Դիանա Շատվերյանը քննում է Met Gala 2017-ի համաշխարհային աստղերի զգեստները

Նյու Յորքի Մետրոպոլիտեն թանգարանում կայացել է արևմտյան աստղերի կողմից ամենասպասված ու սիրված միջոցառումներից մեկը՝ Met Gala 2017-ը, որին ներկա են եղել ամերիկյան շոու բիզնեսի, Հոլիվուդի ու մոդելային ասպարեզի ամենաճանաչված դեմքերը: Համացանցում շարունակվում են բուռն քննարկումները աստղերի  զգեստների մասին: Tert.am Life-ը  Met Gala 2017-ի մասին զրուցեց դիզայներ Դիանա Շատվերյանի հետ:

Վերջինս նշեց, որ Met Gala-ն իր համար սպասված է այնքան, որքան «Օսկարը»։ «Առհասարակ սիրում եմ միջազգային նման միջոցառումների հետևել, քանի որ ինձ հետաքրքիր է, թե ինչ զգեստներ են հագնում համաշխարհային աստղերն այդ օրերին: Ամեն տարի նրանք ցանկանում են զարմացնել բոլորին, ինչն, իրականում, շատ բարդ է: Հագուստի աշխարհում արդեն ամեն ինչ բացահայտված է: Հեծանիվ հորինել, պարզապես, հնարավոր չէ: Մենք կարող ենք հիանալ որևէ մեկի գեղեցիկ զգեստով կամ ինչ-որ մեկի ճաշակին համաձայնել, մյուսին՝ ոչ: Բայց լինում են մարդիկ, որոնք միտումնավոր այնպիսի կերպարով են ներկայանում, որ իրենց մասին խոսեն: Այս դեպքում այդպես էր արել, օրինակ, Ռիհաննան: Նրա կերպարը ես կհամարեմ լավ PR քայլ: Իհարկե, դու իրեն կնայես, կդիտես որպես էպատաժային կերպար, ինչպես անում էր Լեդի Գագան, բայց որքանով է այն հաճելի, դատում ես ինքդ: Շատ բարդ է հիմա որևէ մեկին ինչ-որ բանով զարմացնել: Ինձ Met Gala-ում միայն կարող է զարմացնել մարդկանց ոճային փոփոխությունը»,- նշեց Դիանան:

Դիզայներն արդեն ունի իր սիրված և չսիրված կերպարները: «Ճիշտ է, ամբողջությամբ չեմ հետևել, քանի որ այդ ժամանակ ես Մոսկվայի ճանապարհին էի, բայց ունեմ հավանած և չհավանած զգեստներ:  Ինձ դուր են եկել Թոմի Հիլֆիգերի մոդելավորած զգեստը, որը հագել էր Ջիջի Հադիդը, հավանել եմ Պրիյանկա Չոպրայի զգեստը, որը կարմիր գորգի մշտական ֆավորիտներից է։ Ինձ դուր են եկել Atelier Versace-ի զգեստները, որոնք հագել էին Բլեյք Լեյվլին և Քայլի Ջեները։ Շատ եմ հավանել Կարա Դելևինի զգեստը, որը Chanel-ից է ու Քենդալ Ջեների զգեստը, որը La Perla–ից է: Սրանք այն ոճի զգեստներն են, որոնք հոգեհարազատ են ինձ: Չեմ հավանել Քիմ Քարդաշյանի զգեստը, քանի որ նա ավելի հետաքրքիր կերպարով կարող էր ներկայանալ: Ինձ դուր է եկել նրա դիմահարդարումը, սանրվածքը, հագուստը՝ ոչ: Ռիհաննայի զգեստը ևս չեմ հավանել: Նախընտրում եմ մտածել որպես PR քայլ, որը ամենաքննարկված զգեստներից է»,- եզրափակեց Դիանան: