«Բարունն իրեն շատ սառն էր պահում». Վարդան Սարգսյանը Արնավի դերակատար Բարուն Սոբտիի աստղային հիվանդության և նրա հետ հանդիպման մասին

 

Երգիչ Վարդան Սարգսյանը, ով տևական ժամանակ է հեռուստադիտողներին ներկայանում է «Տնից հեռու» հաղորդման շրջանակում, անակնկալ ունի իր հեռուստադիտողների համար։ Նա կրկին գնացել է Հնդկաստան և հարցազրույցներ արել Հայաստանում մեծ տարածում գտած հնդկական սերիալների հերոսների հետ։

 

 

Նրա հաղորդումը ATV–ի եթերում կլինի երկուշաբթի օրվանից` ժամը 20։00–ին։ Մինչ այդ Վարդանը Tert.am Life–ին պատմել է իր տպավորությունների մասին։ Վարդանը հարցազրույց է արել Բարուն Սոբտիի, Ռոհիտ Խուրանայի, Սպանդան Չատուրվեդիի, Ռաշամի Դեսայի, Նանդիշ Սանդուի և այլոց հետ։

 

 

Վարդանը հայտնեց, որ ամեն հաղորդման շրջանակում կներկայացնի 1-2 հարցազրույց։ Նա դերասաններին ուղղել է այն հարցերը, որոնք իրեն նախապես ուղարկել են հեռուստադիտողները։ 

 

 

–Վարդան, երկուշաբթի օրվանից կսկսվի «Տնից հեռու» հաղորդման նոր եթերաշրջանը, որի շրջանակներում անդրադարձաք հնդկական սերիալների դերասաններին, որոնք մեծ ճանաչում ունեն Հայաստանում։ Կպատմե՞ք նկարահանումների ընթացքի մասին։

 

–«Տնից հեռու» հաղորդման շրջանակներում սկզբունքորեն մի երկիր 2 անգամ չենք այցելում։ Առաջին եթերաշրջանում ես նկարահանել էի Հնդկաստանը, շատ հետաքրքիր նկարահանումներ էինք ունեցել։ Ներկայացրել էինք` ինչպես են ապրում հարուստից աղքատ, պատմական վայրերը, եկեղեցիները, ինչպես են մահացածներին վառում Գանգես գետի ափին և այլն։

 

Երբ մեր երկրում աժիոտաժ ստեղծվեց հնդկական սերիալների շուրջ, բազմաթիվ նամակներ էինք ստանում այդ մասին։ Որոշեցի բացառություն անել, մեկնել և նկարահանել դերասաններին։ Պարզվեց, ամեն ինչ շատ ավելի բարդ էր, քան ես պատկերացնում էի, սակայն նախորդ այցելությանս ժամանակ ծանոթություններ էի ձեռք բերել, որոնք ինձ շատ օգնեցին։ Ծանոթներիս միջոցով կարողացա նկարահանել, գրեթե, բոլորին։

 

Իրենց մոտ դերասանների հետ նկարահանում անելու համար ժամը գումար արժե։ Խոսքը տասնյակ հազարավոր դոլարների մասին է, որը մենք չունեինք։ Մեզ հարկավոր էր անվճար նկարահանումներ անել, ինչը կարողացա անել։

 

Նախորդ այցիս ժամանակ մի խումբ դերասանների նկարահանել էի, սակայն բազմաթիվ նամակներ էի ստանում, որ նկարահանեմ նաև «Արմենիա TV»–ի «Ինչ կոչել այս սերը» սերիալի գլխավոր հերոս Բարուն Սոբտիին։ Ինձ այնքան էին գրում, չէի  ուզում Ֆեյսբուք մտնել։) Վերջերս նորից մեկնեցինք և նկարահանեցի նաև նրան։ Այս անգամ պետք է նկարահանեինք նաև Քուշիի դերակատար Սանայային։ Հրաշալի անձնավորություն է, նրա հետ շփվում էինք, ամուսնու հետ կապի մեջ էինք, սակայն չկարողացանք նկարահանել, քանի որ մասնակցում էր պարային մրցույթի, իսկ հաջորդ օրը մենք էինք մեկնում։

 

 

–Ինչպե՞ս անցան նկարահանումները նրա հետ։ Ի՞նչ տպավորություններ ստացաք։

 

– Իր նկարահանումը բավականին բարդ ստացվեց։ Շատ ծանոթներ պետք եկան։ Ես իհարկե, հասկանում եմ, որ իրենք ծանրաբեռնված են, քանի որ ինչ–որ սերիալում  նկարահանվելը տևում է 2-3 տարի` ամեն օր։ Մարդիկ հոգնում են և չես կարող մեղադրել, որ փոքր երկրի համար հարցազրույց տալու ժամանակ չեն գտնում։ Սակայն եթե ես մի բան որոշում եմ, անպայման իրականացնում եմ։ Զարմացա, որ կարողացա Մումբայում գտնել մարդկանց, որոնց խոսքը շատ կարևոր էր իր համար, սակայն ստացվեց, և նա մերժելու այլընտրանք ուղղակի չուներ։

 

–Մարդկային  շփումն իր հետ ինչպե՞ս էր։

 

–Թուրքիայում նա այնքան հարուստ երկրպագուներ է ունեցել, որ իրեն հրավիրել են ու շեյխի կյանք պարգևել։ Անբացատրելի հյուրընկալության է արժանացել, ինչից հետո, նրա մոտ ինչ–որ չափով աստղային հիվանդություն էր հայտնվել։

 

Ես իր հետ մոտ 10 օր շփվել եմ հեռախոսով, իսկ առերես շփվել ենք մոտ կես ժամ։ Ինձ վրա թողեց համեստ տպավորություն, սակայն ավելի սառն էր, քան մյուս դերասանները։ Մեր թիմի անդամները նկարվում էին մյուս դերասանների հետ, գրկում նրանց, իսկ ինքն իրեն շատ սառն էր պահում, թույլ չէր տալիս որևէ մեկն իրեն դիպչի։ Լուսանկարներից էլ երևում է այն պատը, որն ինքը ստեղծել էր։ Ըստ իս` դա աստղային հիվանդության փոքրիկ դրսևորում է։

 

 

–Ո՞ւմ հետ էր ամենից հեշտ աշխատելը։

 

–Տապասիայի դերակատար Ռաշմիի։ Ես իր համար խելագարվում եմ։ Հրաշք անձնավորություն է։

 

–Դերասաններից ոմանց մասին դրական եք արտահայտվել, ոմանց մասին` բացասական։ Նրանց հետ շփումը բա՞րդ էր։

 

– Մեծ մասը շատ լավ մարդիկ են և սպասում են Հայաստան այցին։ Ես իրենց հետ շատ ջերմ, ընկերական հարաբերություններ ունեմ։

 

Բացասական եմ արտահայտվել Իչայի դերակատար Թինա Դատայի մասին, քանի որ նա ունի աստղային հիվանդություն։ Ինձ հետ շատ կոպիտ խոսեց, ասաց, որ իրեն չի հետաքրքրում առաջարկը, շատ զբաղված է։ Սկզբում ինձ թվաց, որ ինձ մոտ է այդպիսի տպավորություն, սակայն երբ շփվեցի իր գործընկերների հետ, որոնք շատ մտերիմ են իրար հետ և տեսա, որ որևէ մեկը չցանկացավ զանգահարել Թինային, հասկացա, որ  խնդիրն իմ մեջ չէ։

 

Նույնիսկ եթե նա ունենա այն փառքը, որն իրականում չունի, իրեն այդպես պահելու  իրավունք չունի։ Դա պրոֆեսիոնալ չէ։ Գոյություն ունի պատասխանի ադեկվատ ձև։ Եթե ինքն ինձ խնդրի էլ չեմ նկարաահնեի իրեն, մի գրամ ցանկություն չունեմ իրեն տեսնելու։ Ես չեմ սիրում անտակտ մարդկանց։ Այդ բառը շատ սազական է իրեն։

