Սեզոնի գլխավոր թրենդները` ըստ Դիանա Շատվերյանի

Գարունը լավ ժամանակահատված է զգեստապահարանը թարմացնելու և գեղեցիկ ոճն ընդգծելու համար: 

Tert.am Life-ի հետ զրույցում դիզայներ Դիանա Շատվերյանը խոսեց այս գարնան նորաձև գույների ու հագուստների մասին, որոնց հետևելով, յուրաքանչյուր աղջիկ կկարողանա լինել առավել ոճային:

Տարվա գույնը, ոճաբանի խոսքով, համարվել է մանուշակագույնը՝  իր բոլոր երանգներով: Դիանան նշեց, որ այս տարի նորաձևության միտումները թույլ են տալիս հագնվել ամբողջությամբ մեկ երանգի մեջ։

«Եթե նախկինում դա հակաթրենդ էր, հիմա շատ նորաձև է: Մանուշակագույն կարող են լինել թե՛ պիջակը, թե՛ տաբատը, շապիկը, թե՛ կոշիկներն ու պայուսակը։ Կարելի է նաև մանուշակագույնը համադրել սպիտակի հետ՝ դա ևս շատ նորաձև է լինելու»,– ասաց դիզայները։

Դիանան հայտնեց նաև, որ այս գարնանը շատ նորաձև են ցանկացած երանգի մանր ծաղիկներով պրինտները և մեծ ու մանր պուտավոր կտորները` գունային տարբեր երանգներով։ Ամենահամարձակ տարբերակներից մեկի` դեղինի և սպիտակի համադրությունից մինչև դասական սև ու սպիտակի համադրությունը կարելի է կիրառել. «Վերնաշապիկների դեպքում նորաձև են նաև վանդակավոր և գծավոր կտորները։ Առհասարակ, նորաձև են վերնաշապիկի ոճով զգեստները»:

Տևական ժամանակ է՝ նորաձև է համարվում դասական ու սպորտային ոճերի համադրությունը: Այս թրենդը, Դիանայի խոսքով, պահպանվում է նաև հայ աղջիկների շրջանում, թեև, ըստ նրա, ոճերի համադրության ժամանակ, երբեմն, կորցնում են  չափի զգացողությունը:

«Պետք է մինիմալիզմի մեջ աշխատես, որովհետև դրանք ծայրահեղ տարբեր ոճեր են,  համադրությունը կարող է «շիլաշփոթ» ստացվել: Դրա համար հարկավոր է խուսափել ավելորդ աքսեսուարներից: Ցանկալի է՝ դասական գույներ օգտագործել: Օրինակ՝ եթե վառ գույնի սպորտային կոշիկ են հագնում, վերևի հատվածում հագուստը պետք է ավելի մեղմ երանգների մեջ լինի»:

Դիանայի մասնագիտական գնահատականով` Երևանում աղջիկները, ընդհանուր առմամբ,  բավականին նորաձև են հագնվում: Ոճաբանը ուրախությամբ փաստեց, որ հագուկապի մեջ նախկինում տարածված սխալներին հիմա ավելի քիչ կարելի է հանդիպել:

«Շատ հաճելի է, որ հիմա բարձրակրունկ կոշիկները հիմնականում դուրս են եկել առօրյայից: Դա հիմնական սխալներից էր, որ ես նկատում էի: Կուզեի, որ համապատասխան վայրին ոչ ճիշտ հագնված լինելը ևս վերանար:  Շատ դեպքերում ոչ թե համադրությունն է սխալ, այլ լավ համադրված հագուստը սխալ տեղում հագնելը:  Եվ, իհարկե, թեև փայլուն կտորները շատ նորաձև են, դրանց մեջ էլ կա տարբերություն։ Այդ Arabian style-ը պետք է մոռացվի հայ աղջիկների կողմից, որովհետև հիմա նորաձև չէ»,- ասաց դիզայները:

Տարածված սխալներից մեկն էլ, Դիանայի խոսքով, կազմվածքին անհամապատասխան հագուստ կրելն է: Նա համոզված է, որ ճիշտ հագուստ ընտրելու դեպքում, հնարավոր է թաքցնել կազմվածքի թերություններն ու ընդգծել առավելությունները. «Դա ընկալման խնդիր է: Այսօր շուկայում ցանկացած գնային սանդղակում ու ցանակացած ձևվածքի հագուստ կա, մնում է՝ ճիշտ ընտրել: Այն մարդիկ, ովքեր մարմնի վերնամասում գեր են, իսկ ներքևի հատվածում չունեն նման խնդիր, ճիշտ հագուստի ընտրությամբ պետք է բալանսի բերեն դա։ Ամենակարևորը՝ համաչափությունը պահելն է»:  

Այնուամենայնիվ, դիզայները նշեց, որ նորաձևությանը չհետևելով, և սեփական լուծումներով էլ կարելի է լինել ինքնատիպ՝ միայն թե պարտադիր պայմանը, ըստ նրա, ճաշակի զգացողությունն է:

«Իհարկե, ինքնատիպ լինելը շատ ավելի հաճելի է, քան անընդհատ միայն կրկնօրինակելը: Ինքնատիպ ոճը կարող է հետագայում դառնալ որևէ ոճաբանի  համար ոգեշնչման աղբյուր և ինչու ոչ՝ հագուստի նոր ուղղվածություն ստեղծելու առիթ: Ցանկացած մարդ, ով ինքնատիպ է ու կարողանում իր յուրահատուկ ոճը ստեղծել՝ սա արդեն նորաձևություն է: Դրա համար կարծում եմ, որ ավելի հետաքրքիր է ինքնատիպ լինել կամ այսպես ասենք՝ էպոտաժային, բայց դա ևս կարող է լինել ճաշակով և անճաշակ: Նոր տարվա խաղալիքները ականջօղերի փոխարեն կախելն ու նման այլ տարօրինակ բաներ անելը չի նշանակում, որ դու ինքնատիպ ես: Հիմա նորաձևության սահմաններն այնքան լայն են, որ թույլ են տալիս կրել գրեթե ամեն ինչ: Դրա համար հիմա մարդկանց սխալվելը դժվար է»,- եզրափակեց Դիանան: