«Եթե հաղթելու հույս չունես, անիմաստ է մասնակցել». Սևակ Խանաղյանը կմասնակցի «Դեպի Եվրատեսիլին»

Երգիչ Սևակ Խանաղյանը կմասնակցի «Դեպի Եվրատեսիլ» մրցույթին և կպայքարի Հայաստանը «Եվրատեսիլի» բեմում ներկայացնելու համար։ Երեկ` Ուսանողների միջազգային օրվան նվիրված համերգի ժամանակ Սևակն իր հանդիսատեսին հարցրեց` արժե՞, որ ինքը մասնակցի «Դեպի Եվրատեսիլ» մրցույթին։ Հանդիսատեսի անդադար ծափերը երգչին համոզեցին, որ պետք է փորձել ուժերը։

Համերգից հետո Սևակն այս թեմայով առաջին հարցազրույցը տվեց  Tert.am Life–ին։ «Հանդիսատեսն իմ փոխարեն պատասխանեց, և ես կայացրեցի իմ որոշումը։ Այո, ես կմասնակցեմ «Դեպի Եվրատեսիլին»»,– ասաց նա։

Թե կոնկրետ ինչ երգով կներկայանա մրցույթին, Սևակն  առայժմ գաղտնի է պահում, սակայն մի բացահայտում արեց. «Կարծում եմ, ամեն դեպքում հեղինակային երգով կներկայանամ, սակայն վերջնական որոշում դեռ չեմ կայացրել»։

Ընդամենը մեկ տարի առաջ Սևակը մասնակցում էր ուկրաինական XFactor մրցույթին ու պայքարում հաղթանակի համար։ Հաղթանակի հասնելուց ամիսներ անց մեկ այլ մրցույթում` «Հայաստանի ձայնում» Սևակը ներկայացավ հակառակ կողմում`որպես ժյուրիի անդամ, իսկ առաջիկայում պատրաստվում է կրկին հայտնվել մրցակցային դիրքում։ Այս մեկ տարվա ընթացքում Սևակի անցած ճանապարհը թույլ է տալիս նրան  համարել արդեն հայտնի ու կայացած երգիչ։ Ըստ նրա` դա իրեն չի կաշկանդում հեռուստադիտողների աչքի առաջ կրկին պայքարի մեջ մտնել։

«Յուրաքանչյուր մրցույթում ես ինձ զգում եմ մասնակից։ Ես չեմ գնում` մրցակցելու, ես գնում եմ իմ գործունեությունը հանրությանը ցույց տալու։ Սա է ամենը»,– ասաց երգիչը։

Սևակը գնում է հաղթանակի համար։ «Եթե հաղթելու հույս չունես, անիմաստ է մասնակցել և պայքարել,– ասաց նա, միաժամանակ նշեց, որ պատրաստ է նաև հնարավոր այլ ելքի։ –Ես չեմ վախենում նախագծից դուրս մնալ։ Երբեք չեմ վախեցել նման բաներից։ Միշտ վախեցել եմ միայն մի բանից` վատ ելույթից»։

Ըստ երգչի` «Եվրատեսիլում» հաղթելու համար պետք է չկեղծես քեզ, սա է գաղտնիքը։

Հիշեցնենք, որ «Դեպի Եվրատեսիլին» մասնակցելու մասին արդեն հայտարարել են մրցույթի նախորդ եթերաշրջանի մասնակից Հասմիկ Շիրոյանն ու 2015 թվականին Genealogy խմբի կազմում «Եվրատեսիլին» ներկայացած երգչուհի Թամար Կապրելյանը։ «Եվրատեսիլ»-ի հայաստանյան պատվիրակության ղեկավար Գոհար Գասպարյանը  Tert.am Life–ին ասել է, որ մրցույթին մասնակցելու ցանկություն են հայտնել նաև այլ հայտնի երգիչներ, սակայն ինքն իրեն իրավունք չի վերապահեի անուններ նշել։