 

 

–Տեղյակ եմ, որ ծրագրում եք իրենց Հայաստան հրավիրել։ Ի՞նչ փուլում են բանակցությունները։

 

–Ուզում եմ ամեն բան անել, որ իրենք գան Հայաստան։ Դերասանների հետ ունեմ պայմանավորվածություններ, այժմ այդ մասով բանակցություններ են գնում։ Դա ենթադրում է ֆինանսական մեծ ծախսեր` սկսած իրենց թռիչքից, այստեղի կացությունից, մինչև վճարումները, քանի որ իրենք, բնականաբար,  անվճար չեն գա։

 

–Հիմնականում նրանք իրենց երկրում չունեն  այն համբավը, ինչ Հայաստանում։ Թվում է` իրենց հետ աշխատելը պետք է հեշտ լինի, սակայն, կարծես թե, համագործակցության համար գործ ունենք մեծ գումարների հետ։

 

–Հնդիկները հետաքրքիր մտածելակերպ ունեն։ Երբ հասկանում են, որ ունեն մեծ պահանջարկ տվյալ երկրում, թվերը բարձրացնում են։ Իսկապես, Հնդկաստանում, նրանք այդքան ճանաչում չունեն, իրենց մեգաաստղեր համարել չեն կարող, քանի որ այնտեղ կան տասնյակ ալիքներ, որոնք առավոտից երեկո նման հեռուստասերիալներ են հեռարձակում։

 

 

–Ինքներդ ի՞նչ վերաբերմունք ունեք հնդկական սերիալների վերաբերյալ։

 

–Երբևէ որևէ սերիա չեմ դիտել։ Երբ առաջին անգամ պետք է գնայի հանդիպման, ուզում էի մի քանի սերիա նայել։ Դիտել եմ մոտ 20 րոպե։ Բոլոր դերասաններին հետևում եմ Ինստագրամով, սակայն  որևէ հեռուստասերիալ չեմ դիտել։ Ես ծանոթ չէի իրենց գործունեությանը։ Երբ մեկնում էի, նույնիսկ չգիտեի` ում եմ հանդիպելու, քանի որ Հնդկաստանում այդպիսի սովորություն ունեն, կարող են քեզ ասել` այո, վերջին պահին դա դառնա ոչ` առանց հաշվի առնելու, որ դու հազարավոր կիլոմետրեր ես անցել։

 

–Հնդկաստան գնալը մեծ աժիոտաժ ստեղծեց «Տնից հեռու» հաղորդման շուրջ։ Ռեյթինգի վրա ի՞նչ ազդեցություն ունեցավ։

 

–Երբ ես սկսում էի այս ամենը, այդ մասին չէի մտածում, սակայն մեծ ռեյթինգ բերեց։ Ես ուզում էի սա անել այն մարդկանց համար, ովքեր դիտում են իմ ծրագիրը։ Հաղորդման վարկանիշն ավելի է աճել, շատացել են հետևորդները, նամակները։ Բավականին մեծ  ակտիվություն կա, ինչն ինձ շատ է ոգևորում։

 

Առաջիկայում նախատեսում ենք նկարահանել մի երկիր, որը, կարծում եմ, նույնպես մեծ աժիոտաժ կստեղծի մեր երկրում։ Առայժմ փակագծերը բացել չեմ ուզում։ Միայն նշեմ, որ ես փորձում եմ այնպիսի երկրներ գնալ, որոնք տարբերվում են իրարից։ Ես փախչում եմ տուրիստական տեղերից, պատմական վայրերը ներկայացնելուց, քանի որ ավելի պրոֆեսիոնալ մարդիկ շատ լավ արել են դա։ Ես սիրում եմ ներկայացնել` ինչպես են մարդիկ ապրում իրենց երկրում։