Ժան և Արման Նշանյանները, Հովհաննես Ազոյանը, Հայկ Մարությանը, Սոս Ջանիբեկյանը՝ «Արմենիա Պրեմիում»-ի նախագծերում

«Հին արքաներ» պատմական բազմասերիանոց հեռուստաֆիլմ, «Ցանկալի փեսացու» ռեալիթի շոու, «Ազիզյաններ» և «Change» սիթքոմեր. հոկտեմբերի 31-ին «Արմենիա Պրեմիում» ալիքով կմեկնարկի 4 նոր, բացառիկ նախագծեր:

 

Ucom-ի բաժանորդները հնարավորություն կունենան դիտելու առաջին բազմասերիանոց հեռուստաֆիլմը, որը կոչվում է «Հին արքաներ»:

 

Ֆիլմը խաղարկային, պատմական ակնարկ է նախաքրիստոնեական ժամանակաշրջանի Հայաստանում՝ Մեծ Հայքում, ծավալվող դրամատիկ իրադարձություններին։ Նկարագրված դեպքերը տեղի են ունենում մեր թվարկությունից առաջ, երբ Հայաստանում պետք է գահ բարձրանար Տիգրան 2-րդ Արտաշեսյանը, ապագայում Արքայից Արքա Տիգրան Մեծը։ Ֆիլմի կիզակետում Տիգրան 1-ի մահից հետո ստեղծված արքունական դավադրություններն են:

 

 

Նշենք, որ ֆիլմում դերերը մարմնավորել են՝ Ժան Նշանյանը, Մուրադ Ջանիբեկյանը, Ռուբեն Մուրադյանը, Շողեր Թովմասյանը, Արման Նշանյանը, Շաքե Թուխմանյանը, Աննա Գրիգորյանը և այլ սիրված դերասաններ: Նախագծի ռեժիսորը Հարություն Շատյանն է:

 

«Կարծում եմ արդեն ժամանակ էր նման նախագիծ ստեղծելու, որպեսզի մեր ապագա սերունդը կրթվի և դաստիարակվի մեր պատմությունով: Համոզված եմ, որ «Հին արքաները» կվայելի հանդիսատեսի սերը: Մենք հին ազգ ենք, և պետք է մեր նոր սերնդին փոխանցենք այն պատմությունը, որն ունենք: Իսկ ինչո՞վ պետք է ներկայացնենք, եթե ոչ ֆիլմի տեսքով: Մենք ունենք շատ գեղեցիկ լեզու, որը պետք է հնչի մեր էկրաններից և կրթի մերօրյա սերնդին: Ուրախ եմ և հպարտ, որ հնարավորություն ունեցանք նկարելու նման բազմասերիանոց  ֆիլմ: Կարծում եմ սա կլինի մեկնարկը, և «Հին արքաներ»-ից հետո նման նախագծերը կլինեն շատ»,- ասաց Շաքեն:

 

 

Հավելենք, որ զգեստները, կենցաղի պարագաները և ժամանակաշրջանի բոլոր առանձնահատկությունները մշակվել են ազգագրագետների, պատմաբանների և հնագետների խորհրդատվությամբ:

 

Հաջորդ նորությունը  «Ցանկալի փեսացուն» իրապատում (reality show) հեռուստանախագիծ է՝ խաղի էլեմենտներով: Ցանկալի փեսացուն՝ Սոս Ջանիբեկյանն է, ով ընտրվել է պրոդյուսերական խմբի անցկացրած հետազոտությունից հետո (սոց. հարցումներ, սոցցանցերի, գլամուրային հեղինակային ամսագրերի մոնիթորինգ): Նախագծին մասնակցելու համար ընտրվել են 12 աղջիկներ, յուրաքանչյուր շաբաթ նրանցից մեկը լքելու է նախագիծը: Վերջնական ընտրությունը կարվի 2 գեղեցկուհիների միջև։

 

«Սա նախագծի է մարդկային զգացմունքների, սիրո, ընտանիք կազմելու, ընտանեկան արժեքների մասին, թե ինչպես կարող է տղամարդը ընտրել իր կողակցին և ինչպես է կինը թույլ տալիս, որ տղամարդը լինի իր կողքին»,- ասաց նախագծի պրոդյուսեր Հրաչյա Քեշիշյանը:

 

 

Հարցին՝ ինչու հենց Սոս Ջանիբեկյանը, պրոդյուսերը պատասխանեց. «Մեր պրոդյուսերական թիմը երկար է մտածել, թե ով կարող է լինել այս նախագծի առաջին մասնակիցը և մենք կանգ առանք Սոսի թեկնածության վրա: Այն պարզ պատճառով, որ ցանկալի փեսացուների շարքում Սոսն առաջիններից մեկն է»:

 

«Արմենիա Պրեմիում» ալիքով  կցուցադրվեն նաև հումորային «Change» և «Ազիզյաններ»  սիթքոմերը: «Change»-ի ռեժիսորը Գրիգոր Վահրամյանն է, իսկ «Ազիզյաններ» -ինը՝ Հայկ և Արման Մարությանները:

 

Change սիթքոմի 24 սերիաներում գլխավոր դերակատար Հովհաննես Ազոյանը ներկայանում է երկու կերպարով:

 

«Երկու դերերով եմ հանդես գալիս, իսկապես բարդ է մարմնավորել տարբեր կերպարներ՝ մեկը քրեական հեղինակություն ունեցող կերպար է, մյուսը՝ անհաջողակ, բայց ազնիվ դերասանի: Սիթքոմի առանցքում գլխավոր գործարքն է՝ «change» լինել»,- ասաց Հովհաննեսը:

 

 

Նշենք, որ ազնիվ դերասանը ստանձնում է իր կյանքի ամենակարևոր և ամենաբարդ դերը: Հումորային-ժամանցային սիթքոմում նկարահանվել են Արմեն Մարգարյանը, Արթուր Նալբանդյանը, Մարիամ Մելիքյանը, Լիլիթ Հարոյանը, Անի Քոչարյանը, Անի Պետրոսյանը:

 

Իսկ «Ազիզյանները» սիթքոմի գլխավոր դերակատարը Հայկ Մարությանն է: Մարմնավորում է Գառնիկ Ազիզյանի կերպարը՝ հագուստի խանութի վաճառող, ընտանիքում միակ աշխատողը: Տիկին Ազիզյանը ծուլանում է կատարել անգամ տնային տնտեսուհու պարտականությունները: Երեք երեխաներին էլ հոր խնդիրները չեն հետաքրքրում. դուստրը ցանցաբնակ է, ակտիվ բոլոր սոցցանցերում, ավագ որդին անհաջողակ և գործազուրկ է, իսկ կրտսեր տղան՝ դպրոցական:

 

«Սա ընտանեկան սիթքոմ է: Ոգեշնչվել եմ իմ մանկության և երիտասարդության սիթքոմից՝ « Married with Children»: Միշտ երազել եմ նման ֆիլմ նկարել, բայց հայկական ընտանիքի մասին: Այսօր դա իրականացրել ենք: Սցենարը բոլորովին նոր է գրվել: Սա հայկական ընտանիքի պատմություն է: Եթե այնտեղ ամերիկյան 80-ականների ընտանիքն է, ապա մեր սիթքոմում՝ 21-րդ դարի: Միայն միտքն է նույնը՝ հայրը աշխատում է, իսկ ընտանիքի մյուս անդամները ծախսում են»,-նշեց Հայկ Մարությանը:

 

 

Ընտանեկան դիտման համար նախատեսված իրավիճակային կատակերգության հերոսներին մարմնավորել են Անի Լուպեն, Սաթենիկ Հազարյանը, Իշխան Ղարիբյանը, Սուրեն Առուստամյանը և այլ հայտնի դերասաններ:

 

Նյութը՝ Մելինե Տոնոյանի

 

Լուսանկարները՝ Կարեն Հովհաննիսյանի