«20 մասնակցից ոչ ոք չի կարող մրցել Մհերի հետ». Մհերի պրոդյուսերը` պլագիատի և «Դեպի Եվրատեսիլի» մրցակիցների մասին

«Դեպի Եվրատեսիլ» նախագծի 15 երգ արդեն հանձնված է հանդիսատեսի դատին։ Երգերի շուրջ քննարկումների մեծ ալիք է բարձրացել, իսկ Մհեր Արմենիային մեղադրում են  Queen խմբի «Who wants to live forever» երգից պլագիատի մեջ։ Tert.am Life–ի հետ զրույցում Մհերի պրոդյուսեր Գեորգի Հարությունյանն ասաց, որ իրենք որևէ երգ չեն կրկնօրինակել և մատնանշեց, որ  մրցակիցներն են կրկնօրինակումներ արել։

«Երգն ընդհանրապես նման չէ։ Forever բառով մարդիկ այդ երգը գիտեն, ասում են, որ դրան է նման։ Պարզ է, մենք ստուգել ենք ցանկացած նոտա նմա՞ն է այլ երգի, կրկնվո՞ւմ է, թե՞ չէ։ Ի տարբերություն այլ մասնագետների, մենք ստուգում ենք մեր քայլերը։ Եթե ես խախտում եմ հեղինակային իրավունք, ես նախօրոք վճարում եմ այդ խախտման համար։ Այս դեպքում մենք ոչ մի հեղինակային իրավունք չենք խախտել։ Սա միանշանակ պլագիատ չէ։ Երգը գրել է Արսեն Բարսամյանը, դա իր սրտից եկած երաժշտությունն է։ I want to live forever և Who wants to live forever իմաստն էլ է տարբեր։ Երբ մարդիկ հեռուստատեսությամբ տեսնեն շոուն, կհասկանան երգի ամբողջ իմաստը»,– ասաց Գեորգին։

Ըստ նրա` խոսակցությունների այս ալիքը տարածվում է այն մարդկանց կողմից, ովքեր գովազդում են մրցակիցներին։

«Կան երգեր, որոնք իսկապես նման են այլ երգերի, նույնիսկ, ռուսական էստրադայի երգերի։ Ես 100 տոկոսով եմ ասում, որ 8 նոտայից ավելի համընկնում կա»,– ասաց նա, սակայն անվանական խոսել չցանկացավ` նշելով, որ ի տարբերություն ուրիշների, ինքն ունի սոլիդարություն։ –Դա գրվում է, որովհետև տեսան իսկական մրցակցի։ Խոսքս Մհերի մասին չէ, որովհետև մասնակիցներից ոչ մեկն իրեն մրցակից չի կարող լինել. Մհերը շատ անգամ բարձրացրել է Հայաստանի դրոշը։ 20 մասնակցից ոչ ոք չի կարող մրցել Մհերի հետ, սա երգի մրցույթ է»։

Գեորգիից հետաքրքրվեցինք` այդ դեպքում ո՞ր երգն են համարում մրցակից, պարզվեց, այս դեպքում ևս մրցակիցների չեն տեսնում։ «Ոչ մեկը։ Դա իմ կարծիքն է` որպես «Եվրատեսիլի» դիտող,– ասաց նա, ինչ վերաբերում է Մհերի կարծիքին` պրոդյուսերն ասաց,– Մհերը չի ուզում մասնակցել «Եվրատեսիլին», նա ուզում է «Եվրատեսիլը» բերել Հայաստան»։

Ըստ նրա` Մհերը չի սրտնեղում բացասական արձագանքներից, քանի որ կարևորն այն է, որ մարդիկ խոսեն երգի մասին։ Գեորգին խոստանում է, որ Մհերը կներկայանա զարմացնող շոուով, որի հեղինակն  ինքն է, սակայն փակագծեր բացել չի ցանկանում։

«Ես կարծում եմ, որ Հայաստանը պետք է ներկայացնի մի մարդ, որն ապրում է Հայաստանում, շնչում է հայկական օդը, ոչ թե մի կամ մի քանի օրով գալիս է, մասնակցում է, ինքն իրեն PR է անում և գնում իր երկիր` ռեստորաններում երգելու»,– ասաց նա։ Հստակեցմանը` նկատի ունի մասնակիցներից Սևակ Խանաղյանի՞ն և Թամար Կապրելյանի՞ն, ովքեր Հայաստանից չեն, արձագանքեց. «Ես կոնկրետ չեմ ասում; Նկատի ունեմ նույնիսկ այն մասնակիցներին, ովքեր եկել են, Հայաստանը ներկայացրել են և գնացել են»։

Ինչ վերաբերում է անդադար խոսակցություններին, որ մրցույթում Մհերին կաջակցի ՀՀ Առաջին տիկին Ռիտա Սարգսյանը, Գեորգին պատասխանեց. «Առաջին տիկինը կապ չունի «Եվրատեսիլի» հետ։ Եթե նման  կապ լիներ, ինչու Մհերը պետք է սպասեր 10-15 տարի, 5 կամ 10 տարի առաջ կմասնակցեր։ Դա իր սրտի ցանկությունն է։ Քիչ երկրներից են Վաստակավոր արտիստներ գնում մասնակցելու երկիրը ներկայացնելու համար»։