«Առաջ, երբ ֆիլեր էի ներարկում, չէի նկատում, որ արհեստական ու կոպիտ եմ դառնում»․ Լիլիթ Բասյանը՝ 7 ժամ տևած քթի երրորդ վիրահատության և շրթունքների ֆիլերից հրաժարվելու մասին

Սննդաբան Լիլիթ Բասյանն Ամանորին ընդառաջ վիրահատել է քիթը։ Լիլիթը երրորդ անգամ է դիմում քթի պլաստիկ վիրահատության։ Tert.am Life–ի հետ զրույցում նա ասաց, որ եթե առաջին երկու անգամը վիրահատության էր դիմել էսթետիկ նպատակով, այս անգամ ստիպված էր առողջական խնդիրների պատճառով։

«Առաջին անգամ վիրահատության դիմել եմ 12 տարի առաջ, երկրորդ անգամ՝ 5 տարի առաջ։ Այն ժամանակ միայն արտաքին տեսքի մասին էի մտածում։ Ասում էի՝ եթե չշնչեմ էլ, ոչինչ, կարևորն ինձ դուր գա։ Չէի հասկանում, թե չշնչելն ինչ վատ հետևանքներ կարող է ունենալ։ 2 սխալ վիրահատության արդյունքում կարիք ունեցա նաև երրորդ վիրահատության․ առաջացած շնչառական խնդիրներից բացի քիթս նաև կոտրվել էր, քանի որ Ալեքսը քնած ժամանակ հարվածել էր քթիս ու կոտրել։ Հասկացա, որ այս անգամ ստիպված եմ գնալ վիրահատության,– ասաց Լիլիթն ու հավելեց, որ վիրահատությունը տևել է ավելի, քան 7 ժամ,– քանի որ քիթս կոտրված էր, ինչպես բժիշկս էր ասում, քիթ չունեի, 2 բավականին բարդ վիրահատություն պետք է անեին՝ կողոսկրիցս աճար օգտագործելու համար։ Բավականին շատ ցավեր ունեի, քանի որ կողոսկրի վիրահատության դեպքում ամեն շունչ քաշելը ցավոտ է»։

Սննդաբանը պատմեց, որ այս անգամ իրեն դժվար էր տրամադրվել վիրահատության, քանի որ, ի տարբերություն նախորդ անգամների, սա ոչ թե իր ցանկությունն էր, այլ ստիպված որոշումը։ Նա նկատեց, որ հետվիրահատական շրջանն էլ էր բարդ, ինչն առաջին հերթին պայմանավորված էր իր հոգեվիճակով։

«Ցանկանացած իրավիճակում ինձ շատ է օգնում աշխատանքս։ Այս դեպքում էլ բժշկի սահմանած ժամանակից շուտ վերադարձա աշխատանքի։ Ես վստահ եմ, որ հենց դա ինձ օգնեց շուտ վերականգնվել։ Ընկերուհիներս հումորներ են անում այդ թեմայով, քանի որ անզգայացումից արթնանալուց անմիջապես հետո սկսեցի գործնական զանգեր անել, պատասխանել հաճախորդներիս հարցերին, որոնք կուտակվել էին, քանի որ 7 ժամից ավելի կապի մեջ չէի եղել»,– ծիծաղելով պատմեց Լիլիթը։

Շատերը համարում են, որ սննդաբանն արհեստական տեսք ունի ու այս վիրահատությունն էլ ևս մի քայլ է դեպի արհեստական տեսք․ «Ես մարդկանց չեմ մեղադրում նման կարծիքի համար։ Ինձ շատ են ասում, որ իրականում այլ տեսք ունեմ։ Ինքս էլ, երբ հեռուստատեսությամբ տեսնում եմ ինձ, նկատում եմ, որ ավելի արհեստական տեսք ունեմ։ Նույնն էլ Ինստագրամի դեպքում է։ Այս ամենից ինքս սովորել եմ որևէ մեկի մասին կարծիք չկազմել նախքան նրան ճանաչելս։ Իհարկե, ես էլ եմ ունենում որոշակի տպավորություն, բայց մարդու մասին կարծիք կարող եմ հայտնել միայն նրան ճանաչելուց հետո»։

Լիլիթն ասաց, որ մեկուկես տարի է՝ շուրթերն էլ ֆիլեր չի արել, ավելին՝ մտադիր է հրաժարվել դրանից։

«Առաջ, երբ ֆիլեր էի ներարկում, չէի նկատում, որ ես արհեստական և կոպիտ եմ դառնում։ Հիմա հասկացել եմ, որ նուրբ տեսքը շատ ավելի գեղեցիկ է։ Հետ նայելով՝ վերլուծում եմ և հասկանում, որ արտաքին փոփոխություններս իմ ներքին ըմբոստությունն էին արտահայտում։ Ասում են չէ՞, որ կանայք հաճախ փոփոխություններ են անում, սթրեսային իրավիճակներում։ Ես ներքին խնդիրներ ունեի, որոնք արտահայտվում էին արտաքնիս վրա։ Հիմա հագուստիս ընտրության հարցում էլ նախընտրում եմ շատ ավելի նուրբ կերպարներ, որովհետև հոգեվիճակս խաղաղ է, ներդաշնակ եմ ինքս ինձ հետ, չեմ ուզում արտաքնապես ուշադրություն գրավել։ Ինձ դուր է գալիս նրբությունը։ Այնպես որ, շուտով շրթունքներիս ֆելլերն էլ կհեռացնեմ»,– եզրափակեց սննդաբանը։