Գևորգ Մարտիրոսյանը սպորտային լրագրողից ու հոգևորական երգչից մինչև հայկական շոու բիզնես ճանապարհի մասին

22–ամյա Գևորգ Մարտիրոսյանը իր առաջին քայլերն է անում հայկական շոու բիզնեսում։ Երգիչն օրեր առաջ ներկայացրեց առաջին էստրադային կատարումը, որը կոչվում է «Դու հայտնվեցիր»։ Tert.am Life–ի հետ զրույցում Գևորգը պատմել է երգարվեստ մուտք գործելու, նախասիրությունների ու առաջիկա ծրագրերի մասին։

–Գևորգ, ինչքա՞ն ժամանակ է, ինչ երգում եք։

–5 տարեկանից երգել եմ Սուրբ Սարգիս եկեղեցու «Մանկունք» խմբում։ Ամեն կիրակի կատարում էինք պատարագի հոգևոր երգերը: Ավելի հասուն տարիքում, երբ ձայնս փոխվեց, սկսեցի զբաղվել դաշնամուրով։ Ավարտել եմ Երևանի Ալեքսանդր Աճեմյանի անվան երաժշտական դպրոցը, որտեղ սովորել եմ որպես դաշնակահար: Այդ ժամանակ նաև ժողովրդական, աշուղական երգերով էի հետաքրքրված։ Ընդունվեցի Ջիվանու աշուղական դպրոց, ապա Երևանի Մշակույթի համալսարան: Դասախոսներս Շոթա Վարդանյանն ու Էդվարդ Բեգլարյանն էին։ Աշուղական ու ժողովրդական կատարումներ ունեմ։ Հիմա ինձ փորձում եմ էստրադայի ժանրում։ Մի քանի օր առաջ ներկայացրեցի երգի պրեմիերան։ «Դու հայտնվեցիր» երգի խոսքերի և երաժշտության հեղինակը Հովհաննես Ալեքսանյանն է, գործիքավորումը և համադրումը կատարել է Գևորգ Հովհաննիսյանը։ Շատ ուրախ եմ, որ նրանք իմ կողքին են, քանի որ իրենց խորհուրդներով ինձ շատ են օգնում երգարվեստում ու ճիշտ ճանապարհի վրա դնում։

–Հետաքրքիր ճանապարհ եք անցել` հոգևորական երգերից մինչև էստրադա։ Ինչպե՞ս ընդունվեցիք «Մանկունք», ինչո՞ւ սկսեցիք երգել ժողովրդական, ի՞նչն է պատճառը, որ հիմա փորձում եք Ձեզ էստրադայում։

-Մայրս ժամանակին պարուհի է եղել, բայց չի շարունակել։ Այն ժամանակ բարքերն ուրիշ էին, արգելքներ կային։ Մեր շենքում ապրում էր «Մանկունք» խմբի ղեկավարը։ Մայրս մեծ եղբորս տարել է նրա մոտ, որպեսզի լսի ձայնային տվյալներ ունի` երգեցողությամբ զբաղվելու համար։ Պարզվել է` եղբայրս երգել չգիտի։ Հետո մայրս ինձ է փորձել։ Շոթա Վարդանյան զգացել է,  որ ձայնային տվյալներ ունեմ առաջարկել է երգել «Մանկունքում»։ Ես փոքր էի, շատ բան չէի հասկանում, բայց սիրով էի գնում։ Որոշ ժամանակ դադար վերցրեցի ձայնիս մուտացիոն շրջանի պատճառով։ Երբ ցանկացա վերսկսել երգել, «Մանկունքը» լուծարվել էր։ Քանի որ  հետաքրքրությունս ժողովրդական երգի հանդեպ մեծ էր, սկսեցի երգել աշուղական, ժողովրդական երգեր։ Սովորելու տարիներին հասկացա, որ ժողովրդական ճիշտ երգեր մինչ այդ չեմ լսել, քանի որ վերջին շրջանում շատ են աղավաղել։ Ոճս փոխվեց։ Ժողովրդական երգերի մեջ շատ մեծ կյանք ո հարստություն կա, որը բարձիթողի վիճակում է։ Հայրենիքը ոչ միայն զենքով են պաշտպանում, այլև` մշակույթով։ Չէի ասի, որ այլևս չեմ երգի ժողովրդական երգեր։ Էստրադան տարածված է մեր ժողովրդի մեջ, հիմա  երկու ժանրերով էլ երգում եմ։ Էստրադան ժողովրդականից այդքան էլ չի տարբերվում։ Եթե ճիշտ ես երգում, դա դառնում է քո ոճը։

–Հայկական շոու–բիզնեսում բարձունքների հասնելու ցանկություն ունե՞ք։ 

-Ցանկությունս ոչ թե բարձունքներ գրավելն է, այլ ժողովրդի մեջ մեր մաքուր երգարվեստը պահպանելը։ Իմ նպատակն այն է, որ միջնորդ լինեմ աշուղական, էստրադային երգերի միջև և ներկայացնեմ ոչ թե օտարացած, այլ ճիշտ տարբերակները։ Բարձունքները ժամանակի ընթացքում կլինի, եթե վայելեմ ժողովրդի սերը։

–Մինչ այս նախագծերի, մրցույթների մասնակցե՞լ եք։

–2012 թվականին Վրաստանում մասնակցել եմ «Autumn Motives» միջազգային փառատոնին` նվաճելով «Հանդիսատեսի համակրանք» պատվոգիրը: 2014 թվականին մասնակցել եմ Գյումրու «Վերածնունդ» փառատոնին` նվաճելով պատվավոր երկրորդ հորիզոնականը: Հիմա սպասում եմ «Ժողովրդական երգիչ» նախագծին։

–Օրեր առաջ կայացավ «Դու հայտնվեցիր» երգի պրեմիերան։ Ո՞ւմ մասին է այն։

–Կոնկրետ ոչ ոքի նվիրված չէ: Նրա մեջ միայն սեր է դրված: Կարծում եմ` շատերը կտեսնեն իրենց այս երգում:

–Առաջիկայում կա՞ն նոր երգեր, տեսահոլովակներ։

–Ընկերներիս հետ որոշել ենք, որ կներկայացնենք նոր երգեր, կաշխատեմ ձայնասկավառակիս վրա ու կնկարահանեմ նոր տեսահոլովակ։

–Գևորգ, զբաղվում եք նաև լրագրությամբ, թղթակցում եք  Armsport–ին։ Ո՞րն է Ձեզ համար ավելի հոգեհարազատ` երգարվե՞ստը, թե՞ լրագրությունը։

–Միանշանակ երգը, քանի որ այն ինձ համար կյանք է, իսկ սպորտային լրագրությամբ զբաղվելը հոբբի է։ Աշխատանքային օրվա վերջում ժամանակ առ ժամանակ հոգնում եմ սպորտից, բայց երգը չեմ կարող մոռանալ, որտեղ էլ լինեմ։ Առանց երգի չեմ կարող։