«Սիրում եմ այն աղջիկներին, որոնք իրենց գնահատել գիտեն». Նորայր Եղյանի նոր ֆոտոշարքը

Դերասան, հաղորդավար Նորայր Եղյանն իր պորտֆոլիոն թարմացրել է նոր լուսանկարներով: Դերասանը լուսանկարների շարքը տրամադրել է Tert.am Life-ին: Նորայրի խոսքով՝ ֆոտոշարքն արել է Ինստագրամի իր էջի կոնտենտը մի փոքր փոփոխելու նպատակով:  Լուսանկարներում դերասանը մենակ չէ: Նա ժպիտով նշեց, որ լուսանկարների աղջիկն ուղղակի մոդել է:

Նորայրի հետ զրուցել ենք արժեքների, երջանկության ու դժբախտության մասին պատկերացումների ու աղջիկների մասին...

Լինել տղամարդ նշանակում է հասկանալ տղամարդ լինելու արժեքը, իսկ արժեքը կայանում է նրանում, որ դու, որպես տղամարդ, չես ինքնահաստատվում հակառակ սեռի կամ ուղղակի ավելի թույլ մարդու հաշվին: Տղամարդն արդեն անցած լինելով ինքնահաստատման էտապը՝ զբաղվում է ինքնազարգացմամբ, ինքնակրթությամբ: Տղամարդը պետք է համբերատար լինի: Տղամարդ չեն դառնում նրանք, որոնք անընդհատ փորձում են ապացուցել, որ իրենք տղամարդ են: Այդպիսին լինում են, երբ որոշ փուլեր հաղթահարված են:

Չեմ սիրում այն աղջիկներին, որոնք փնթի են, իրենց չեն հետևում: Ինձ դուր չեն գալիս նաև նրանք, որոնք անընդհատ բարձրաձայնում են, թե այս մենթալիտետն իրենցը չէ ու իրենք յուրահատուկ դեմք են:

Սիրում եմ այն աղջիկներին, որոնք իրենց գնահատել գիտեն, կանացի են, խելացի ու ռեալիստ:  Աղջիկներն իրենք իրենց հետ պետք է ներդաշնակ լինեն:

Իմ հիմնական սկզբունքները կապված են ապրելակերպիս ու մտածելակերպիս հետ: Իհարկե, վերջինն ընթացքում փոփոխվում է, բայց սկզբունքները մնայուն են: Դերասանների դեպքում սա մի քիչ բարդ է, որովհետև մենք օրվա ընթացքում, ըստ կերպարների, տարբեր էմոցիաներ ենք ապրում, փոփոխվում ենք:

Ինձ համար ամենակարևոր հատկանիշներն անշահախնդրությունը, բարությունը, համբերատարությունն ու նվիրումն են: Դրանք սեռ չեն ճանաչում:

Երջանկության մասին իմ պատկերացումները սկսվում և ավարտվում են ներդաշնակությամբ:

Ինձ դժբախտ կզգամ, եթե չսիրեմ:

Ես ինձ անհաջողակ կզգամ, եթե... հետաքրքիր է, բայց  ես ինձ երբեք անհաջողակ չեմ զգացել:

Սթրեսը հաղթահարելու իմ տարբերակը բացասական էներգիայից ազատվելն է: Երբ կյանքումդ դրականի ու բացասականի բալանսից ընկնում ես, սկսվում է սթրեսը: Ամեն դեպքում ես չգիտեմ, թե սթրեսն ինչ է և, կարծում եմ, ուղղակի պետք է բալանսի մեջ լինել:

Վերջին անգամ արտասվել եմ... չեմ հիշում, թե դա երբ է եղել: Արտասվելու մեջ որևէ վատ բան չկա, իսկ ես, վերջին շրջանում, նկարահանման հրապարակում էմոցիաներս դուրս եմ հանում և արտասվելու կարիք մի տեսակ էլ չի զգացվում: