Լիլի Կարապետյանը սիրային եռանկյունում և ռինգում հայտնվելու մասին

12:11 • 20.10.16

Ռուսաստանում բնակվող Լիլի Կարապետյանը հաճախակի է իր հանգիստն անցկացնում Երևանում: Այս տարի ևս բացառություն չէր: Բայց նրա հանգիստն ուղեկցվեց մի շարք գործնական առաջարկներով: Դերասանուհին նախ նկարահանվեց Գոռ Հակոբյանի «Նա է» տեսահոլովակում, ապա «Ֆուլ հաուս» սիթքոմում, իսկ վերջերս Լիլիին տեսնում ենք ռինգում՝ Արամ MP3-ի տեսահոլովակում:

Tert.am Life-ի հետ զրույցում Լիլին պատմեց «Ֆուլ հաուս»-ում իր նոր դերի և նախասիրությունների մասին:

«Երևան եմ վերադարձել ամռանը՝ հանգստանալու նպատակով: Ամեն դեպքում, աշխատանքի անցնելու ծրագրեր չունեի, իսկ տեսահոլովակներում նկարահանվելու առաջարկներ միշտ էլ եղել են, երբ Երևանում եմ եղել: Այս անգամ ծրագրել էի, որ սեպտեմբերին կրկին կմեկնեմ Մոսկվա, ի զարմանս ինձ, այս ընթացքում այնքան տարբեր առաջարկներ ստացա, որ վերանայեցի իմ որոշումը Մոսկվա գնալու և հետաձգեցի: Առաջարկները սկսվեցին Գոռ Հակոբյանի տեսահոլովակում նկարահանվելուց հետո, որը ստացել է Individuum casting-ի կողմից, իսկ «Ֆուլ հաուս»-ում նկարվելու առաջարկը ստացել եմ Արմեն Պետրոսյանի կողմից: Կարծում եմ Գոռի տեսահոլովակից հետո է նա ինձ նկատել և կանչել է քասթինգի»,- պատմեց Լիլին:

Դերասանուհին սիթքոմում մարմնավորում է Լիլիթի կերպարը, որն ինչ-որ չափով նմանեցնում է իրեն:

«Կարծում եմ հեռուստադիտողին կհետաքրքրի կերպարս, քանի որ նա բավականին փոփոխություն է մտցնում գլխավոր հերոսների կյանքում: Լիլիթը, որը Ֆելոյի կուրսից է եղել, Ֆրանսիայում ոճաբանություն սովորելուց հետո վերադառնում է Երևան: Երկարատև դադարից հետո նա և Ֆելոն նորից հանդիպում են և որոշում են միասին ինչ-որ նոր գործ սկսել և բացում են ատելիեի, բայց գործնական հարաբերություները ժամանակի ընթացում փոխվում է անձնականի, քանի որ նրանք շատ ջերմ են միմյանց նկատմամբ: Բնականաբար, դա դառնում է խանդի առիթ Տաթևի կողմից, որը սիրահարված է Ֆելոյին: Եվ դա առաջացնում է բավականին ինտրիգներ: Եվ Լիլիթը, և Տաթևը չեն պատրաստվում հրաժարվել իրենց սիրելի տղամարդուց: Կարծես սիրային եռանկյուն է ստացվում: Հետաքրքիրն այն է, որ «Ֆուլ հաուս»-ում իմ մարմնավորած դերը ինձ շատ նման է: Անգամ մեր անուներն են նույնը՝ Լիլիթ: Ինչպես կերպարս, այնպես էլ ես որոշ ժամանակ ապրել և սովորել եմ Ֆրանսիայում»,- ասաց Լիլին:

Հարցին՝ Ձեր կյանքում եղե՞լ է սիրային եռանկյուն, նա պատասխանեց. «Բարեբախտաբար, «Ֆուլ հաուս»-ի սցենարի նման ինտրիգների մեջ չեմ հայտնվել, սակայն եղել է, որ իմ ընտրած տղամարդուն մեկ այլ աղջիկ էլ է սիրել: Բայց նմանատիպ պայքարի չեմ առնչվել»:

Բավականին երկարատև դադարից հետո Լիլիին կրկին հեռուստաէկրան է վերադառնում:

«Ինձ համար մի փոքր դժվար էր երկարատև դադարից հետո կրկին վերադառնալ հեռուստաէկրան, չնայած որ տեսահոլովակներում նկարվել եմ, բայց դեր կերտել խոսքով չեմ ունեցել: 6 տարի առաջ ինձ համար դա շատ հեշտ էր տրվում, քան հիմա: Կարծում եմ հիմա ավելի պատասխանատվությամբ եմ վերաբերվում դերիս: Նկարահանման առաջին օրերին բավականին լարված եմ եղել, բայց պրոֆեսիոնալ թիմի շնորհիվ հիմա այդ լարվածությունն անցել է»,- նշեց Լիլին:

Լիլին այս ընթացքում ճանապարհորդել է. ապրել է Փարիզում, Մոսկվայում, Երևանում:

«Մոսկվայում փորձել եմ աշխատանք փնտրել, բայց ոչինչ չկարողացա գտնել, որովհետև ես ամեն դեպքում ստեղծագործող մարդ եմ և ինձ չեմ պատկերացնում օֆիսային աշխատանքում: Շատ եմ սիրում ճանապարհորդել: Չեմ պատկերացնում իմ կյանքն առանց դրա: Եթե երկու ամսվա ընթացքում մի տեղ չեմ գնում, ուրեմն սկսում եմ անհարմարավետություն զգալ»,- հավելեց Լիլին:

Դերասանուհին նաև պատմեց Արամ MP3-ի տեսահոլովակում նկարվելու մասին:

«Ես ու Արամը նույն մարզասրահում ենք մարզվում և նա մեր մարզիչից հետաքրքրվել էր, թե ով է ձեզ մոտ ամենասպորտային աղջիկը, որը նաև կհամապատասխանի տեսահոլովակի հերոսուհուն: Այսինքն` բացի արտաքնապես բարետես լինելուց, պետք է նա լիներ ֆիզիկապես պատրաստված, որովհետև տեսահոլովակի իմաստ այն է, որ աղջիկը սպորտսմենուհի է, իսկ տղան ոչ: Մարզիչը խորհուրդ էր տվել ինձ: Սա շատ հետաքրքիր առաջարկ էր ինձ համար: Իրականում սպորտն ինձանից հեռու չէ, ես ամեն օր մարզվում եմ տարբեր մարզաձևերով: Ես ինձ նաև ռինգում էի ուզում տեսնել և ես տեսա (ժպտում է)»,- ասաց Լիլին:

Դերասանուհու խոսքով՝ սպորտ իր համար երջանկության գրավականներից մեկն է:

«Ես չեմ պատկերացնում իմ կյանքն առանց սպորտի: Պրոֆեսիոնալ մարզաձևով, ցավոք սրտի, չեմ զբաղվել, բայց միշտ կրկնում եմ այն խոսքը, որ իմ մեջ մահացավ օլիմպիական չեմպիոն կամ պրոֆեսիոնալ մարզիկ: Չեմ կարծում, որ այս տարիքում կկարողանամ ինչ-որ բանի հասնել: Եթե հնարավորություն լինի ցանկանում եմ վերսկսել ձիասպորտի դասընթացները»,- եզրափակեց Լիլին: