«Անսպասելի էր մարդկանց համար». Գրիգոր Դանիելյանը՝ նոր նախագծի և լսարանին զարմացնելու մասին

19:28 • 29.04.20

Դերասան Գրիգոր Դանիելյանը կարանտինային այս օրերին համացանցային նոր նախագիծ է սկսել՝ «Ճիշտ տարբերակ», որի շրջանակում հումորային տարբերակով կներկայացնի ժամանակակից մի շարք պայքարների համար իր ճիշտ տարբերակը։

Tert.am Life-ի հետ զրույցում նա ասաց, որ փորձում է ժամանակն արդյունավետ օգտագործել։

«Տանը պարապ նստել չի կարելի։ Այս ընթացքում որոշ բաներ նկարահանում ենք, բայց զբաղվածությունս քիչ է, պետք է լրացնեմ։ Այս պրոյեկտը նույնքան ժամանակատար է, ինչպես հեռուստատեսային նախագիծը, մի քիչ է ավելի թեթև։ Ամեն բան ինքնուրույն եմ անում՝ սկսած սցենարից»,- ասաց նա։

Գրիգորի նոր նախագիծը «Ճիշտ տարբերակ»-ի մասին է. «Հիմա ամբողջ աշխարհում «կարելի»-ների ու «չի կարելի»-ների կռիվ է։ Օրինակ՝ հեռավար դասընթացների հետ կապված մի շարք հարցեր կան կամ ինչպես են կանայք օգտվում ամուսինների՝ տանը լինելուց և «աշխատացնում» նրանց։ Թեմաները բազմազան են։ Այս ձևաչափը շատ հետաքրքիր է այդ ամենը ներկայացնելու համար»։

Դերասանը նկատեց, որ «Քոմեդի քլաբ»-ում նման ձևաչափ եղել է, բայց անդրադարձել է միայն կին-տղամարդ փոխհարաբերությունների վրա։

Գրիգորը չի բացառում, որ այս նախագիծը կշարունակի արտակարգ դրությունից հետո։ Նա նշեց, որ մի շարք նոր նախագծեր ուներ, որոնք պետք է իրականացներ իր սաների հետ, սակայն արտակարգ իրավիճակի պատճառով դրանք հետաձգվեցին։

Այնուամենայնիվ, Գրիգորը նշեց, որ օրերը պարապ չի անցկացնում։ Այս ընթացքում հասցրել է նաև զարմացնել իր լսարանին։

«Այս ընթացքում բանաստեղծական մուսա էր եկել։ 3 հրապարակում արեցի, որոնք Ֆեյսբուքում բավականին մեծ արձագանք ունեցան։ Անսպասելիության գործոնն էլ աշխատեց, քանի որ լուրջ ձևաչափում էր, մարդիկ չէին սպասում ինձնից։ Իրականում շատ բանոր ունեմ գրած, որոնք չեմ հրապարակել, եթե հավեսս տա կհրապարակեմ։) Իհարկե, հիմնական աշխատանքս կմնա հումորի ոլորտում։ Մարդիկ դա են ինձնից սպասում»,- ասաց նա։