Նարեկ Բավեյանը պատմում է, թե ինչ դժվարությունների է հանդիպել

Այս անգամ Tert.am Life-ի զրուցակիցը երգիչ Նարեկ  Բավեյանն է:

Երգչի հետ խոսեցինք, թե ինչպե՞ս է փոխվել նրա կյանքը հայր դառնալուց հետո, կարողանում է արդյո՞ք անքուն գիշերները համատեղել սիթքոմում նկարահանվելու ու երգչի կարիերան ծավալելու գործում: Մանրամասները զրույցում:

-Կկիսվեք, թե ի՞նչ նոր զգացողություններ է բերել իր հետ Ձեր որդին՝ Մարկը:

-Կյանքումս ամեն ինչ փոխվել է: Մի օր արթնացա ու հասկացա, որ կյանքս  նոր իմաստ է ստացել: Մարկը շատ երջանկացրել է  մեր բոլորի կյանքը: Մի տեսակ տունը ավելի ջերմ է, լուսավոր է, գունավոր է: Այնպիսի զգացում է, որ Մարկը միշտ մեր կյանքում եղել է:

- Մասնակցություն ունենո՞ւմ եք Մարկի խնամքի հարցում:

-Անում եմ գրեթե ամեն ինչ: Լողացնում  եմ, տակդիր  եմ փոխում, քնացնում եմ, եթե կաթիկը պատրաստ է, ապա ծծակով կերակրում եմ: Երբեմն ասում եմ, որ ես առանց կաթ տալու «մայրիկ» եմ:  Գտնում եմ, որ եթե կարող ես օգնել կնոջդ, ապա պիտի անես դա: Հատկապես, այն դեպքում, երբ դա անում ես սիրով:

-Ենթադրում ենք, որ երեխա մեծացնելու անքուն գիշերներից Դուք էլ ճաշակած կլինեք:

- Այն էլ ինչպես ենք ճաշակել: Երբեմն չի թողնում քնենք: Իսկապես պետք է ասեմ, որ շատ օրեր են լինում, երբ ստիպված եմ կիսաքուն աշխատանքի գալ: Հեռուստադիտողներն անգամ կտեսնեն, որ նիհարել եմ: Այսպիսի հետաքրքիր բան է հայրիկ լինելը,  բայց չեմ դժգոհում ու բողոքում: Դժվարությունները, որոնց հանդիպեսի այս 3 ամիսների ընթացքում շատ քաղցր են ու անհամեմատելի:

-Քաղցրության հետ արդեն ճաշակել եք նաև դժվարությունները: Քանի՞ երեխ ևս կցանկանաք ունենալ:

- Ինչքան էլ, որ ծանր ու դժվար է, բայց զուգահեռաբար շատ հաճելի է:  Դեռևս երկրորդ բալիկ ունենալու մասին խոսելը վաղ է, բայց  երկու երեխա ունենալը շատ նախընտրելի է: Դեռ ամեն ինչ առջևում է:

-Շատ երգիչներ ծնողներ դառնալուց հետո սկսում են  տեսահոլովակներ նկարահանել երեխաների, ծնող դառնալու մասին: Այդպիսի ցանկություն չունե՞ք:

-Դա շատ գեղեցիկ գաղափար է իրականում, բայց սերը դրանով չի արտահայտվում: Միանշանակ նման ցանկություն չունեմ, սակայն դեմ էլ չեմ այն երգիչներին, որոնք նման երգեր ու տեսահոլովակներ են թողարկում:

-Ի՞նչ նորություններ ունեք Ձեր երկրպագուների համար:

-Գործնականում նորություններ դեռ լինելու են:  Հիմա Արա Թորոսյանի հետ նոր երգեր ենք պատրաստում:  Մի շարք երգեր ունեմ, որոնք դեռ աշխատանքային պրոցեսի մեջ են: Այս պահին փակագծերը բացել դեռ չեմ ուզում: Շուտով կսկսվի Դոմինոյի նոր եթերաշրջանը և ամենամոտ նորությունս կլինի սիթքոմը: