Երիտասարդ հայ դիզայներների ցուցադրությունը` Русский Силуэт–ում հայտնվելու համար. հաղթեցին երկուսը

 

Երիտասարդ հայ դիզայներները բացառիկ հնարավորություն ունեցան իրենց հավաքածուները ցուցադրել հայ հանդիսատեսին։ Հոկտեմբերի 9–ին Meridian Expo ցուցասրահում անցկացվեց  Русский Силуэт միջազգային մրցույթի 10–րդ տարածաշրջանային կիսաեզրափակիչը։  Tert.am Life–ը ներկայացնում է միջոցառման լուսանկարներն ու մանրամասները։

 

Մրցույթին մասնակցում էին 20 երիտասարդ հայ դիզայներ, որոնցից շատերի հավաքածուներն առաջին անգամ էին ցուցադրվում։ Յուրաքանչյուր հավաքածու իր մեջ ներառում էր 5 հագուստ։ Երիտասարդ դիզայներները ոգեշնչման աղբյուրներ  գտել էին ամենուր` թռչուններից, գույներից,  ճարտարապետությունից։   Կիսաեզրափակչի հաղթողը պետք է մեկնի Մոսկվա` մասնակցելու մրցույթի եզրափակիչ փուլին։

 

Մրցույթի գլխավոր կազմակերպիչ «Ատեքս» նորաձևության տան տնօրեն Կարինե Դնոյանի կարծիքով` այսպիսի մրցույթներ Հայաստանում պետք է հաճախ անցկացվեն. «Զարգանում է մեր թեթև արդյունաբերությունը։ Դիզայներները հենց արտադրական ոլորտի մասնագետներ պետք է լինեն, ոչ թե «շորիկային» մտածելակերպ ունենան։ Մրցույթին մասնակցելու համար մենք ընտրել էինք այն հավաքածուները,  որոնք բացի իդեայից, կրեատիվից, բավականին բարդ աշխատանքի արդյունքում են ստեղծվել` կոնստրուկտավորումով, ձեռքի աշխատանքով, նյութերի համադրություններով»։

 

 

Ժյուրիի անդամները նորաձևության, տնտեսության և մշակույթի ոլորտի ներկայացուցիչներն էին։ Ի տարբերություն այլ մրցույթների` այս անգամ առաջին պատվավոր հորիզոնականում հայտնվեցին միանգամից երկու դիզայներ` Սվետլանա Մկրտչյանը  և  Մարիամ Մանուկյանը։ Նրանց հաղթանակը պայմանավորված էր թե՛ կատարած աշխատանքի տարբերությամբ, թե՛ բարդությամբ։ Ժյուրիին հատկապես գրավել էր Մարիամի մինիմալիզմն ու Սվետլանայի հավաքածուի խորությունը։ Սվետլանա Մկրտչյանի «Ո՞վ ես դու, Ֆրիդա» հավաքածուն արժանացավ նաև հատուկ մրցանակի ՀՀ Մշակույթի նախարարության կողմից։

 

Հաղթողներից Մարիամը Երևան է ժամանել Վանաձորից, սա նրա առաջին հավաքածուն է. «Ոգեշնչվել եմ հին հայկական եկեղեցիներից, դրանց ձևից, հին հայկական եկեղեցիների հարթաքանդակներից։ Վանաձորում դրանք ավելի շատ են, այնտեղ շունչը պահպանվել է»։ Երիտասարդ դիզայները չէր սպասում իր հաղթանակին, հուսով է, որ Մոսկվայում էլ հաջողություններ կգրանցի։

 

 

Գրեթե բոլոր հագուստները կարված էին կանանց համար, տղամարդկանց հագուստին անդրադարձել էին միայն երկուսը։ Նրանցից մեկը Վարդուհի Բարսեղյանն էր։ Ինչպես ինքն է ասում, երբեք չի վախեցել նորը փորձել, միշտ ձգտել  է անել այն, ինչ մյուսները չեն անում։ Սա Վարդուհու առաջին հավաքածուն է, բայց նա պատրաստվում  է նոր հավաքածու ներկայացնել։

 

Նախորդ տարիներին մրցույթի եզրափակիչ փուլի մասնակիցներն արդեն իսկ մեծ հաջողություններ են գրանցել։ Նրանցից Ռիմա Կազումյանն աշխատում է «Արմանի» նորաձևության տանը։ Մրցույթի եզրափակիչ փուլի մասնակիցները  հնարավորություն կստանան փորձ ձեռք բերել  Եվրոպայի մի շարք առաջատար նորաձևության տներում։ Իսկ հաղթող մասնակիցը կստանա գրան պրի մրցանակ` բրոնզե արձանիկ։ Русский Силуэт մրցույթի եզրափակիչ փուլը կկայանա 2018 թվականի մարտի 4–ին` Մոսկվայում։

 

Լուսանկարները` Շուշ Անտոնյանի