի շատ ուշադրություն դարձնել արտաքինիս, կառուցվածքիս:

 

-Մի քանի բառով բնութագրեք Ձեզ:

 

-Մարդամոտ, շփվող, պատրաստ օգնելու, չափազանց բարի, որը երբեմն էլ խանգարում է, սրտաբաց և ընկերասեր:

 

 

-Մեր ֆոտոշարքում ներկայացել եք վառ գույներով: Ո՞ր գույնն է Ձեզ ավելի բնորոշ:

 

-Ես հատուկ սիրած գույն չունեմ: Բոլոր վառ գույները սիրում եմ: Ֆոտոշարքի մտահղացումը ինձ շատ դուր եկավ, երբ առաջարկեցիք: Շատ անգամներ էի ցանկանում նմանատիպ ֆոտոշարքով ներկայանալ։ Ինչ վերաբերում է գույներին՝ չեմ առանձնացնի: Ինձ ճանաչող մարդիկ միշտ ասում են՝ «այնքան պայծառ ես, վառ ես, ինչպես գույները»: Բոլոր վառ գույներն էլ սիրում եմ:

 

-Ի՞նչ եք սիրում և ի՞նչ չեք սիրում:

 

-Չեմ սիրում սուտը: Երբ մարդկանց հետ շփվում եմ անկեղծ ու ներկայանում եմ այնպիսին, ինչպիսին կամ, ու երբ տալիս եմ այդքանը և զգում, որ ստում են ինձ, շատ եմ վիրավորվում և հասկանում, որ տվյալ մարդու հետ սխալ էր ժամանակ վատնելը։ Աշխարհի ամենավատ բանը սուտն է: Սիրում եմ մարդկանց մեջ ազնվությունը, լավատեսությունը: Չեմ սիրում բացասական ու միշտ ամեն ինչից բողոքող մարդկանց:

 

 

-Ի՞նչը կփոխեիք Ձեր մեջ:

 

-Ես ինձ արդեն շատ հարցերում եմ փոխել: Շատ բացասական բնավորության գծեր ունեի, որոնք վաղուց էլ չկան (ժպտում է): Այդ հարցում ինձ օգնել են իմ մոտ ընկերները: Հիմա էլ ունեմ մի քանի գծեր, որոնք պետք է փոխեմ, բայց չէի ցանկացա գրքի պես բացվել:

 

-Նպատակասլաց եք, իսկ կյանքում համարձակ ձևո՞վ եք որոշումներ կայացրել:

 

-Երևակայեք կյանքի կարևորագույն հարցերում որոշումներս չափազանց համարձակ են, որոնք լինում են վարկենական, բայց միևնույն ժամանակ ճակատագրական: Որոշումներս կախված են տրամադրությունիցս: Երբեմն այնպիսի որոշումներ եմ կայացրել, որ հետո փոշմանել եմ, բայց արդեն ուշ է եղել:

 

 

-Ի՞նչ որոշում եք կայացրել, որ փոշմանել եք:

 

-Շատ են եղել: Օրինակ` հենց ուսմանս հարցը: Մինչ այս տարակուսել եմ և չէի կարողանում վերջնական որոշում կայացնել։ Իհարկե, դժվար է, երբ քո երկրում կայացած ես, ունես շատ ընկերներ, շրջապատ և բոլորին այստեղ թողնելով մեկնում ես արտերկիր՝ չիմանալով հետոն ինչպես է լինելու: Այս անգամ էլ բնավորությանս համաձայն մի ակնթարթում դիմեցի համալսարաններին, որոնք փաստորեն ինձ էին սրտաբաց սպասում (ժպտում է):

 

-Հարցազրույցներից մեկի ժամանակ խոսել էիք նշանադրության մասին: Մտադրություններ ունեիք մեկնելու Անգլիա: Ի՞նչու փոխեցիք միտքը։

 

-Չեմ սիրում խոսել անձնականիս մասին: Կնշեմ միայն, որ սիրելիիս հետ վաղուց է, ինչ միասին չենք: Մենք հիմա պարզապես լավ ընկերներ ենք: Նրան համաձայնություն տալիս` արագ եմ որոշում կայացրել, հաշվի չառնելով շատ դետալներ: Հետո հասկացա, որ հեռավորության վրա այնքան էլ հեշտ չէ հարաբերություն պահելը. մենք հաճախ էինք վիճում: Նա ապրում էր Լոնդոնում, իսկ ես այստեղ։ Անհնար էր խուսափել կոնֆլիկտներից, խանդի տեսարաններից (ժպտում է): Հիմա նա տեղափոխվել է Հայաստան, հաճախ ենք հանդիպում: Գուցե միանանք, չի բացառվում, բայց ստույգ ասել չեմ կարող (ժպտում է):

 

 

-Ի՞նչն եք սիրում տղամարդու մեջ:

 

-Տղամարդու մեջ սիրում եմ մաքրասիրությունը, սիրում եմ, որ իրեն հետևում է, կոկիկ է լինում` թե հագուստի և թե անձնական հիգիենայի հանդեպ, սիրում եմ շռայլ տղամարդկանց (իհարկե չափավոր)։ Չեմ սիրում ժլատներին, ինքս էլ այդպիսին չեմ։ Հասարակ հարցում հենց նկատում եմ նման մանրուք միանգամից հիասթափվում եմ: Սիրում եմ, որ տղամարդը աշխատասեր է լինում, քանի որ նա ընտանիքի սյունն է հանդիսանում: Չեմ հարգում այն տղամարդկանց, որոնք ձևեր են թափում ասելով, թե այստեղ չեմ աշխատի, այնպես չեմ աշխատի և իրականում ոչ մի բան չեն անում իրենց ընտանիքի հոգսերը հոգալու համար:

 

-Հե՞շտ է այսօր գտնել այն տղամարդուն, որին պատկերացնում եք Ձեր կողքին:

 

-Եթե հեշտ լիներ, ես արդեն կողքիս ամուսին կունենայի և 4 երեխա, ինչպես երազում եմ (ծիծաղում է): Մեր իրականության մեջ դա շատ բարդ հարց է: Կարծում եմ շատերը կհամաձայնեն ինձ հետ, հատկապես ընկերուհիներս:

 

 

-Տղամարդի՞կ են ավելի բարդ, թե՞ կանայք:

 

Կանայք բարդ չեն, նրանք չափազանց բարդ են՝ իրենց պահանջներով և սիրո չափանիշներով։ Վերջերս ընկերներիցս մեկի հետ անդրադարձանք այս թեմային (չեմ կարող չհամաձայնվել նրա հետ), և նա ասաց` «Մեր տղամարդիկ հասարակ պահանջներ ունեն դեռևս հին ժամանակներից: Գնում են որսի, միս են բերում ընտանիք, կերակրում են, գիշերներն իրենց պետք է սեր կնոջ կողմից, և առավոտյան արթնանում են ու նորից գնում որսի...»: Ոչինչ չի փոխվել իրականում, եթե խորն ես մտածում հասկանում ես, որ մեր իրականությունում էլ է նույնը՝ ուղղակի որսը փոխարինվելէ աշխատանքով (ժպտում է)։ Իսկ կանայք ուզում են, որ իրենց հասկանան, իրենց լսեն, սիրեն, ուշադրություն դարձնեն, գուրգուրեն... Բարդ է: Տղամարդկանց համար կյանքը ավելի հեշտ է և պարզ գրաֆիկով, իսկ կանանց համար շատ կարևոր են մանրուքները։

 

 

-Ի՞նչ է ուզում կինը:

 

-Որպես կին իմ անունից կպատասխանեմ` ուզում եմ ներդաշնակություն, հարմարավետություն։ Խոսքը ոչ թե նյութականի մասին է, այլ տղամարդուդ հետ հանգիստ քեզ զգալու: Պետք է զգաս պաշտպանված և զգաս, որ մեջքիդ տղամարդ կա:

 

-Երբևիցե չե՞ք հանդիպել բարդ տղամարդու:

 

Եղել են դեպքեր, որ ասել եմ. «Բարդ ես ինձ համար», բայց իրականում դա այդպես չէ: Երբ ավելի խորն ես մտածում, հասկանում ես, որ դու ավելի բարդ ես, քան իրենք:

 

 

-Հավատու՞մ եք ճակատագրին:

 

-Հավատում եմ և կարծում եմ, որ իմ ճակատագրի տղամարդը դեռ կլինի իմ կողքին: Իհարկե, կան բաներ, որ կախված է մեզանից, բայց մի ուժ կա, որն ի վերուստ է մեզ ուղղորդում։

 

-Ի՞նչ եք կարծում, ճակատագիրն ի՞նչ է պատրաստել Ձեզ համար ապագայում:

 

Շատ սիրող ամուսին, 4-6 երեխա, շատ երջանիկ և առողջ կյանք: Ես շատ դրական մարդ եմ և միշտ լավն եմ սպասում (ծիծաղում է): Գիտեմ որ իմ ճակատագիրը միշտ ինձ ժպտում է իր թաքուն անկյունից։

 

 

-Երբևիցե ցանկացե՞լ եք ժամանակը հետ տալ և փոխել Ձեր կյանքը՝ շտկելով սխալները:

 

Նման պահեր շատ են լինում։ Կարծում եմ շատերի մոտ է այդպես, քանի որ մարդիկ միշտ էլ սխալներ անում են, և ես բացառություն չեմ: Շատ կուզեի ժամանակը հետ տալ և կյանքս նորովի դասավորել, բայց միևնույն ժամանակ հարց է առաջանում, թե ինչպիսին կլինեի այսօր: Հիմա ինձ զգում եմ բավականին ինքնավստահ, կայացած և ուժեղ: Եթե սխալներս և շրջադարձերս չլինեին կյանքումս, դժվար թե լինեի այսպիսին, ինչպիսին կամ:

 

-Ի՞նչ սխալների մասին է խոսքը:

 

Ի սկզբանե կընտրեի այն մասնագիտությունը, որով հիմա ցանկանում եմ շարունակել` դիզայներությունը: Հետո անձնական սխալ քայլերը կուղղեի, չնայած որ այդ քայլերը ինձ շատ բան են սովորեցրել:

 

 

-Լյուսիին ի՞նչ է պետք երջանիկ լինելու համար:

 

-Լյուսիին պետք է չջղայնացնել (ծիծաղում է): Լյուսիին պետք է սիրող մարդ: Իրականում ամեն ինչ ունեմ այն, ինչ որ ինձ պետք է: Պարզապես ժամանակ առ ժամանակ զգում եմ ճիշտ տղամարդու կողմից սիրված լինելու պահանջ: Հասկացող ամուսին, ընտանիք, երեխաներ. դրանից ավելի Լյուսիին էլ ոչինչ պետք չէ:

 

 

 

Նյութը` Մելինե Տոնոյանի

 

Լուսանկարները` Կարեն Հովհաննիսյանի

 

Make-up արտիստ` Աշխեն Կոստանդյան