Սյուզի Մելիքյանը կթողարկի շապիկների իր հավաքածուն

Երգչուհի Սյուզի Մելիքյանը շուտով կներկայացնի շապիկների իր հավաքածուն, որոնց տվել է իր պատկերացրած լուծումները։ Սյուզին Tert.am Life–ի հետ զրույցում ասաց, որ առաջին հավաքածուն պատրաստ կլինի մոտ 20 օրից։

«Ներկայացնելու եմ իմ պատկերացրած պրինտներով, լուծումներով շապիկներ։ Առաջին հավաքածուի շապիկները մենք ենք կարել։ Նույնատիպ շապիկներ են` տարբեր լուծումներով։ Հետագայում կներկայացնենք տարբեր դիզայնով շապիկներ, կարող են լինել նաև դեպքեր, երբ կգնենք ստանդարտ շապիկներ` պրինտների համար։ Դա կհասկանանք` ըստ դիզայնի»,– ասաց երգչուհին։

Ըստ նրա` իր հավաքածուի գնային քաղաքականությունը թանկ չի լինելու։ «Ես գերշահույթ չեմ  ակնկալում։ Ինձ համար կարևորն այն է, որ այն մարդիկ, որոնք ինձ սիրում են, ուզում են ունենալ իմ շապիկները, կարողանան գնել շապիկները։ Լինելու են միջին գներ»,– ասաց նա։

Վերջին տարիներին հայտնիներից շատերն են սկսել ներկայանալ որպես դիզայներ։ Սյուզիի խոսքով` ինքը որպես դիզայներ չի ներկայանալու։ Այնուամենայնիվ, սա դիզայներական  աշխատանքի սկի՞զբ է, թե՞ ոչ, այս պահին գնահատել զերծ է մնում. «Որոշեցի անել սա, որովհետև երբ ինքս ինձ համար գտնում եմ նոր լուծումներ, ինձ սիրող մարդիկ հետաքրքրվում են, թե որտեղից եմ գտել տվյալ հագուստը։ Որոշեցի ինքս թողարկել հավաքածու, որպեսզի ցանկացողները գնեն։ Իմ հավաքածուի շապիկներն առաջին հերթին ինքս եմ հագնելու»։

Մի քանի տարի առաջ երգչուհին սկսեց զբաղվել նաև դիմահարդարմամբ։ Նրա փոխանցմամբ` հիմա ունի աշակերտներ, սակայն հաճախորդներին սպասարկել չի հասցնում։ Սյուզիի խոսքով` պատրաստվում է թիմ ձևավորել, որը կսպասարկի իր հաճախորդներին։

Ինչ վերաբերում է երգարվեստին` նա նկատեց, որ երբեք մեկը մյուսի հետևից նոր երգեր չի ներկայացրել։ «Վերջերս երկրպագուներիս պահանջով երգի cover ներկայացրեցի։ Ինձ համար երբեք գերխնդիր չի եղել մեկը մյուսի հետևից նոր երգեր ներկայացնելը առանց խորանալու, թե ինչ եմ անում։ Ես ամեն ինչի մեջ այնքան եմ խորանում, որ աշխատանքը բավականին ժամանակատար է դառնում»,– ասաց նա։

Երգչուհուց հետաքրքրվեցինք, թե ինչ հաճախականությամբ է ելույթներ ունենում, արդյոք հրավերները շատ են լինում։ «Երևանում առիթներն այդքան շատ չեն լինում։ Արտերկրից հրավերներն ավելի շատ են,– ասաց նա, իսկ հարցին, թե ինչ պայմանների ապահովման դեպքում է համաձայնում երգել այս կամ այն կորպորատիվ միջոցառմանը, պատասխանեց,– Իհարկե, կան պայմաններ, գումարի որոշակի սանդղակ, որը չապահովելու դեպքում կհրաժարվեմ ելույթ ունենալ։ Ես  սիրում եմ ամեն ինչ ճիշտ արվի։ Եթե կա հրավեր, պետք է ամեն ինչ հավուր պատշաճի արվի, սակայն չեմ ակնկալում, որ ինձ պետք է կարմիր գորգով դիմավորեն»։