Դիանա Շատվերյան. «Ուրախ եմ, որ աղջիկս սիրում է գեղեցիկ հագնվել»

Դիզայներ Դիանա Շատվերյանն ու դուստրը՝ 4-ամյա Վիվիենը, միշտ աչքի են ընկնում նորաոճ հագուկապով: Tert.am Life-ը նրանց հետ ամանորյա ֆոտոշարք է արել, որին մայր ու աղջիկ ներկայացել են Դիանայի աշուն-ձմեռ նոր հավաքածուի զգեստներով:

 

Դիանայի հետ զրուցել ենք ընտանիքի, դստեր հետ հարաբերությունների և Ամանորի մասին:

 

-Դիանա, որտե՞ղ և ու՞մ հետ եք դիմավորելու Ամանորը:

 

-Ինչպես ամեն տարի, տարեվերջյան այս օրերին դեռ չեմ կարող այդ հարցին պատասխանել:) Աշխատանքային ծանրաբեռնվածությամբ պայմանավորված՝  դեռ չեմ հասցրել պլանավորել թե որտեղ եմ գտնվելու Ամանորի գիշերը:

 

Ինձ համար ավելի կարևոր է, թե ում հետ եմ նշելու տոները, իսկ այդ հարցի պատասխանը ես միշտ գիտեմ, այն է՝ ընտանիքիս և մտերիմ ընկերներիս հետ: Ամանորը համարում եմ ընտանեկան տոն և լավ առիթ ընտանիքի անդամների, մտերիմ ընկերների հետ շփվելու և լավ ժամանակ անցկացնելու համար:

 

 

-Տանն ինչպե՞ս եք կազմակերպում Նոր տարին: Հայկական ավանդական Ամանո՞ր եք անում:

 

-Եթե այնպես է ստացվում, որ Հայաստանում եմ դիմավորում Նոր Տարին, տանը հյուրընկալում եմ հարազատ ու մտերիմ մարդկանց, ինչպես նաև երբեմն ինքս եմ հյուր գնում:

 

-Վիվիենի համար պահո՞ւմ եք Ամանորյա հեքիաթը: Հավատո՞ւմ է Ձմեռ պապիկին:

 

-Իհարկե: Որքան երկար հավատա և իր մեջ ապրի հեքիաթը, այնքան լավ: Ես այդպիսին եմ եղել ու դրա շնորհիվ ամեն ինչ ավելի լուսավոր եմ տեսնում շրջապատում: Կուզեմ նույնն էլ Վիվիենի հետ լինի:

 

Քանի որ դեռևս գրել չգիտի, Ձմեռ պապիկին վիդեոնամակ ենք ուղարկել, որում նա շատ արագ պատմում է, թե ինչ է արել տարվա ընթացքում, ինչ սխալներ է թույլ տվել ու բացատրում, թե ինչու է արել դրանք, որպեսզի նվերը չտուժի:)

 

Այս տարի Ձմեռ պապիկից ամբողջական խոհանոց է ուզել՝ սպասքով, ծորակով և այլն: Ինձանից էլ խնդրել է իսկական մթերք, որպեսզի խոհանոցի բացումն անի ու ինձ համար ինչ-որ բան պատրաստի:

 

 

-Ձեզ ընկալում են որպես նորաոճ մայր ու աղջիկ: Հաճախ միանման եք հագնվում: Ամեն հարցո՞ւմ ես փորձում աղջկադ քեզ նմանեցնել:)

 

-Փաստ է, որ երկուսս էլ սիրում ենք գեղեցիկ հագնվել: Ուրախ եմ, որ աղջիկս ինձ նման է: Ես իրեն այդպիսին չեմ դարձրել, ինքն այդպիսին է: Չնայած փոքր տարիքին՝ ցանկացած հարցի վերաբերյալ ունի իր դիրքորոշումը, ինչի համար շատ ուրախ եմ:

 

Ինքը սիրում է, երբ միանման ենք հագնվում: Երբ մի բան հագնում եմ, հարցնում է՝ իսկ փոքրը լինելո՞ւ է:) Եթե զգայի, որ իրեն դուր չի գալիս, չէի բռնանա նրա կարծիքին:

 

Վիվիենը իմ ոգեշնչման աղբյուրն է. Մանկական հագուստ ստեղծելու բոլոր մտքերիս աղբյուրը նա է:

 

-Ամուսինդ ինչպե՞ս է արձագանքում, երբ միանման եք հագնվում:

 

-Ուրախանում է, սիրում և հիանում:) Ամուսինս չի ազդում մեր աղջկական մթնոլորտի վրա:

 

 

-Իսկ ի՞նչ նախասիրություններ ունի Վիվիենը: Դիզայն սիրո՞ւմ է:

 

-Սիրում է ձեռքի աշխատանք: Շատ է սիրում պլաստիլինից ինչ-որ բաներ պատրաստել: Անկախ նրանից՝ ինչ ենք նվիրում իրեն, հետը պետք է պլաստիլին էլ լինի:

 

Սովորաբար երեխաները համբերատար չեն, սակայն թղթից ինչ-որ բան պատրաստելուն Վիվին կարող է երկար ժամանակ տրամադրել: Թղթերը շատ մանր մասերի է բաժանում, ստեղծում իր փազլը և հավաքում: Կարող է կոնֆետի թղթից զգեստ պատրաստել տիկնիկի համար: Դա ինձ շատ է ուրախացնում: Կրեատիվ մտածողություն ունի, բայց չգիտեմ՝ հետագայում ինչ ուղղությամբ կգնա: Չեմ ցանկանում որևէ ազդեցություն ունենալ իր ընտրության վրա:

 

Իհարկե, քեզ ոչ ոք չի արգելում երեխայիդ հետ կապված պլաններ կազմել:) Պարզապես քեզ զսպում ես, որպեսզի նրան չպարտադրես որևէ բան: Ամուսինս տնտեսագետ-իրավաբան է, ես՝ դիզայներ, իրարից շատ տարբեր մասնագիտություններ: Թե ինքն ինչ ուղղությամբ կգնա, չեմ կարող ասել: Հիմա ես իր մեջ տեսնում եմ սեր արվեստի հանդեպ, սակայն վաղ է ասել՝ որ ճյուղը կզարգանա իր մոտ ավելի շատ:

 

 

-Ինչպիսի՞ մայր ես: Խի՞ստ ես:

 

-Անբացատրելի է մայրական սերը երեխայի հանդեպ. կյանքումդ ամեն ինչ իր շուրջ է պտտվում: Ճիշտ դաստիարակությունը շատ կարևոր է: Չեմ կարծում, որ երեխան պետք է անի այն ամենը, ինչ մտքով անցնում է, սակայն դիտողությունները խիստ ձևով չեն արվում վերջինիս, որպեսզի նա ավելորդ սթրեսի չենթարկվի: Հաճախ կատարված սխալը բացատրում ենք հեքիաթների հերոսների միջոցով: Ես և ամուսնիս որոշել ենք, որ երբեք նրա հետ բարձր տոնով չենք խոսելու, նրան մեր զայրույթը ցույց չենք տալու, այլ խաղերի ու հեքիաթների միջոցով բացատրելու ենք մեր ուզածը: Արդյունքում Վիվիենն ինքնուրույն ասում է՝ չեմ ուզում այս հերոսի պես լինել: Մեկ տարեկանից սկսած նրան այդ մեթոդով ենք դաստիարակել: Իր համար դա այնքան սովորական է, որ չի էլ պատկերացնում, որ սխալի համար զայրանում են կամ պատժում:

 

-Իսկ սահմանափակումներ լինո՞ւմ են:

 

-Կարծում եմ՝ երեխան պիտի վայելի իր մանկությունը: Չեմ կարծում, որ երեխայի հանդեպ պետք է ռեպրեսիվ մեթոդներ կիրառել: Վստահ եմ, որ խաղերի միջոցով ծնողը կարող է դաստիարակել երեխային: Այդ դեպքում երեխան չի էլ կասկածում, որ խաղի միջոցով կիրառում ես սահմանափակումներ:

 

Մանկական հոգեբանության ուսումնասիրության վերաբերյալ կան գիտական աշխատություններ, հետազոտություններ, որոնց մասին յուրաքանչյուր ծնող պետք է ունենա համապատասխան տեղեկություններ: Չի կարելի երեխայից խլել իր մանկական լավագույն հիշողությունները: Ես ունեցել եմ անհոգ ու երջանիկ մանկություն, սիրով հիշում եմ այն, որի համար շնորհակալ եմ և գնահատում եմ ծնողներիս: Որպես ծնող կուզենայի, որ երեխայիս կողմից երբևէ նման գնահատականի արժանանայի:

