Երգչուհի Անուշիկ Ավագյանն 1-ին տեղն է զբաղեցրել Costa Blanca fashion week 2018 նորաձևության միջազգային մրցույթում. ֆոտոշարք

15:39 • 15.10.18

Իսպանիայում կայացել է «Կոստա Բլանկա միջազգային նորաձևության դիզայներական շաբաթ» (Costa Blanca fashion week 2018) մրցույթը, որտեղ Հայաստանի ներկայացուցիչ երգչուհի Անուշիկ Ավագյանը զբաղեցրել է առաջին տեղը: Մրցույթի Գրան պրի մրցանակին արժանացել և հաղթող է ճանաչվել Դոմինիկյան Հանրապետության ներկայացուցիչը՝ Ֆրինլի Օգանդոն:

Tert.am Life–ը զրուցել է Costa Blanca fashion week-ի հայաստանյան ներկայացուցիչ Տիգրան Հարությունյանի և մրցանակակիր Անուշիկ Ավագյանի հետ: Տիգրանը նկատեց, որ երրորդ տարին է, որ Հայաստանի մասնակիցը մրցույթից վերադառնում է առաջին հորիզոնականով։ Նման արդյունք են գրանցել նաև Սեդա Սերոբյանն ու Մերի Հակոբյանը։

Տիգրանը նշեց, որ հայկական պատվիրակության կազմում մասնակիցներից բացի ընդգրկված են նաև երգչուհի Լիլիթ Կարապետյանը, Անահիտ Շահբազյանն ու Վիգեն Ահարոնյանը: Տիգրանիխոսքով, մրցույթի կազմակերպիչներ ու ժյուրին բավականին տպավորված են եղել հայ աղջիկների՝ Անուշիկ Ավագյանի և Իլոնա Նուրբեկյանի ելույթներից:

«Մրցույթին ներկա էին տարբեր երկրներից ժամանած դիզայներներ, որոնք ընտրում էին իրենց ֆավորիտ մոդելներին ու նվերներ հանձնում նրանց: Կովկասը ներկայացնող մեր մասնակիցը՝ Իլոնա Նուրբեկյանը, արժանացավ հայ դիզայների` Ալիսա Հարությունյանի հատուկ մրցանակին և նվեր ստացավ նրա հեղինակած զգեստներից մեկը»,-ասաց Տիգրանը:

Մրցույթին մասնակցել է 13 աղջիկ, նրանք ներկայացել են երեք փուլով՝ ազգային հագուստով, լողազգեստով և երեկոյան զգեստով: Անուշիկը նշեց, որ մրցույթից իր ակնկալիքներն արդարացվել են և կարողացել է լավագույնս հանդես գալ։

«Տպավորություններս աննկարագրելի են: Բոլոր ջանքերս գործադրեցի, որպեսզի ելույթս հաջող ստացվի: Մրցակցությունն իսկապես ուժեղ էր: Մի փոքր անհանգստանում էի հասակիս համար, քանի որ բոլորը բարձրահասակ էին, բայց դա ինձ չխանգարեց: Իմ կարծիքով, այս մրցույթում կարևոր է նաև ներքին գրավչությունը և, իհարկե, վստահությունը»:

Մրցույթում Անուշիկը հաղթող է ճանաչվել նաև «Միսս ֆոտոգենիկ» անվանակարգում: Նա նկատեց, որ այս հաղթանակն իր համար սպասելի էր, քանի որ տևական ժամանակ զբաղվել է ֆոտոմոդելինգով. «Բոլոր լուսանկարիչներն ասում էին, որ ֆոտոմոդելինգն ինձ մոտ լավ է ստացվում, երբ այդ մրցանակը ստացա, ինչ-որ չափով հանգստացա և չէի սպասում, որ ևս մեկ մրցանակ կլինի: Երբ իմացա, որ առաջին տեղն եմ զբաղեցրել, կրկնակի ուրախացա»,-ասաց նա:

Երգչուհին նշեց, որ մրցույթի շրջանակում համագործակցության բազմաթիվ առաջարկներ է ստացել. «Շատ հնարավոր է` զարգացնեմ մոդելային կարիերաս, բայց ոչ մի դեպքում չեմ մոռանա երգչուհու կարիերայիս մասին: Այս պահին մտածում եմ նոր երգ ու տեսահոլովակ պատարստել ու մասին, բայց կանխազգացում ունեմ, որ շուտով անպայման վերադառնալու եմ Իսպանիա»:

Հայաստանից մրցույթին պետք է մասնակցեին նաև Հովհաննես Սեմերջյանն ու Աշոտ Կարապետյանը, սակայն Տիգրանը հայտնեց, որ վիզայի հետ առաջացած խնդիրների պատճառով նրանք չեն մեկնել մրցույթին:

«Այս տարի մցրույթին մասնակցության հայտ ներկայացրած 10 տղա վիզայի մերժում է ստացել և չի կարողացել մասնակցել: Արդյունքում մրցույթին մասնակցում էր 6 տղա: Գրան պրին ստացավ Կարիբյան կղզիների ներկայացուցիչը`Սուլայման Կամարան, առաջին տեղը զբաղեցրեց Իսպանիայի, երկրորդ տեղը՝ Լատվիայի ներկայացուցիչը»,-եզրափակեց նա: