«Ցանկանում եմ լինել այն հայուհիներից, ով կկարողանա մեր տեսարժան վայրերը գեղեցիկ ներկայացնել». Լիա Զախարյանի նոր ֆոտոշարքը և արձագանքը` իր ընկնելու հետ կապված մեկնաբանություններին

Tert.am Life-ն իր ընթերցողներին հայտնել է, որ դերասանուհի Լիա Զախարյանն օրեր առաջ սայթաքել է, ընկել «Սատանի կամուրջ» կոչվող վայրում, ինչից հետո ուղեղի ցնցում է ստացել և գտնվում է բուժման մեջ: Դերասանուհին ասել էր, որ գնացել էր այդ վայր` նաև ֆոտոշարք իրականացնելու համար:

Լիան Tert.am Life–ին է տրամադրել իր ֆոտոշարքն ու ասել, որ այս օրերին իր տեսանյութի մեկնաբանություններում տարբեր կարծիքներ է հանդիպել:

«Այնպես չէ, որ ինձ դրսևորել չգիտեմ, «թիթիզացել» ու ընկել եմ: Գործընթաց էր, որը կարող էր լինել բոլորի հետ: Դրսում քայլելիս էլ մի քանի անգամ եղել է, որ ոտքս ոլորել եմ: Ընկնելուս տեսանյութի մեկնաբանություններում գրել էին, թե իբր սելֆի անելիս եմ ընկել, բարձրակրունկներով եմ նկարվել: Ուզում եմ ասել` թող տեսանյութը դիտեն, նոր մեկնաբանեն: Այս ֆոտոշարքի օրն, այնպես ստացվեց, որ ընկա, բայց չընկա լուսանկարվելու պատճառով: Գնացել էինք «Սատանի կամուրջ» և ուզում էինք հասնել «Կլեոպատրայի ցնցուղներ» կոչվող վայրը` այդ գեղեցկությունը ևս մեկ անգամ տեսնելու, հյուրերիս ցույց տալու և նկարվելու համար»,-ասաց Լիան:

Լուսանկարների հեղինակը Միլենա Մանուկյանն է, լուսանկարներում, ըստ Լիայի, ինքն առանց դիմահարդարման է: «Ցանկանում եմ լինել այն հայուհիներից, ով կկարողանա մեր տեսարժան վայրերը գեղեցիկ ներկայացնել, որ մարդիկ չմտածեն` նման գեղեցկություն միայն Բալիում, Թայլանդում և այլ վայրերում կա: Նման ոճի ֆոտոշարք դեռ չէի ունեցել: Բնական վիճակի մեջ էի, մազերս հատուկ չէի հարդարել, չէի դիմահարդարվել, միաձուլվել էի բնության հետ: Վերջերս հաճախ եմ բնական վիճակների մեջ ֆոտոշարքեր իրականացնում, քանի որ ինձ դուր է գալիս աղջկա և բնության միջև սերտ կապը` ջրի, քամու, խոտերի հետ միաձուլված: Ես բնության մեջ մեծացած աղջիկ եմ, բնությունն ինձ շատ է ձգում»,-նշեց նա:

Նկատառմանը, որ վերջերս Լիան ստուդիայում ֆոտոշարքեր չի իրականացնում, դերասանուհին պատասխանեց. «Ստուդիայում լուսանկարներ քիչ եմ ունենում, որովհետև չեմ ուզում ցույց տալ, թե ինչպիսի դիմագծեր ունեմ, ինչպիսի դիրքերում կարող եմ լուսանկարվել: Բնականաբար, գործի բերումով, դա անում եմ տարին մեկ անգամ, բայց, հիմնականում, սիրում եմ ներկայացնել, թե ինչ կա իմ շրջապատում ու ինչպես եմ ես այդ ամենը տեսնում»:

Լիան նաև ասաց`  նոր նախագծեր կան, որոնցում զբաղվածություն ունի: «Դեռ չեմ կարող ոչինչ ասել, քանի որ իրավասություն չունեմ, բայց, վստահ եմ` հանդիսատեսիս չեմ տխրեցնի ու չեմ թողնի ինձ կարոտեն»:

Մարիամ Խաչատրյան