 

 

-Ամուսնուդ հետ ունենո՞ւմ եք տարաձայնություններ՝ կապված երեխայի դաստիարակության հետ:

 

-Երեխայի դաստիարակության հարցում գլոբալ առումով մենք միանման ենք մտածում: Տարաձայնությունների առկայության դեպքում Վիվին դրանց մասին չի իմանում: Նրան ասում ենք մեր քննարկման արդյունքում ձևավորված միասնական կարծիքը: Ամուսիններով կարծում ենք, որ սխալ է, երբ ծնողներից յուրաքանչյուրը նույն հարցի կապակցությամբ երեխային տարբեր խորհուրդներ է տալիս:

 

-Քո զբաղվածության պատճառով Վիվիենը տուժո՞ւմ է: Երբ տանը չես, դայակի օգնությա՞նն ես դիմում:

 

-Շատ կցանկանայի ավելի շատ ժամանակ անցկացնել իր  հետ: Եթե աշխատում ես, պետք է ժամանակ հատկացնես նաև գործիդ: Վիվին արդեն մանկապարտեզ է գնում, ունի իր ընկերները, շրջապատը, համերգների և հանդեսների է մասնակցում: Փորձում եմ, որքան հնարավոր է՝ շատ ժամանակ անցկացնել իր հետ, սիրով գնում ենք իր համերգներին: Այս տարի կայանալիք մանկապարտեզի համերգի ժամանակ ձյունանուշիկն ինքն է լինելու: Երբ երեխադ մի տարի պատրաստվում է ինչ-որ բանի ու տեսնում ես արդյունքը, շատ հուզիչ է:

 

 

-Զույգի համար շատ կարևոր է նաև միասին ժամանակ անցկացնել: Սակայն թե´ երեխան, թե´ աշխատանքը պահանջկոտ են ժամանակի առումով: Հասցնո՞ւմ եք իրար էլ ժամանակ տրամադրել:

 

-Այո, երեխան մի կողմից, աշխատանքը մյուս կողմից... Եթե որևէ մեկը կարողանար ասել՝ որն է իդեալական տարբերակը, կյանքն անհետաքրքիր կդառնար: Փորձում ենք պահել ոսկե միջինը, որպեսզի երեխային էլ ժամանակ տրամադրենք, մեր աշխատանքն ու անձնական հարաբերություններն էլ չտուժեն: Երբեք չենք զոհաբերում մեկը՝ մյուսը պահելու համար: Ընտանիքում պետք է լինի այդ ներդաշնակությունը, որպեսզի երեխան էլ տեսնի ու սովորի:

 

-Ժամանցն ավելի հաճախ դրսո՞ւմ եք անցկացնում, թե՞ տանը:

 

-Սիրում եմ տանը լինել, սակայն ավելի շատ դրսում ենք լինում:) Ժամանցի առումով վերջերս ավելի ընտանեկան-ընկերական մթնոլորտում ենք լինում՝ կա´մ մեր, կա´մ մեր ընկերների տանը:

 

 

-Աղջիկդ լավ է տիրապետում ռուսերենին, առօրյայում նաև ռուսերեն է խոսում: Ինչո՞վ է դա պայմանավորված:

 

-Ես ու ամուսինս մտածեցինք, որ ճիշտ կլինի, եթե Վիվին վարժ տիրապետի օտար լեզուների: Հիմա արդեն նա գերազանց տիրապետում է ռուսաց լեզվին, շատ արագ սովորեց նաև անգլերեն, սակայն մայրենի լեզվին հատուկ ուշադրություն ենք դարձնում: Ընտանիքի անդամներով կատարել ենք դերաբաշխում և յուրաքանչյուրս իր հետ խոսում ենք մի լեզվով, որպեսզի իր մեջ հավասարապես զարգանան երեք լեզուները:  Հաճախ ասում են՝ այդ դեպքում երեխայի միտքը կարող է ծանրաբեռնվել և նա կարող է ուշ խոսել, սակայն Վիվին 1 տարեկանից անկաշկանդ խոսում է 3 լեզվով:

 

 

Լուսանկարները՝ Կարեն Հովհաննիսյանի

Նկարահանումներն իրականացվել են Avenue des fleurs խանութ-սրահում