«Մարտինն ամուսնուս է նման, Դանին` ինձ». Էմմին` ընտանիքի ու երկրորդ երեխայի մասին

EXCLUSIVE

Երգչուհի Էմմին այս շրջանում վայելում է իր ընտանիքի ջերմությունը։ Tert.am Life-ի հետ զրույցում Էմմին առաջին անգամ խոսեց երկրորդ որդու` 4 ամսական Մարտինի մասին, պատմեց իրենց առօրյայի ու առաջիկա ծրագրերի մասին։ Ի դեպ, զրույցի ընթացքում նրա առաջնեկը` Դանին, հաճախ էր մայրիկին ընդհատում ծիծաղով և միանում զրույցին։

 

–Էմմի, այս շրջանում ինչո՞վ եք զբաղված և ինչպե՞ս է սկսվում Ձեր ամեն առավոտը։

 

–Այս շրջանում ամբողջ ժամանակս տրամադրում եմ ընտանիքիս։ Օրս սկսվում և ավարտվում է փոքրիկներիս հետ։ Աշխատում եմ միշտ նրանց կողքին լինել և զբաղվել նրանց դաստիարակությամբ։ Կարծում եմ` երեխային պետք է հենց փոքրուց դաստիարակել։

 

–Չե՞ք դժվարանում երկու երեխա մեծացնելու հարցում։

 

–Եթե նույնիսկ դժվարանում եմ, նորմալ է։ Իմ երեխաներն են, և ես ցանկանում եմ ինքս մեծացնել նրանց։ Ուզում եմ տեսնել նրանց առաջին քայլերը, այն, ինչ նրանք անում են այս տարիքում։ Առանց նրանց մեկ օր ինձ չեմ պատկերացնում։ Նրանք ինձ համար աշխարհ են, արև, լույս։ Տղաներս իմ կյանքի ամենակարևոր կետն են։

 

 

–Ավելի վաղ մեզ հետ զրույցում տիկին Նադեժդան նշել էր, որ Դանին շատ նման է Ձեզ։ Մարտինն ո՞ւմ է նման։

 

–Երկու տղաներիս իմ և ամուսնուս միջև հավասար ենք բաշխել։ Մարտինը հայացքով, պահելաձևով, ամեն ինչով իր հայրիկին է  նման։ Աչքերը կապույտ են։ Սկեսրայրիս աչքերի գույնն է։ Հուսով եմ` չի փոխվի և այդ երանգը կմնա։ Դանին ինձ է նման։ Ովքեր ինձ հիշում են այդ տարիքում, շատ են ասում, որ Դանին և՛ արտաքնապես, և՛ ներքուստ իր աշխուժությամբ ու բնավորությամբ ինձ է նման։

 

–Դանին չի՞ խանդում կրտսեր եղբորը։

 

–Բնական է, երբ մեկին ավելի շատ ես ուշադրություն դարձնում, մյուսն ինչ–որ չափով խանդում է։ Դանիի մոտ չկա արտահայտված խանդ, բայց որոշ պարագաներում զգացվում է։ Չնայած մենք աշխատում ենք նույնչափ ուշադիր լինել երկուսի նկատմամբ։ Դանին եղբորը շատ է սիրում. խաղում է հետը, սովորեցնում «աղու» ասել։  Դեռ բարդ իրավիճակի մեջ չենք հայտնվել, որ Դանին խանդի։

 

–Երեխաների հետ հասցնո՞ւմ եք աշխատանքով զբաղվել։

 

–Այս պահին աշխատանքային ծանրաբեռնվածություն չունեմ։ Մտքեր, ծրագրեր, իհարկե, միշտ կան, բայց հստակ աշխատանքային ընթացքի մեջ չեն։

 

 

—Տիկին Նադեժդայի երազանքներից մեկն է կազմակերպել Ձեր մենահամերգը։ Աշխատանքներ տարվո՞ւմ են այդ ուղղությամբ։

 

–Դա ոչ միայն մայրիկիս երազանքն է, այլև իմ նպատակներից մեկը։ Կարծում եմ` դեռ ժամանակը չի հասունացել։ Նախապատրաստական աշխատանքներ այս ընթացքում տարվում են, քանի որ յուրաքանչյուր մեծ նախագիծ ժամանակատար է և պետք է ամեն ինչ ստեղծել զրոյից։ Լինում են քննարկումներ, բանակցություններ, բայց չեմ կարող ասել, որ բուն աշխատանքային ընթացքը  սկսված է։

 

–Համերգից բացի նոր երգեր, տեսահոլովակներ կլինե՞ն։

 

–Անպայման, փոքրիկ ընդմիջումից հետո կլինեն նոր երգեր ու տեսահոլովակներ։ Քանի որ երկրպագուներս սպասում են, որ նորություններով վերադառնամ աշխատանքի։ Նրանց գրած ամեն նամակը, մեկնաբանությունը կարդում եմ։ Ուզում եմ նրանց առանձնահատուկ շնորհակալություն հայտնել, որ միշտ կողքիս են։

 

–Ե՞րբ նորից կվերադառնաք Հայաստան և ո՞րքան ժամանակով։

 

–Դժվար է պատասխանել այդ հարցին, քանի որ արդեն միայնակ չեմ և չեմ կարող ուզածս ժամանակ վերադառնալ։ Երկու փոքրիկներս ինձ հետ են։ Միգուցե Դանին սովոր է ինքնաթիռ նստելուն, բայց Մարտինը շատ փոքր է։ Մոտակա մի քանի ամիսներին չեմ վերադառնա։