Սոնա Ռուբենյանը, Հայկ Պետրոսյանը, Սևակ Ամրոյանը և այլք «The Beautified Project»-ի 4-րդ ալբոմի շնորհանդեսին (լուսանկարներ)

Հովհ. Թումանյանի անվան Պետական տիկնիկային թատրոնում hոկտեմբերի 24-ին կայացավ «The Beautified Project» ռոք խմբի «Pale Nightingale» ալբոմի շնորհանդեսը, որը թարգմանաբար նշանակում է «Գունատ սոխակ»:

 

Խմբի անդամներ Անդրե Սիմոնյանը, Արմեն և Առլեն Շավերդյանները Tert.am Life-ի հետ զրույցում նշեցին, որ ալբոմում տեղ են գտել 8 կատարումներ:

 

«Ալբոմն անվանվել ենք «Գունատ սոխակ», որովհետև սոխակի երգը համարվում է ամենագեղեցիկ ձայներից մեկը բնության մեջ, բայց ժամանակի ընթացքում նվազել է այդ թռչունների երգը, ինչպես որ նվազել է որակյալ երաժշտությունը: Ալբոմի շապիկին սոխակն արտահայտված է աղջկա տեսքով, որը շղարշի միջոցով թաքնվում է աշխարհից»,- ասաց Անդրեն:

 

«Pale Nightingale» ալբոմում ներառված է 7 անգլալեզու երգ, որոնցից մեկը զուգերգ է Սոնա Ռուբենյանի հետ: Ալբոմում է նաև «Արագիլ» հայերեն երգը:

 

 

«Մենք շարունակում ենք այն սկզբունքով աշխատել, որ յուրաքանչյուր նոր ալբոմում պետք է տեղ գտնեն հին և սիրված կատարումները մեր մատուցմամբ: Այս անգամ «Արագիլ» երգն ենք մշակել, որը կոչ է բոլոր սփյուռքահայությանը, որ վերադառնան հայրենիք»,- ասաց Առլեն Շավերդյանները:

 

Ինչպես նշեցին տղաները ալբոմում ներառված են Անդրե Սիմոնյանի և Առլեն Շավերդյանի հեղինակած ստեղծագործությունները, բայց մեծ իմաստով՝ բոլոր կատարումները ստեղծել են երեքով միասին:

 

«Ես ծանր ռոքի սիրահար եմ և ուզում էի, որ մեր 4-րդ ալբոմում ամբողջությամբ ծանր ռոք լինի, սակայն տղաները չհամաձայնեցին և հիմնականում ակուստիկ ռիթմերով ստեղծագործություններ ներառեցին ալբոմում, չնայած որ ես ծանր ռոքի տարրեր էլ եմ ավելացրել»,- ավելացրեց Արմենը:

 

 

Նոր ալբոմի կատարումները եկել էին ունկնդրելու Հայկ Պետրոսյանը, Սևակ Ամրոյանը և շատ ու շատ ուրիշներ:

 

Ռոք խմբի անդամները համերգը մեկնարկեցին իրենց առաջին, երկրորդ և երրորդ ալբոմների հիթային կատարումներով, հետո նոր ներկայացրեցին 4-րդ ալբոմն ամբողջությամբ:

 

 

Նյութը՝ Մելինե Տոնոյանի

Լուսանկարները՝ Կարեն Հովհաննիսյանի